ବାଲେଶ୍ଵର: ବାଲେଶ୍ଵର ରେଳ ଷ୍ଟେସନର ମଡେଲ ବିଲ୍ଡିଂ ନିର୍ମାଣ କାର୍ଯ୍ୟ ସମ୍ପର୍କରେ ଜିଲ୍ଲାପାଳ ଓ ଖଡଗପୁର ଡିଆରଏମଙ୍କ ମଧ୍ୟରେ ଆଜି(ମଙ୍ଗଳବାର) ଏକ ଗୁରୁତ୍ବପୂର୍ଣ୍ଣ ବୈଠକ ବସିଛି । ଏହାସହ ନୀଳଗିରିକୁ ପାସେଞ୍ଜର ଟ୍ରେନ ଚଳାଚଳ ସମ୍ପର୍କରେ ମଧ୍ୟ ଏଥିରେ ଆଲୋଚନା କରାଯାଇଛି । ବାଲେଶ୍ଵର ରେଳ ଷ୍ଟେସନ ପଶ୍ଚିମ ପଟେ ମଡେଲ ଗୃହ ନିର୍ମାଣ ନେଇ ଭିତ୍ତିପ୍ରସ୍ତର ସ୍ଥାପନ ହେବା ପରେ ନିର୍ମାଣ କାର୍ଯ୍ୟ ଆରମ୍ଭ ହୋଇଛି । ସେଠାରେ ଥିବା ଜବରଦଖଲ ଉଚ୍ଛେଦ ସମ୍ପର୍କରେ ଜିଲ୍ଲାପାଳଙ୍କ ସହ ଆଲୋଚନା କରିଛନ୍ତି ଡିଆରଏମ ।
ବାଲେଶ୍ଵରର ଏଭଳି ଉନ୍ନତି ପାଇଁ ଲୋକଙ୍କ ସହଯୋଗ ଆବଶ୍ୟକ ବୋଲି ଡିଆରଏମ କହିଛନ୍ତି । ଏହାସହ ନୀଳଗିରିକୁ ପାସେଞ୍ଜର ଟ୍ରେନ ଚଳାଚଳ ପାଇଁ ଷ୍ଟେସନ ବିଲ୍ଡିଂ ମଝିରେ କେଉଁଠି ହେବ ଓ କେଉଁଠି କେଉଁଠି ଷ୍ଟପେଜ ରହିବ, ସେନେଇ ସ୍ଥିତି ଅନୁଧ୍ୟାନ ପାଇଁ ନୀଳଗିରି ଯାଇଛନ୍ତି ଡିଆରଏମ । ତାଙ୍କ ସହ ବରିଷ୍ଠ ଡିଭିଜିନାଲ ଇଞ୍ଜିନିୟର, ଡିଭିଜିନାଲ ଇଞ୍ଜିନିୟର, ସିନିଅର ଡିଭିଜିନାଲ ସିକ୍ୟୁରିଟି କମିଶନର ପ୍ରମୁଖ ଜିଲ୍ଲାପାଳଙ୍କ ସହ ଆଲୋଚନା କରିବା ପରେ ନୀଳଗିରି ଅଭିମୁଖେ ବାହାରିଛନ୍ତି ।
ବାଲେଶ୍ଵରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
