ଗଜପତି: ଶେଷ ପର୍ଯ୍ୟାୟ ମତଦାନ ପାଇଁ ଚାଲିଛି ଜୋରସୋର ପ୍ରଚାର-ପ୍ରସାର । ୩ ପ୍ରମୁଖ ଦଳର କର୍ମୀ ଓ ପ୍ରାର୍ଥୀ ଭୋଟରଙ୍କୁ ଆକୃଷ୍ଟ କରାଇବାରେ ଲାଗିପଡିଛନ୍ତି । ଏହି ପରିପ୍ରେକ୍ଷୀରେ ବିଜେଡି ପ୍ରଚାର ମୈଦାନରେ ତେଲୁଗୁ ଅଭିନେତାଙ୍କୁ ଦେଖିବାକୁ ମିଳିଛି ।
ଆସନ୍ତା 24 ତାରିଖରେ ଗଜପତି ଜିଲ୍ଲା ଗୋଷାଣୀ ବ୍ଲକର 21ଟି ପଞ୍ଚାୟତ ଏବଂ ଏହା ଅଧୀନରେ ଥିବା 2ଟି ଜିଲ୍ଲା ପରିଷଦ ଜୋନ ପାଇଁ ନିର୍ବାଚନ ହେବାକୁ ଥିବାବେଳେ ବିଜେଡି ପକ୍ଷରୁ ଆଜି(ଶନିବାର) ନିର୍ବାଚନୀ ରାଲି ଅନୁଷ୍ଠିତ ହୋଇଛି । ଏଥିରେ ତେଲୁଗୁ ସିନେ ତାରକା ସୁମନ ଯୋଗଦେଇ ବିଜେଡି ପ୍ରାର୍ଥୀଙ୍କ ପାଇଁ ପ୍ରଚାର କରିଥିବା ଦେଖିବାକୁ ମିଳିଛି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଆଦର୍ଶରେ ଅନୁପ୍ରାଣିତ ହୋଇ ବିଜେଡି ପାଇଁ ପ୍ରଚାର କରିବାକୁ ଆସିଥିବା ସୁମନ କହିଛନ୍ତି । ପ୍ରଚାରରେ ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ ଏବଂ ବିଜେଡି ନେତା ଡ. ତିରୁପତି ପାଣିଗ୍ରାହୀ ମଧ୍ୟ ସାମିଲ ଥିବା ଦେଖିବାକୁ ମିଳିଛି । ଗୋଷାଣୀ ବ୍ଲକରେ ସଂଖ୍ୟାଧିକ ତେଲୁଗୁ ଭୋଟର ରହିଥିବାରୁ ସୁମନଙ୍କ ପ୍ରଚାର ଦଳ ପାଇଁ ସହାୟକ ହେବ ବୋଲି ବିଜେଡି କର୍ମୀ ଆଶା ପ୍ରକାଶ କରିଛନ୍ତି ।
ତେବେ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଚତୁର୍ଥ ପର୍ଯ୍ୟାୟ ଭୋଟ ଗ୍ରହଣ ପାଇଁ ଆସନ୍ତାକାଲି(ରବିବାର) ପ୍ରଚାରର ଶେଷଦିନ ଥିବାବେଳେ ଆଉ 2ଦିନ ପରେ ସରିବ ପଞ୍ଚମ ପର୍ଯ୍ୟାୟ ପ୍ରଚାର ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
