ବରଗଡ: ଅମ୍ବାଭୋନା ଥାନା ଭଙ୍ଗାରୁଜା ଘଟଣାକୁ ନେଇ ମୁହାଁମୁହିଁ ହୋଇଛନ୍ତି ସାଂସଦ ସୁରେଶ ପୂଜାରୀ ଓ ବିଜେଡି ବିଧାୟକ ସୁଶାନ୍ତ ସିଂ । ସାଂସଦ ସୁରେଶ ପୂଜାରୀଙ୍କ ଅଭିଯୋଗର ଜବାବ ରଖି ସୁଶାନ୍ତ କହିଛନ୍ତି ଆପଣ ନିରାଧାର ଅଭିଯୋଗ ଆଣୁଛନ୍ତି । ଆପଣଙ୍କୁ ନିର୍ବାଚନରେ ଲୋକେ ପରାସ୍ତ କରିବେ । ନିର୍ବାଚନରେ ଜବାବ ଦିଆଯିବ ।
ଏକ ଭିଡିଓ ଜରିଆରେ ବିଜେଡି ବିଧାୟକ ସୁଶାନ୍ତ ସିଂ ସାଂସଦ ସୁରେଶ ପୂଜାରୀଙ୍କ ଉଦ୍ଦେଶ୍ୟରେ କହିଛନ୍ତି ‘‘ ଆପଣ ଗଣମାଧ୍ୟମରେ ଯେଉଁ ଆରୋପ ଲଗାଉଛନ୍ତି, ଗୁଡୁ ମୁସଲିମ, ରାଜା ଖାଁ କିମ୍ବା ମାଓବାଦୀ ଲିଙ୍କ କଥା କହିଛନ୍ତି, ଆପଣଙ୍କ ଦଳ ତ କେନ୍ଦ୍ରରେ ଶାସନ କରୁଛି । ସବୁ ତଦନ୍ତକାରୀ ସଂସ୍ଥା ଆପଣଙ୍କ ହାତରେ । ଗୋଟିଏ ପ୍ରମାଣ ମୋ ବିରୋଧରେ ଦେଖାନ୍ତୁ । ମୁଁ ରାଜନୀତି ଛାଡିଦେବି । ’’ ସେହିପରି ସୁଶାନ୍ତ କହିଛନ୍ତି ଆପଣଙ୍କ ଭାଗ୍ୟ ଭଲ ଗତ ନିର୍ବାଚନରେ ଜିତି ଗଲେ । ଏଥର ଜିତି କି ଦେଖାନ୍ତୁ । ଲକ୍ଷାଧିକ ଭୋଟରେ ପରାସ୍ତ ହେବେ । ଘଟଣାକୁ ନେଇ ଯେଉଁ ଭିନ୍ନ ଭିନ୍ନ ଅଭିଯୋଗ ହେଉଛି ପ୍ରଥମ କଥା ହେଲା ବିଜେଡି ଦଳ ଭୋଜି କରିଯାଇନାହିଁ । ସୋହେଲା ଅନ୍ତ ପୂଜା କମିଟି ଓ ଅନ୍ୟ ଗ୍ରାମୀବାସୀ ଭୋଜି କରୁଥିଲେ । ଯେଉଁଥିରେ ସବୁ ଦଳ ଲୋକ ଥିଲେ । ସ୍ଥାନୀୟ ପୋଲିସ ଭୁଲ ତଥ୍ୟ ପାଇଁ ସେଠି ପହଞ୍ଚି ଦାଦାଗିରି କରିଥିଲା ।
ଅଧିକ ପଢନ୍ତୁ- Ambabhona PS Vandalism Case: ବିଧାୟକ ସୁଶାନ୍ତ ସିଂଙ୍କୁ ଘେରିଲେ ବିଜେପି ଓ କଂଗ୍ରେସ
ସେହିପରି ସାଂସଦଙ୍କୁ ସୁଶାନ୍ତ କହିଛନ୍ତି ଆପଣଙ୍କ ନେତା ମାନେ 6 ମାସ ତଳେ ପୋଲିସକୁ ଆକ୍ରମଣ କରିଥିଲା । ଆଜି ଯେଉଁ ମାନେ ଆପଣଙ୍କ ସହିତ ବସିଛନ୍ତି ସେମାନେ ଜେଲ ଯାଇଥିଲେ । ଆମେ କୌଣସି ଅନ୍ୟାୟ କାମ କେବେ କରିନାହୁଁ । ଆପଣଙ୍କ ଦଳର ଲୋକ ବରଗଡରେ ନିଶା କାରବାର କରୁଛନ୍ତି। ଆପଣଙ୍କ ପଛରେ ଲୋକ ନାହାଁନ୍ତି । ଆଗାମୀ ନିର୍ବାଚନରେ ବରଗଡରେ ବିଜେପିର ଶୋଚନୀୟ ପରାଜୟ ହେବ ବୋଲି ସୁଶାନ୍ତ କହିଛନ୍ତି ।
ସୂଚନାଯୋଗ୍ୟଯେ ଅମ୍ବାଭୋନା ଥାନା ଭଙ୍ଗାରୁଜା ଘଟଣାକୁ ନେଇ ଏବେ ବିଜେପି ବିଜେଡି ଉପରେ ଭାରି ପଡିଛି । ବିଧାୟକ ସୁଶାନ୍ତ ସିଂଙ୍କ ଗିରଫ ଦାବି କରି ତୁହାକୁ ତୁହା ଥାନା ଘେରାଉ ସହ ଆନ୍ଦୋଳନ କରୁଛି । ଗତକାଲି ସାଂସଦ ସୁରେଶ ପୂଜାରୀ ମଧ୍ୟ ଆନ୍ଦୋଳନରେ ସାମିଲ ହୋଇ ସୁଶାନ୍ତ ସିଂଙ୍କୁ ଟାର୍ଗେଟ କରିଥିଲେ ।
ଇଟିଭି ଭାରତ, ବରଗଡ
