ବରଗଡ: ଜିଲ୍ଲାରେ ଆକାଶ ଛୁଆଁ ହୋଇଛି ପନିପରିବା ଦର | ଦୀର୍ଘ ଦୁଇ ମାସ ହେଲା ପିଆଜ ଦର କିଲୋ ପିଛା 60 ରୁ 70 ଟଙ୍କା ଥିବାବେଳେ କାର୍ତ୍ତିକ ମାସ ସାରା ବଜାରରେ ପନିପରିବା ଦର ମଧ୍ୟ ବଢିଛି | ଯାହା ଖାଉଟିଙ୍କୁ ନାନା ଅସୁବିଧାରେ ପକାଉଛି ।
ବରଗଡ ଜିଲ୍ଲା ଧାନଚାଷ ଏବଂ ପନିପରିବା ଚାଷ ପାଇ ରାଜ୍ୟରେ ପ୍ରସିଦ୍ଧ ହୋଇଥିବାବେଳେ ଏଠାରୁ ଅନ୍ୟ ସ୍ଥାନକୁ ବହୁ ପନିପରିବା ପ୍ରତିଦିନ ରପ୍ତାନୀ ହୋଇଥାଏ | ବାଇଗଣ, କୋବି, ଭେଣ୍ଡି, ଝୁଡଙ୍ଗ, ପୋଟଳ ଆଦି ଅନେକ ପନିପରିବା ବରଗଡରେ ପ୍ରଚୁର ମାତ୍ରାରେ ଉତ୍ପାଦନ ହେଉଥିଲେ ମଧ୍ୟ ବର୍ତ୍ତମାନ ଆକାଶ ଛୁଆଁ ହୋଇଛି ପରିବା ଦର | 200 ଟଙ୍କାର ପରିବା କିଣିଲେ ବି ବ୍ୟାଗ ଭରୁନି । ବଜାରରୁ ପରିବା କିଣି ଅଧା ଭର୍ତ୍ତି ମୁଣା ନେଇ ଘରକୁ ଫେରୁଛନ୍ତି ଗ୍ରାହକ |
ସେପଟେ ପରିବା ବେପାରୀମାନେ ମଧ୍ୟ ମାନ୍ଦା ବେପାରକୁ ନେଇ ଚିନ୍ତାରେ ପଡିଛନ୍ତି | ସାଧାରଣତଃ କାର୍ତ୍ତିକ ମାସରେ ଅଧିକାଂଶ ଲୋକେ ଆମିଷକୁ ବର୍ଜନ କରି ନିରାମିଷ ଖାଦ୍ୟ ଖାଉଥିବା ବେଳେ ଏହି ମାସରେ ପନିପରିବା ଦର ବୃଦ୍ଧି ପାଇଥାଏ । ହେଲେ ଚଳିତ ବର୍ଷ ଅଦିନିଆ ବର୍ଷା କାରଣରୁ ବହୁ ଫସଲ ନଷ୍ଟ ହୋଇଯାଇଛି ଯାହାଫଳରେ ବଜାରରେ କମ ପରିମାଣରେ ପରିବା ବିକ୍ରି ପାଇଁ ଆସୁଛି ଏବଂ ଗ୍ରାହକ ସଂଖ୍ୟା ଅଧିକ ତେଣୁ ଆକାଶ ଛୁଆଁ ଦାମ ହେଉଥିବା କୁହାଯାଉଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
