ବାଲେଶ୍ୱର: ଦିନକୁ ଦିନ ବାଲେଶ୍ବରରେ ବଢିବାରେ ଲାଗିଛି ଦୃର୍ବୁତ୍ତଙ୍କ ପାଦୁର୍ଭାବ । ବାଲେଶ୍ବର ଜିଲ୍ଲାର କୁରୁଡ଼ା ଜ୍ୟୋତି ହସ୍ପିଟାଲ ଛକ ନିକଟରୁ ଚାନ୍ଦିପୁର ଯାଏ ଲମ୍ବିଥିବା ନୂଆ ପୃଫ ରୋଡ଼ ଏବେ ଅସାମାଜିକଙ୍କ ଅଡ୍ଡା ସ୍ଥଳୀ ପାଲଟିଛି । ଛିନତାଇ ଗ୍ୟାଙ୍ଗ ସକ୍ରିୟ ହୋଇଥିବା ସହ ଏବେ ପ୍ରେମୀ ଯୁଗଳ ଏବଂ ଦମ୍ପତିଙ୍କୁ ଟାର୍ଗେଟ କରି କରୁଛନ୍ତି ଲୁଟ । ଏମିତି ଏକ ମାମଲାରେ ସଦର ଥାନା ପୋଲିସ 3 ଜଣ ଅଭିଯୁକ୍ତଙ୍କ ସମେତ ଜଣେ ନାବାଳକ ସମ୍ପୃକ୍ତ ରହିଥିବା ବେଳେ ସମୁଦାୟ 4 ଜଣଙ୍କୁ ଗିରଫ କରିଛି ପୋଲିସ । ସେମାନଙ୍କ ନିକଟରୁ ଗୋଟିଏ ବାଇକ, 4ଟି ମୋବାଇଲ, ଗୋଟିଏ ଲୁହା ପାଇପ ଜବତ କରାଯାଇଛି ।
ସୂଚନା ଅନୁସାରେ, ଚାନ୍ଦିପୁର ଆଡକୁ ଲମ୍ବିଥିବା ଏହି ରାସ୍ତାର ପାଛୋଡ଼ିଆ ନିକଟରେ ଏକ ପାର୍କ ରହିଛି । ଏହାସହ ଏହି ରାସ୍ତା ସଲଟ ରୋଡ଼କୁ ସଂଯୋଗ କରୁଥିବା ଯୋଗୁଁ ନୂଆ ରାସ୍ତାରେ ଲୋକମାନଙ୍କ ଅଧିକ ଯାତାୟତ ରହୁଥିବା ଦେଖିବାକୁ ମିଳେ । ନୂଆ ରାସ୍ତାରେ ଗାଡ଼ି ମୋଟର ଯାଉଥାଏ ସତ ହେଲେ ରାସ୍ତା କଡ଼ରେ କୌଣସି ଲାଇଟ ବ୍ୟବସ୍ଥା ନଥିବାରୁ ଏହାର ଫାଇଦା ଉଠାଉଛନ୍ତି ଛିନତାଇ ଗ୍ୟାଙ୍ଗ । ରାସ୍ତାର କୌଣସି ଏକ ନିଜନ ସ୍ଥାନରେ ଛକି ରହି ଏହି ଗ୍ୟାଙ୍ଗ ପ୍ରେମୀ ଯୁଗଳ ଏବଂ ଦମ୍ପତି ମାନଙ୍କୁ ଟାର୍ଗେଟ କରି ଲୁଟୁଥିଲେ । ଏକୁଟିଆ ସେମାନଙ୍କୁ ପାଇ ଜୋର ଜବରଦସ୍ତି ଭୟ ଦେଖାଇ ସେମାନଙ୍କର ବିଭିନ୍ନ ପ୍ରକାର ଫଟୋ ଉଠାଇ ଧମକ ଚମକ ଦେଇ ଟଙ୍କା ପଇସା ଲୁଟ କରୁଥିଲେ ।
ଏହା ମଧ୍ୟ ପଢ଼ନ୍ତୁ.......ରାଜଗାଙ୍ଗପୁର ପୋଲିସକୁ ବଡ ସଫଳତା, ଆତଙ୍କ ଖେଳାଇଥିବା ଲୁଟେରା ଗ୍ୟାଙ୍ଗ କାବୁ
ଏହା ମଧ୍ୟରେ ଗତ 1 ତାରିଖରେ ଦୁଇଜଣ ଭାଇ ଭଉଣୀ ସେହି ରାସ୍ତାରେ ଆସୁଥିବା ବେଳେ ଶୌଚ ପାଇଁ ଯୁଧିଷ୍ଠିରପୁର ଛକ ନିକଟରେ ଅଟକି ଥିଲେ । ଏହାର ସୁଯୋଗ ନେଇ ଏହି ଗ୍ୟାଙ୍ଗ ସେମାନଙ୍କୁ ଡରାଇ ଧମକାଇ ସେମାନଙ୍କ ବିଭିନ୍ନ ପ୍ରକାର ଫଟୋ ଉଠାଇବା ସହ ସେସବୁ ଭାଇରାଲ କରିବାର ଧମକ ଦେଇ ସେମାନଙ୍କୁ ଲୁଟ କରିଥିଲେ । ଏହାସହ ଫୋନ ପେ ଜରିଆରେ ଟଙ୍କା ପଠାଇବା ପାଇଁ ଧମକ ଦେଇଥିଲେ । ଏନେଇ ସଦର ଥାନା ପୋଲିସ ନିକଟରେ ଅଭିଯୋଗ ପରେ ପୋଲିସ ଅନୁସନ୍ଧାନ ଆରମ୍ଭ କରିଥିଲା । ଏହାପରେ 4 ଜଣଙ୍କୁ ଗିରଫ କରିବାରେ ପୋଲିସ ସକ୍ଷମ ହୋଇଛି । ଖାଲି ସେତିକି ନୁହଁ ଏହି ରାସ୍ତାରେ ଲୁଟେରାଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ଏମିତି ଗ୍ୟାଙ୍ଗ ଏବେ ବେଶ ସକ୍ରିୟ ହୋଇଛି । ଏଥିପାଇଁ କୌଣସି ସମୟରେ ଏମିତି ଲୁଟର ଶିକାର ହେଲେ ତୁରନ୍ତ ପୋଲିସକୁ ଜଣାଇବା ପାଇଁ ସଦର ଏସଡିପିଓ ଶଶାଙ୍କ ଶେଖର ବେଉରା କହିଛନ୍ତି ।
ଇଟିଭି ଭାରତ, ବାଲେଶ୍ୱର
