ଅନୁଗୋଳ: ସୁଧୁରୁନି ଅନ୍ଧବିଶ୍ବାସ ପ୍ରତି ଲୋକଙ୍କ ମାନସିକତା । ଆଜି ବି ଯନ୍ତ୍ରଣାରୁ ଉପଶମ ପାଇବାକୁ ଲୋକେ ଡାକ୍ତରଙ୍କ ପାଖକୁ ନଯାଇ ଘରୋଇ ବଇଦ ଚିକିତ୍ସାକୁ ଆପଣାଉଛନ୍ତି । ପେଟରେ ଗରମ ଢାଳ ଚିକିତ୍ସା କରିବା ଜଣେ ମହିଳାଙ୍କୁ ମହଙ୍ଗା ପଡିଛି। ଢାଳର ଗରମ ଚେଙ୍କରେ ଜଣେ ମହିଳା ଗୁରୁତର ଭାବେ ଆହତ ହୋଇଛନ୍ତି । ଏଭଳି ଅଭାବନୀୟ ଘଟଣା ଘଟିଛି ଅନୁଗୋଳ ଜିଲ୍ଲା ସାନଦାଦର ଗାଁରେ । ଗୁରୁତର ମହିଳା ଜଣଙ୍କୁ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ହେଲେ ଭର୍ତ୍ତି କରାଯାଇଛି ।
ଗୁରୁତର ମହିଳା ଜଣକ ହେଲେ ସାନଦାଦର ଗାଁର ଝିଲ୍ଲୀ ନାୟକ । ତାଙ୍କର ପେଟ ଯନ୍ତ୍ରଣା ହେବାରୁ ସେ ଡାକ୍ତରଙ୍କ ପାଖକୁ ଯିବା ପରିବର୍ତ୍ତେ ଘରୋଇ ଚିକିତ୍ସା କରିଥିଲେ । ଗାଁ ନିକଟର ଜଣେ ଘରୋଇ ବଇଦକୁ ଡାକି ଚିକିତ୍ସା କରାଇଥିଲେ ।
ବଇଦ ଜଣଙ୍କ ମହିଳାଙ୍କ ପେଟରେ ଢାଳ ଚିକିତ୍ସା କରିଥିଲେ । ପେଟରେ ଏକ ଦୀପ ଜାଳି ତା ଉପରେ ଢାଳ ଘୋଡାଇ ଚିକିତ୍ସା କରାଯାଇଥିଲା । ତେବେ କୌଣସି କାରଣରୁ ଦୀପର ନିଆଁ ପେଟରେ ଲାଗିଯିବା ସହ ଢାଳଟି ଆଉ ବାହାରି ନଥିଲା । ଫଳରେ ମହିଳା ଜଣଙ୍କ ଗୁରୁତର ହୋଇଥିଲେ । ତାଙ୍କୁ ତୁରନ୍ତ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଅଣାଯାଇ ଚିକିତ୍ସା କରାଯାଉଥିବା ଜଣାପଡିଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
