ଭଦ୍ରକ: ଜିଲ୍ଲାରେ ପହଞ୍ଚିଲା ଏନଡିଆରଏଫ ଓ ଓଡ୍ରାଫର ଗୋଟିଏ ଗୋଟିଏ ଟିମ । ସାରା ରାଜ୍ୟରେ ଲାଗି ରହିଥିବା ଲଘୁଚାପ ଜନିତ ବର୍ଷା ଯୋଗୁଁ ପ୍ରବଳ ବର୍ଷା ଜାରି ରହିଛି । ବନ୍ୟା ପରିସ୍ଥିତିର ମୁକାବିଲା ପାଇଁ ଜିଲ୍ଲା ପ୍ରଶାସନ ପଦକ୍ଷେପ ନେଇଛି ।
ଭଦ୍ରକ ଜିଲ୍ଲାରେ ବୈତରଣୀ ନଦୀରେ ଆସନ୍ନ ବନ୍ୟା ଆଶଙ୍କା କରି ଗୋଟିଏ ଓଡ୍ରାଫ ଟିମକୁ ଧାମନଗର ଅଞ୍ଚଳରେ ମୁତୟନ କରାଯାଇଛି । ଏହା ସହ ଅନ୍ୟ ଏକ ଏନଡିଆରଏଫ ଟିମକୁ ଭଣ୍ଡାରିପୋଖରୀ ଅଞ୍ଚଳରେ ମୁତୟନ କରାଯାଇଛି । ଏମାନେ ବନ୍ୟା ସ୍ଥିତିକୁ ମୁକାବିଲା କରିବେ । ଉପର ମୁଣ୍ଡରେ ପ୍ରବଳ ବର୍ଷା ଯୋଗୁଁ ବୈତରଣୀ ନଦୀର ବନ୍ୟା ଜଳ ବୃଦ୍ଧି ପାଇବାରେ ଲାଗିଛି। ଆଖୁଆପଦା ଠାରେ ବିପଦ ସଙ୍କେତ 17.83 ମିଟର ରହିଥିବାବେଳେ ଅପରାହ୍ଣ 2ଟା ସୁଦ୍ଧା 18.39 ମିଟରରେ ବନ୍ୟାଜଳ ପ୍ରବାହିତ ହେଉଛି ।
ତେବେ ବନ୍ୟାଜଳ ସର୍ବାଧିକ 19 ରୁ 20 ମିଟର ପର୍ଯ୍ୟନ୍ତ ବୃଦ୍ଧି ପାଇପାରେ ବୋଲି ପ୍ରଶାସନ ପକ୍ଷରୁ ଅନୁମାନ କରାଯାଉଛି । ତେବେ ପ୍ରଶାସନ ପକ୍ଷରୁ ଆଖୁଆପଦା ଠାରେ ବନ୍ୟା ଜଳ ନିଷ୍କାସିତ ଉପରେ ସତର୍କ ଦୃଷ୍ଟି ରଖାଯାଇଥିବା ଜଣାପଡିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
