ବାଲେଶ୍ବର: ଶରତ ଆଗମନ ସହ ଧରାବତରଣ କରିଛନ୍ତି ମା ଦୁର୍ଗା । ମା'ଙ୍କୁ ସ୍ବାଗତ କରୁଛି ଧରଣୀରାଣୀ । ଭକ୍ତମାନେ ମଧ୍ୟ ମା'ଙ୍କ ଆଗମନରେ ବେଶ୍ ପ୍ରଫୁଲ୍ଲିତ । ସେପଟେ ମା'ଙ୍କ ପୂଜା ପାଇଁ ବିଭିନ୍ନ ମଣ୍ଡପରେ ଚାଲିଛି ସାଜସଜ୍ଜା । ଏହାସାଙ୍ଗକୁ ସମସ୍ତ ପୂଜା ନୀତି ପାଇଁ ମଧ୍ୟ ଭକ୍ତମାନେ ପ୍ରସ୍ତୁତି ଆରମ୍ଭ କରିସାରିଛନ୍ତି । ବିଭିନ୍ନ ମଣ୍ଡପରେ ଦଶଭୂଜାଙ୍କ ମୃଣ୍ମୟୀ ମୂର୍ତ୍ତିରେ ଦିଆଯାଉଛି ଶେଷ ସ୍ପର୍ଶ । ସମାନ ଭାବେ ବାଲେଶ୍ଵର ସୁନହଟ ଗାଁରେ ମା' କନକ ଦୁର୍ଗାଙ୍କ ପୂଜାର୍ଚ୍ଚନା ପାଇଁ ମଧ୍ୟ ଚଳଚଞ୍ଚଳ ହୋଇଉଠିଛି ସମଗ୍ର ଅଞ୍ଚଳ । କନକ ଦୁର୍ଗାଙ୍କ ପୂଜା କମିଟି ପକ୍ଷରୁ ଅଞ୍ଚଳବାସୀଙ୍କ ସହଯୋଗରେ ପୂଜା ପ୍ରସ୍ତୁତି ଚାଲିଛି । ଚଳିତ ବର୍ଷ 79 ବର୍ଷରେ ପହଞ୍ଚିଛି ଏହି ପୂଜା କମିଟି ।
ମାଆ କନକ ଦୁର୍ଗା ଦୀର୍ଘ ବର୍ଷ ହେଲା ସୁନହଟ ଗାଁରେ ପୂଜା ପାଇଆସୁଛନ୍ତି । କୁହାଯାଏ, ୧୯୪୩ ମସିହାରେ ଉକ୍ତ ଅଞ୍ଚଳରେ ହଇଜା ରୋଗ ବ୍ୟାପିଥିଲା । ଯେଉଁଆଡ଼େ ଚାହିଁଲେ ଖାଲି କୁଢ଼କୁଢ଼ ମୃତଦେହ । କେମିତି ଏହି ବିପଦରୁ ମୁକ୍ତି ମିଳିବ ସେନେଇ ଲୋକେ ବେଶ ଚିନ୍ତିତ ଥିଲେ । ଏହି ସମୟରେ ଅଞ୍ଚଳର ଜଣେ ବରିଷ୍ଠ ବ୍ୟକ୍ତି ସ୍ବର୍ଗତ ମୁରଲୀ ମୋହନ ଦାସଙ୍କୁ ସ୍ବପ୍ନାଦେଶ ହୋଇଥିଲା । ମା' କନକ ଦୁର୍ଗାଙ୍କୁ ପୂଜା କରିବା ପାଇଁ ସ୍ବପ୍ନରେ ନିର୍ଦ୍ଦେଶ ହୋଇଥିଲା । ମା'ଙ୍କ ମୂର୍ତ୍ତି କେବଳ ସୁନେଲି ରଙ୍ଗରେ ହେବ ବୋଲି ନିର୍ଦ୍ଦେଶ ରହିଥିଲା ମଧ୍ୟ । ପରବର୍ତ୍ତୀ ସମୟରେ ସେଇୟା ହିଁ ହେଲା । ମାଙ୍କ ପୂଜାର୍ଚ୍ଚନା ନିର୍ଦ୍ଦେଶ ଅନୁସାରେ କରାଗଲା । ଏହାପରେ ଚମତ୍କାର ଭାବେ ହଇଜା କବଳରୁ ରକ୍ଷା ପାଇଥିଲେ ଗ୍ରାମବାସୀ । ବାସ୍ ସେହିଦିନ ଠାରୁ ଏଠାରେ ମାଆ କନକ ଦୁର୍ଗା କେବଳ ସୁନେଲି ରଙ୍ଗର ପ୍ରତିମା