ବଲାଙ୍ଗୀର: ବଲାଙ୍ଗୀରେ ପୁଣି ପୋଲିସର ଥାର୍ଡ ଡିଗ୍ରୀ ନିର୍ଯାତନା । ଥାନାରେ 72 ବର୍ଷୀୟ ବୃଦ୍ଧଙ୍କୁ ଥାର୍ଡ଼ ଡିଗ୍ରୀ ନିର୍ଯାତନା । ଘରୁ ଉଠାଇ ନେଇ ଥାନାରେ ନିର୍ଦ୍ଧୁମ ମାଡ଼ ମାରିଥିବା ନେଇ ଅଭିଯୋଗ ହୋଇଛି । ବୃଦ୍ଧ ଜଣକ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି ହୋଇଛନ୍ତି । ବଲାଙ୍ଗୀର ଜିଲ୍ଲା ସଲେଭାଟା ଫାଣ୍ଡି ପୋଲିସ ନାମରେ ଏଭଳି ଏକ ସଙ୍ଗୀନ ଅଭିଯୋଗ ଆସିଛି ।
ସୂଚନା ଅନୁଯାୟୀ, ଏକ ଜମିଜମା ବିବାଦରେ ବଲାଙ୍ଗୀର ଜିଲ୍ଲା ସଲେଭାଟା ଫାଣ୍ଡି ପୋଲିସ ଲୋଇସିଂହା ଥାନା ଅନ୍ତର୍ଗତ ନୂଆପାଲି ଗ୍ରାମର 72 ବର୍ଷିୟ ବୃଦ୍ଧ ଅନିରୁଦ୍ଧ ସାହୁଙ୍କୁ ଘରୁ ଉଠାଇ ନେଇଥିଲା । ଥାନାରେ ବୃଦ୍ଧଙ୍କୁ ମାଡ଼ ମାରିବା ପରେ ବୃଦ୍ଧ ଜଣକ ଚେତାଶୂନ୍ୟ ହୋଇଯାଇଥିଲେ । ଏହାପରେ ପୋଲିସ ଅନିରୁଦ୍ଧଙ୍କୁ ବଲାଙ୍ଗୀର ଭୀମ ଭୋଇ ମେଡିକାଲ କଲେଜରେ ଭର୍ତ୍ତି କରିଥିଲା । ତେବେ ଅନିରୁଦ୍ଧଙ୍କୁ ଥାନାରେ ପୋଲିସ ନିର୍ଦ୍ଧୁମ ମାଡ଼ ମାରିଥିବା ନେଇ ପରିବାର ଲୋକେ ଅଭିଯୋଗ ଆଣିଛନ୍ତି । ଏନେଇ ବୃଦ୍ଧ ଜଣକ କହିଛନ୍ତି, " ପୋଲିସ ମତେ ଘରୁ ଉଠାଇ ଆଣି ଥାନାରେ ମାଡ଼ ମାରି ଡାକ୍ତରଖାନାରେ ଭର୍ତ୍ତି କରିଛନ୍ତି । ବୃଦ୍ଧଙ୍କ ସ୍ବାସ୍ଥ୍ୟବସ୍ଥା ସ୍ଥିର ଅଛି ।" ସେପଟେ ପୋଲିସ ପକ୍ଷରୁ ଏନେଇ କୌଣସି ପ୍ରତିକ୍ରିୟା ମିଳିପାରି ନାହିଁ ।
ଏହା ମଧ୍ୟ ପଢ଼ନ୍ତୁ: 3rd Degree Torture: ପୁଅ ପାଇଁ ବାପାକୁ ମାଡ଼, ଅଭିଯୋଗ ପରେ ଫାଣ୍ଡି ଅଧିକାରୀଙ୍କ ବଦଳି
ସୂଚନା ଅନୁସାରେ କିଛି ଦିନ ତଳେ ବନ୍ଧପଡ଼ା ଫାଣ୍ଡିରେ ଜଣେ ବ୍ୟକ୍ତିଙ୍କୁ ନିର୍ଦ୍ଧୁମ ମାଡ଼ର ଅଭିଯୋଗ ଆସିଥିଲା । ସେଥିରେ ଫାଣ୍ଡି ଅଧିକାରୀଙ୍କ ବଦଳି ମଧ୍ୟ ହୋଇଥିଲା । ସିଂହାମୁଣ୍ଡା ଗ୍ରାମର ସୁରେଶ ସାହୁଙ୍କ ପୁଅ ଏକ ଭୋଜିକୁ ଯାଇଥିବା ବେଳେ କୌଣସି କାରଣରୁ ବନ୍ଧପଡ଼ା ପୋଲିସ ତାକୁ ଅଟକ ରଖିଥିଲା । ସେପଟେ ଏହି ଖବର ପାଇବା ପରେ ବାପା ସୁରେଶ ସାହୁ ସମ୍ପୃକ୍ତ ପୋଲିସ ଫାଣ୍ଡିକୁ ଯାଇଥିଲେ ଏବଂ ସେଠି ତାଙ୍କ ପୁଅକୁ କାହିଁକି ଅଟକ ରଖିଛନ୍ତି ବୋଲି ପ୍ରଶ୍ନ କରିଥିଲେ ।
ସେପଟେ ପୋଲିସ ଫାଣ୍ଡି ଅଧିକାରୀ ସରୋଜ ରଥ ତାଙ୍କ ଉପରେ ରାଗି ଯାଇ ତାଙ୍କୁ ହାଜତ ଭିତରେ ଭର୍ତ୍ତି କରି ନିର୍ଦ୍ଧୁମ ମାଡ ମାରିଥିଲେ । ଯେଉଁଥିରେ ସୁରେଶ ସାହୁ ଗୁରୁତର ଆହତ ହେବା ପରେ ତାଙ୍କ ସମ୍ପର୍କୀୟ ତାଙ୍କୁ ବଲାଙ୍ଗୀର ଭୀମ ଭୋଇ ମେଡ଼ିକାଲକୁ ଆଣି ଚିକିତ୍ସା କରାଇଛନ୍ତି । ତେବେ ବାରମ୍ବାର ବଲାଙ୍ଗୀର ପୋଲିସ ନାମରେ ଏଭଳି ଅଭିଯୋଗ ଜନସାଧାରଙ୍କ ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି କରିଛି।
ଇଟିଭି ଭାରତ, ବଲାଙ୍ଗୀର
