ବୌଦ୍ଧ: ଶ୍ରୀଜଗନ୍ନାଥ ମନ୍ଦିର ବାହାରକୁ ବାହାରିଲେନି ବଡ ଠାକୁର କିମ୍ବା ଗଡିଲାନି ରଥଚକ । ଫଳରେ ହଜାର ହଜାର ଶ୍ରଦ୍ଧାଳୁ ମନ୍ଦିର ବାହାରେ ଠାକୁରଙ୍କୁ ଗୁହାରି ଜଣାଇ ମନଦୁଃଖରେ ଫେରିଲେ । ବୌଦ୍ଧ ଜିଲ୍ଲାର ବିଭିନ୍ନ ଶ୍ରୀଜଗନ୍ନାଥ ମନ୍ଦିରରେ ଆଜି (ସୋମବାର) ପବିତ୍ର ରଥଯାତ୍ରା ଉତ୍ସବକୁ ବାତିଲ କରାଯାଇ କେବଳ ଠାକୁରଙ୍କ ନୀତି କାନ୍ତି ସମ୍ପନ୍ନ ହୋଇଥିଲା । ଜିଲ୍ଲାର ବିଭିନ୍ନ ସହର ସମେତ ସାହାଜପାଲ, ବାଉଁଶୁଣୀ, ମନମୁଣ୍ଡା, କଣ୍ଟାମାଳ, ଚାରିଛକ, ଘଣ୍ଟାପଡା, ହରଭଙ୍ଗା ଭଳି ବିଭିନ୍ନ ସ୍ଥାନରେ ନିର୍ଦ୍ଦିଷ୍ଟ ସେବାୟତଙ୍କୁ ନେଇ ଚତୁର୍ଦ୍ଧା ବିଗ୍ରହଙ୍କ ନବ ଦିନାତ୍ମକ ପର୍ବ ନିରାଡମ୍ବର ଭାବରେ ପାଳନ କରାଯାଇଥିଲା ।
ବୌଦ୍ଧ ସହରର ଐତିହାସିକ ଶ୍ରୀଜଗନ୍ନାଥ ମନ୍ଦିର ପରିସରରେ ସିମୀତ ସେବାୟତଙ୍କୁ ନେଇ ମନ୍ଦିର ପରିକ୍ରମା ପରେ ଅସ୍ଥାୟୀ ମାଉସୀମା ଗୃହରେ ଆସ୍ଥାନ କରାଯାଇଥିଲା । ଉପଜିଲ୍ଲାପାଳ ଅଶ୍ବିନୀ କୁମାର ମେହେର ଓ ପୋଲିସ ଉପସ୍ଥିତିରେ ସେବାୟତମାନେ ଠାକୁରଙ୍କ ନୀତି କାନ୍ତି ପାଳନ କରିଥିଲେ । ମନ୍ଦିର ବାହାରେ ରହି ଶହ ଶହ ଶ୍ରଦ୍ଧାଳୁ ଠାକୁରଙ୍କ ଦର୍ଶନ କରି ନ ପାରି ମନଦୁଃଖରେ ଘରକୁ ଫେରିଯାଇଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
