ବୌଦ୍ଧ: ଗତ ଦେଢ ମାସ ମଧ୍ୟରେ ଧଳପୁର ଠାରେ ନିର୍ମାଣଧୀନ ସେତୁ ଉପରୁ ଖସିପଡି ତିନିଜଣ ଶ୍ରମିକଙ୍କ ମୃତ୍ୟୁ ଘଟଣା । ଏହି ଘଟଣାରେ ଠିକାସଂସ୍ଥାର ତିନି ଜଣଙ୍କୁ ଗିରଫ କରିଛି ପୋଲିସ । ତେବେ ମାମଲାରେ ଜଣେ ଆକାଉଣ୍ଟାଣ୍ଟଙ୍କ ଗିରଫଦାରି ନେଇ ତାଙ୍କ ପରିବାର ପକ୍ଷରୁ ତୀବ୍ର ବିରୋଧ କରାଯାଇଛି ।
ଏଭଳି ଦୁଃଖଦ ଘଟଣା ପଛରେ ଠିକାସଂସ୍ଥା ରଣଜିତ ବିଲ୍ଡକନର ବଡ ବଡ ହସ୍ତୀ, ମାଲିକ, ପୂର୍ତ୍ତ ବିଭାଗ, ଶ୍ରମ ବିଭାଗ ନିଜ ଦୋଷ ଲୁଚାଇବାକୁ ଯାଇ ମାର ମାର ଭଣ୍ଡାରିଆକୁ ମାର ନ୍ୟାୟରେ ନୀରୀହ ଲୋକଙ୍କୁ ଫସାଉଥିବା ପରିବାର ପକ୍ଷରୁ ଅଭିଯୋଗ କରାଯାଇଛି । ଧଳପୁର ସେତୁ ଭଳି ବୌଦ୍ଧର ମର୍ଜାକୁଦ ସେତୁ ଓ ଅନ୍ୟାନ୍ୟ ନିର୍ମାଣଧୀନ ପ୍ରକଳ୍ପରେ ଅସୁରକ୍ଷିତ ଅବସ୍ଥାରେ ଶ୍ରମିକମାନେ କାର୍ଯ୍ୟ କରୁଥିଲେ ମଧ୍ୟ ପ୍ରଶାସନ ନିଦା ବିଷ୍ଣୁ ସାଜିଛି ।ସେପଟେ ଧଳପୁର ସେତୁର ସମ୍ପୃର୍ଣ୍ଣ ନିର୍ମାଣ ଅବଧି ବାରମ୍ବାର ଘୁଞ୍ଚି ଯାଉଥିଲେ ମଧ୍ୟ କାହିଁକି ଏ ଦିଗରେ ପଦକ୍ଷେପ ଗ୍ରହଣ କରାଯାଉନାହିଁ ସେନେଇ ମଧ୍ୟ ଉଠିଛି ପ୍ରଶ୍ନବାଚୀ ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
