ବୀମା ଥାଇ ଫସଲ ବୀମାରାଶି ଦେଉନି କମ୍ପାନୀ, ଜିଲ୍ଲାପାଳଙ୍କ ଅଫିସ ଘେରିଲେ ଚାଷୀ

ବରଗଡ଼: ଫସଲ ବୀମା ରାଶି ପ୍ରଦାନ ଦାବିରେ ଜିଲ୍ଲାପାଳଙ୍କ ଅଫିସ ଘେରିଲେ ପଦ୍ମପୁର ଅଞ୍ଚଳର ଶତାଧିକ ଚାଷୀ । ବରଗଡ଼ ଜିଲା ପଦ୍ମପୁର ଉପଖଣ୍ଡରେ ଚଳିତବର୍ଷ ମରୁଡ଼ି ଭଳି ପରିସ୍ଥିତି ଉପୁଜିଛି । ଫସଲ କ୍ଷୟକ୍ଷତିରୁ ରକ୍ଷା ପାଇଁ ଚାଷୀମାନେ ବୀମାରାଶି ଦେଇଥିଲେ । ହେଲେ ବୀମା କମ୍ପାନୀ ଚାଷୀଙ୍କୁ ଫସଲବୀମାରୁ ବଞ୍ଚିତ କରିଥିବା ଅଭିଯୋଗ ଆଣିଛନ୍ତି ଚାଷୀ ।

ପଦ୍ମପୁର ଉପଖଣ୍ଡ ଅଞ୍ଚଳରେ ଚଳିତ ଖରିଫ ଋତୁ ଚାଷରେ ବହୁ ଚାଷୀ ମରୁଡ଼ି ପରିସ୍ଥିତିର ଶିକାର ହୋଇଛନ୍ତି ମାତ୍ର ଏଭଳି ସ୍ଥିତିରେ ବୀମା କମ୍ପାନୀ ଚାଷୀଙ୍କୁ ବୀମା ସହାୟତାରୁ ବଞ୍ଚିତ କରିବା ପାଇଁ ନାନା ଆଳ ଦେଖାଇବା ଆରମ୍ଭ କରି ଦେଇଛି । ବୀମା କମ୍ପାନୀ ବେଆଇନ ଭାବେ ଚାଷୀଙ୍କ ବୀମା ଆବେଦନ ଖାରଜ କରିଛି ।

ଏହାକୁ ନେଇ ଚାଷୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି । ବୁଧବାର ପଦ୍ମପୁର ରାଜବୋଡାସମ୍ବର କୃଷକ ସଂଗଠନ ନେତୃତ୍ୱରେ ଶତାଧିକ ଚାଷୀ ବାଇକ୍‌ ରାଲିରେ କରିଥିଲେ । ଏହାପରେ ବରଗଡ଼ ଜିଲ୍ଲାପାଳଙ୍କ ଅଫିସକୁ ଘେରାଉ କରିବା ସହ ବିକ୍ଷୋଭ ପ୍ରଦର୍ଶନ କରିଛନ୍ତି । ଚାଷୀଙ୍କ ଏହି ଆନ୍ଦୋଳନକୁ ସମ୍ବିଧାନ ସୁରକ୍ଷା ମଞ୍ଚ ଓ କୋଶଳ ସେନା ସମେତ ବିଭିନ୍ନ ସଂଗଠନ ସମର୍ଥନ ଦେଇଛନ୍ତି ।

ବରଗଡ଼ରୁ ରାଜେଶ ସରାଫ, ଇଟିଭି ଭାରତ