ତେଲନଦୀରେ ହାତୀପଲ, ଆତଙ୍କିତ ଅଞ୍ଚଳବାସୀ

ବୌଦ୍ଧ: ତେଲନଦୀରେ ନିକଟରେ ବାର ଟିକିଆ ହାତୀପଲ ଆତଙ୍କ । ଧାନ ଅମଳ ସମୟରେ ହାତୀଙ୍କ ଉପଦ୍ରବ୍ୟକୁ ନେଇ ଚିନ୍ତା ପ୍ରକଟ କରିଛନ୍ତି ଚାଷୀ । ଘଟଣାସ୍ଥଳରେ ବନ ବିଭାଗର ଅଧିକାରୀ ଓ କର୍ମଚାରୀ ପହଞ୍ଚି ହାତୀମାନଙ୍କର ଗତିବିଧି ଉପରେ ନଜର ରଖିଥିବା ବେଳେ ବର୍ତ୍ତମାନ ସୁଦ୍ଧା ହାତୀପଲ ତେଲନଦୀ କୂଳରେ ରହିଥିବା ସୂଚନା ମିଳିଛି । ସେପଟେ ବନାଞ୍ଚଳର ବିଭିନ୍ନ ସ୍ଥାନରେ ହାତୀ ଉପଦ୍ରବ ବଢିବାରେ ଲାଗିଛି । ଯାହାକୁ ନେଇ ସ୍ଥାନୀୟ ଲୋକେ ଭୟଭୀତ ଅବସ୍ଥାରେ ରହିଛନ୍ତି ।

ସୂଚନା ଅନୁଯାୟୀ, ପ୍ରତ୍ୟେକ ବର୍ଷ ଧାନ ଅମଳ ସମୟରେ ତେଲନଦୀ ପାର ହୋଇ ହାତୀପଲ ବନାଞ୍ଚଳର ବିଭିନ୍ନ ସ୍ଥାନରେ ପଶି ଫସଲ ନଷ୍ଟ କରିଥାନ୍ତି । ଯାହାକୁ ନେଇ ଚାଷୀମାନେ ଅନେକ କ୍ଷତି ସହିଥାନ୍ତି । ଆଜି ସକାଳେ ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକର ଘଣ୍ଟାପଡା ପଞ୍ଚାୟତର ମାଣିକପୁର ନିକଟସ୍ଥ ତେଲନଦୀରେ ବାର ଟିକିଆ ହାତୀପଲ ଫସି ରହିଥିଲେ । ହାତୀପଲରୁ ଆଠଟି ବଡ଼ ହାତୀ ଓ ଚାରିଗୋଟି ଛୁଆ ହାତୀ ରହିଥିବା ସୂଚନା ମିଳିଛି । ତେବେ ଅପରାହ୍ନ ସୁଦ୍ଧା ହାତୀପଲ ତେଲନଦୀ କୂଳରେ ରହିଥିବା ବେଳେ କଣ୍ଟାମାଳ ବନାଞ୍ଚଳର ବନ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ହାତୀ ମାନଙ୍କର ଗତିବିଧି ଉପରେ ନଜର ରଖିଛନ୍ତି । ମାଣିକପୁର ନିକଟସ୍ଥ ତେଲନଦୀ ସେପଟେ ହାତୀ ରହିଛନ୍ତି । ଏହାକୁ ନେଇ ବନବିଭାଗ କହିଛି, କୌଣସି ଚିନ୍ତାର କାରଣ ନାହିଁ । ବିଭାଗ ଟିମ ତେଲନଦୀର ଆଖପାଖରେ ରହି ହାତୀଙ୍କ ଗତିବିଧି ଉପରେ ନଜର ରଖିଛି ।’’

କଣ୍ଟାମାଳ ବନାଞ୍ଚଳର ବିଭିନ୍ନ ସ୍ଥାନରେ ହାତୀ ମାନଙ୍କର ଗତିବିଧି ଦୀର୍ଘ ବର୍ଷ ହେଲା ରହିଆସୁଥିବା ବେଳେ ବନ ବିଭାଗର କାର୍ଯ୍ୟଧାରାକୁ ନେଇ ସ୍ଥାନୀୟ ଅଧିବାସୀ ପ୍ରଶ୍ନବାଚୀ ସୃଷ୍ଟି କରିଛନ୍ତି । ବର୍ତ୍ତମାନ ଆଉ କିଛି ଦିନ ପରେ ଧାନ ଅମଳ ହେବାକୁ ଥିବା ବେଳେ ହାତୀପଲଙ୍କ ଅଗମନ ଚାଷୀଙ୍କ ପାଇଁ ଚିନ୍ତାକର କାରଣ ପାଲଟିଛି । କଣ୍ଟାମାଳ ବନାଞ୍ଚଳର ଉମା, ନାରାୟଣ ପ୍ରସାଦ, ବରଗାଁ, ଘଣ୍ଟାପଡା, ଆମ୍ବଗା ଭଳି ପଞ୍ଚାୟତର ବିଭିନ୍ନ ଅଞ୍ଚଳରେ ହାତୀପଲର ଚଳପ୍ରଚଳ ତଥା ଫସଲ ନଷ୍ଟ କରୁଥିବା ନେଇ ଅଭିଯୋଗ ହୋଇଛି । ହାତୀଙ୍କ ଚଳପ୍ରଚଳ ଯୋଗୁଁ ସ୍ଥାନୀୟ ବାସିନ୍ଦାମାନେ ଆତଙ୍କିତ ଅବସ୍ଥାରେ ରହିଥିବା ବେଳେ ଅନେକ ସମୟରେ ହାତୀ ଓ ମଣିଷଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହେଉଛି ।

ଇଟିଭି ଭାରତ, ବୌଦ୍ଧ