ବାଲେଶ୍ବର: ବୋଟିଂ ପୋଖରୀରୁ ନିଖୋଜ ବ୍ୟକ୍ତିଙ୍କ ମୃତଦେହ ଉଦ୍ଧାର । ବାଲେଶ୍ବର ଜିଲ୍ଲା ବାମପଦା ସ୍ଥିତ ନୋସି ବିଜନେସ ପାର୍କର ବୋଟିଂ ପୋଖରୀରୁ ଏହି ମୃତଦେହ ଉଦ୍ଧାର ହୋଇଛି ।
ସୂଚନା ମୁତାବକ, ବାଲେଶ୍ବର ଜିଲ୍ଲା ନୀଳଗିରି ଥାନା ଚିନ୍ତାମଣିପୁର ଗ୍ରାମର କେଳୁ ଚରଣ ମୁଦୁଲିଙ୍କ ଦୁଇ ପୁଅ ଓ ବୋହୂ ବାଣିଜ୍ୟ ମେଳାରେ ସାମଗ୍ରୀ ବିକ୍ରି ପାଇଁ ଷ୍ଟଲ ଲଗାଇଥିଲେ । ତେବେ ଗତକାଲି ଦିନ 1ଟା 30 ବେଳେ ଅଚ୍ୟୁତାନନ୍ଦ ମୁଦୁଲି କୁଆଡେ ଯିବା ସହ ଦୀର୍ଘ ସମୟ ପର୍ଯ୍ୟନ୍ତ ଫେରିନଥିଲେ । ଶେଷରେ ଭାଇ ଓ ଭାଉଜ ତାଙ୍କ ନିଖୋଜ ନେଇ ଶିଳ୍ପାଞ୍ଚଳ ଥାନାରେ ଏକ ମାମଲା ରୁଜୁ କରିଥିଲେ ।
ତେବେ ଆଜି ସନ୍ଧ୍ୟାରେ ଅଚ୍ୟୁତାନନ୍ଦଙ୍କ ମୃତଦେହ ନୋସି ବିଜନେସ ପାର୍କର ବୋଟିଂ ପୋଖରୀରେ ଭାସୁଥିବା ଦେଖିବାକୁ ମିଳିଥିଲା । ଖବର ପାଇ ଶିଳ୍ପାଞ୍ଚଳ ପୋଲିସ ଘଟଣାସ୍ଥଳରେ ପହଞ୍ଚିବା ସହ ମୃତଦେହ ଉଦ୍ଧାର କରିଛି । ଏଥିସହ ଘଟଣା ପଛର ସତ୍ୟାସତ୍ୟ ଜଣାଇବା ପାଇଁ ତଦନ୍ତ ଆରମ୍ଭ କରିଛି । ସେପଟେ ଅଚ୍ୟୁତାନନ୍ଦଙ୍କ ପରିବାର ତାଙ୍କୁ କେହି ହତ୍ୟା କରିଥିବା ଅଭିଯୋଗ କରିଛନ୍ତି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