ଭାବେ ପୂଜା ପାଇଆସୁଛନ୍ତି । ସୁନେଲି ରଙ୍ଗ ବଦଳରେ ଗୋଟିଏ ବର୍ଷ ମା'ଙ୍କ ମୂର୍ତ୍ତିରେ ଅନ୍ୟ ରଙ୍ଗର ପ୍ରଲେପ ଦିଆଯାଇଥିଲା । ମାତ୍ର ରଙ୍ଗ ପରିବର୍ତ୍ତନ ନ କରିବା ପାଇଁ ପୁଣି ସ୍ବପ୍ନାଦେଶ ହୋଇଥିଲା । ଏଥିପାଇଁ କୌଣସି ବର୍ଷ ମା'ଙ୍କ ମୂର୍ତ୍ତି ରଙ୍ଗ କେବେ ବି ପରିବର୍ତ୍ତନ ହୋଇନାହିଁ । ସେହି ଗୋଟିଏ ରଙ୍ଗ ସୁନେଲି ହିଁ ଚାଲିଆସୁଛି । ଏହାସହ ଏଠାରେ ପୂଜାର୍ଚ୍ଚନା ସମ୍ପୂର୍ଣ୍ଣ ଭାବେ ଘରୋଇ ପୂଜା ଭଳି ହୋଇଥାଏ ।
ମା' କନକ ଦେବୀଙ୍କ ପୂଜା ଟିକେ ନିଆରା । ଅଷ୍ଟମୀ ପୂଜାରେ ପୂଜକ ଓ ମା ଏକାକାର ହୋଇଯାଆନ୍ତି । ବହୁ ଦୂର ଦୂରାନ୍ତରୁ ଭକ୍ତମାନେ ମାନସିକ ନେଇ ମା କନକ ଦୁର୍ଗାଙ୍କ ପାଖକୁ ଦୌଡ଼ି ଆସନ୍ତି। କୁହାଯାଏ, ଏଠାରେ ଯିଏ ଯାହା ମାନସିକ କରେ, ତାହା ପୂରଣ କରନ୍ତି ମାଆ । ସେଥିପାଇଁ ଦୂରଦୂରାନ୍ତରୁ ଅନେକ ଭକ୍ତ ସେମାନଙ୍କ ଦୁଃଖ ନେଇ ମାଙ୍କ ପାଖକୁ ଆସିଥାନ୍ତି । ମାନସିକ ପୁରଣ ହେବା ପରେ ମା'ଙ୍କ ପୂଜାରେ ନିଜକୁ ସାମିଲ କରନ୍ତି । ଏବେ କମିଟି ଦ୍ବାରା ମାଙ୍କ ପୂଜା ପରିଚାଳନା କରାଯାଉଛି । ପୂଜା କମିଟି ଅଞ୍ଚଳ ମଧ୍ୟରେ ୫ ହଜାରରୁ ଅଧିକ ପରିବାର ରହୁଥିବା ବେଳେ ଲୋକସଂଖ୍ୟା କିନ୍ତୁ ୧୦ ହଜାରରୁ ଅଧିକ ହେବ । ପାଖାପାଖି ୨୦୦ରୁ ଅଧିକ ଛୋଟବଡ଼ ବ୍ୟବସାୟ ପ୍ରତିଷ୍ଠାନ ରହିଛି। କର୍ମକର୍ତ୍ତା ଓ ଅଞ୍ଚଳବାସୀଙ୍କ ସହଯୋଗରେ ପୂଜା ହୋଇଥାଏ । ପୂଜା ସହିତ କମିଟି ଦ୍ବାରା ବିଭିନ୍ନ ସାମାଜିକ କାର୍ଯ୍ୟକ୍ରମ ହାତକୁ ନିଆଯାଏ । ଅଞ୍ଚଳର ବିକାଶ ପାଇଁ ବିଭିନ୍ନ କ୍ଷେତ୍ରରେ ସହଯୋଗ କରାଯାଇଥାଏ । ଏହା ସହିତ ରକ୍ତଦାନ ଶିବିର, ସ୍ଵାସ୍ଥ୍ୟ ଶିବିର, ସ୍ବଚ୍ଛତା ଅଭିଯାନ ସହ ଅସହାୟତାଙ୍କୁ ସହାୟତା ପ୍ରଦାନ କରାଯାଏ ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
