ବଲାଙ୍ଗୀର: ଜଳସେଚନ ସମସ୍ୟା ପାଇଁ ବଲାଙ୍ଗୀର ଜିଲ୍ଲାରେ ଚାଷୀଙ୍କ ଅସନ୍ତୋଷ ବଢିବାରେ ଲାଗିଛି । ବଲାଙ୍ଗୀରର ଶୁଷ୍କ ଅଞ୍ଚଳ ଦେଓଗାଁ ଦେଇ ଯାଇଥିବା ସଙ୍ଗୋଡ ନଦୀରେ ଏକ ବ୍ୟାରେଜ ନିର୍ମାଣ ଦାବିରେ ଏକଜୁଟ ହୋଇଛନ୍ତି ଚାଷୀ । ତୁରନ୍ତ ସରକାର ଏଠାରେ ଏକ ବ୍ୟାରେଜ ନିର୍ମାଣ କରିବାକୁ ଦାବି କରିଛନ୍ତି ।
ବଲାଙ୍ଗୀର ଜିଲ୍ଲାରେ ନିଶ୍ଚିତ ଜଳସେଚନ ମାତ୍ର 3 ପ୍ରତିଶତ ଥିବାବେଳେ ସରକାର ଏହାର ବୃଦ୍ଧି ପାଇଁ ବିଶେଷ ପଦକ୍ଷେପ ନେଉଁନାହାଁନ୍ତି । ଆଉ ଯାହା ବି ପ୍ରକଳ୍ପ ହାତକୁ ନେଇଛନ୍ତି ତାହା ଅଧା ପନ୍ତରିଆ ହୋଇପଡି ରହିଛି । ଯାହାକୁ ନେଇ ଦିନକୁ ଦିନକୁ ଚାଷୀଙ୍କ ଅସନ୍ତୋଷ ବଢିବାରେ ଲାଗିଛି । ଫଳରେ ମଙ୍ଗଳବାର ସିକୁଆଁ ଗାଁ ଠାରେ ଚାଷୀ ସମାବେଶ କରି ବ୍ୟାରେଜ କରିବାକୁ ଦାବି କରିଛନ୍ତି ।
ଏଠାରେ ବ୍ୟାରେଜ ହେଲେ ଦେବଗାଁ ବ୍ଲକର 6ଟି ପଞ୍ଚାୟତର 18 ଟି ଗାଁ ଓ ବଲାଙ୍ଗୀର ସଦର ବ୍ଲକର ଦୁଇଟି ପଞ୍ଚାୟର ଜମିକୁ ପାଣି ପହଞ୍ଚିବ । ଯାହାଫଳରେ 32 ଶହ ହେକ୍ଟର ଜମି ଜଳସେଚିତ ହୋଇପାରିବ । ସେପଟେ ଦୀର୍ଘ ଦିନରୁ ଏହି ଦାବି ହୋଇ ଆସୁଥିଲେ ମଧ୍ୟ ଆବଶ୍ୟକ ଥିବା ସ୍ଥାନରେ ସରକାର ବ୍ୟାରେଜ ନିର୍ମାଣ ନ କରି ଲୋୟର ସୁକତେଲ ପ୍ରକଳ୍ପ ଆୟକଟ ମଧ୍ୟରେ ପୁଣି ବ୍ୟାରେଜ ନିର୍ମାଣ ପାଇଁ ଟଙ୍କା ମଞ୍ଜୁର କରିଛନ୍ତି ।
ସରକାରଙ୍କ ଏହି ଅଜବ ନୀତିକୁ ଚାଷୀ ପ୍ରଶ୍ନ କରିଥିବା ବେଳେ ବର୍ତ୍ତମାନ ସରକାର ଏଠି ବ୍ୟାରେଜ ନିର୍ମାଣ କରନ୍ତୁ ବୋଲି ଦାବି କରିଛନ୍ତି ନହେଲେ ଆଗାମୀ ଦିନରେ ବଡ଼ ଚାଷୀ ଆନ୍ଦୋଳନ ହେବ ବୋଲି ଚେତାବନୀ ଦେଇଛନ୍ତି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
