ଅନୁଗୋଳ: ଶେଷ ହୋଇଛି ମା’ ଧନଦାତ୍ରୀଙ୍କ ପୂଜା । କୁମାର ପୂର୍ଣ୍ଣିମାଠାରୁ 11 ଦିନ ଧରି ଚାଲିଥିବା ଏହି ପୂଜାକୁ ବେଶ ଉତ୍କର୍ଷତାର ସହ ବିଭିନ୍ନ ପୂଜା ମଣ୍ଡପରେ ଆୟୋଜନ କରାଯାଇଥିବା ବେଳେ ଲୋକେ ମଧ୍ୟ ଉଠାଇଥିଲେ ଏହାର ବେଶ ଆନନ୍ଦ । ତେବେ ମଙ୍ଗଳବାର ଶେଷ ଦିନରେ କେମିତି ରହିଥିଲା ବିଭିନ୍ନ ପୂଜା ମଣ୍ଡପରେ ଲୋକଙ୍କ ପ୍ରତିକ୍ରିୟା, ତାହା ପଚାରି ବୁଝିଥିଲା ଇଟିଭି ଭାରତ ଟିମ୍ ।
11ଦିନ ଧରି ସହରରେ ଚାଲିଥିବା ଏହି ପୂଜାରେ ପ୍ରାୟ 17 କିଲୋମିଟର ପର୍ଯ୍ୟନ୍ତ ଲାଗିଥିଲା ଆଲୋକର ମାଳା । ମୋଟ 35ଟି ମଣ୍ଡପରେ ପୂଜା ପାଇଥିଲେ ମା’ ଧନଦାତ୍ରୀ । ମଙ୍ଗଳବାର ଶେଷ ସନ୍ଧ୍ୟାରେ ଲକ୍ଷାଧିକ ଲୋକଙ୍କ ଭିଡ ଦେଖିବାକୁ ମିଳିଥିବା ବେଳେ ପୁଣି ମା’ଙ୍କ ପୂଜା ପାଇଁ ବର୍ଷ ଅପେକ୍ଷା କରିବାକୁ ଥିବାରୁ ମଉଳି ଯାଇଥିଲା ଶ୍ରଦ୍ଧାଳୁଙ୍କ ମନ ।
ବୁଧବାର ସହରରେ ମା’ଙ୍କ ବିସର୍ଜନ ଉତ୍ସବର ଆୟୋଜନ କରାଯିବା ସହ ପାରମ୍ପରିକ ଆତସବାଜି ପ୍ରଦର୍ଶନୀ ପାଇଁ ସମସ୍ତ ପୂଜା ମଣ୍ଡପ ପ୍ରସ୍ତୁତ ରହିଥିବା ଜଣାଇଥିଲେ । ଲୋକଙ୍କ ଭିଡ ସହ ଶାନ୍ତି ଓ ଶୃଙ୍ଖଳାର ସହ ବିସର୍ଜନ ପର୍ବକୁ ଶେଷ କରିବା ପାଇଁ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି । ଏନେଇ ଜିଲ୍ଲା ପୋଲିସ ସହ ସ୍ବତନ୍ତ୍ର ସୁରକ୍ଷା ବାହିନୀ ମଧ୍ୟ ମୁତୟନ ରହିବେ । ପୁରା ସହରରେ 25 ପ୍ଲାଟୁନ ଫୋର୍ସର ଛାଉଣୀ ଲାଗିବାର ବ୍ୟବସ୍ଥା କରାଯାଇଛି । ତେବେ ଏହି ମେଲଣ ଶୋଭାଯାତ୍ରା ଅପରାହ୍ନରେ ଆରମ୍ଭ ହେବାକୁ ଥିବା ବେଳେ ରାତିରେ ଆତଦସବାଜି ପ୍ରତିଯୋଗିତା ହେବାର ଯୋଜନା ରହିଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
