ଭୁବନେଶ୍ବର: ଚେସ୍ ଏକ ଏପରି ଖେଳ ଯାହା ଦ୍ବାରା ଶାରୀରିକ ଓ ମାନସିକ ବ୍ୟାୟାମ ମଧ୍ୟ ହୋଇଥାଏ । ଫଳରେ ଖେଳୁଥିବା ବ୍ୟକ୍ତି ବେଶ ବୁଦ୍ଧିମାନ ହୋଇଥିବାର ଦେଖାଯାଏ । ଆନ୍ତର୍ଜାତିକ ଚେସ୍ ସଙ୍ଘ ଏହି ସମ୍ମାନଜନକ ଖେଳକୁ ବିଦ୍ୟାଳୟ ପାଠ୍ୟକ୍ରମରେ ସାମିଲ କରିବାକୁ ପରିକଳ୍ପନା କରିଛି । କେତେ ଗୁଡିଏ ଦେଶରେ ମଧ୍ୟ କାର୍ଯ୍ୟକାରୀ କରାଗଲାଣି ।
ତେବେ ଭାରତରେ ମଧ୍ୟ ଏହାକୁ ବିଦ୍ୟାଳୟ ପାଠ୍ୟକ୍ରମରେ ସାମିଲ କରିବା ନେଇ ସର୍ବଭାରତୀୟ ଚେସ ସଙ୍ଘ ନିଷ୍ପତ୍ତି ନେଇଛି। ଏହି କ୍ରମରେ ଦେଶର ପ୍ରଥମ ସ୍କୁଲ ଭାବେ କିସ୍ରେ ଏହି କାର୍ଯ୍ୟକ୍ରମକୁ ଆରମ୍ଭ କରାଯିବା ନେଇ ନିଷ୍ପତ୍ତି ହୋଇଛି। କିଟ୍ ଓ କିସ୍ରେ 30 ହଜାରରୁ ଉର୍ଦ୍ଧ୍ବ ଛାତ୍ରଛାତ୍ରୀ ଏହା ଦ୍ବାରା ଚେସ୍ ଖେଳରେ ନିଜର ପ୍ରତିଭାକୁ ଶାଣିତ କରିବା ସହ ନିଜର ମାନସିକ ବୁଦ୍ଧିମତାରେ ମଧ୍ୟ ବିକାଶ କରିପାରିବେ । ଏହା କହିଛନ୍ତି କିଟ୍ ଓ କିସ୍ର ପ୍ରତିଷ୍ଠାତା ଅଚ୍ୟୁତ ସାମନ୍ତ ।
ଆସନ୍ତା ଶିକ୍ଷାବର୍ଷ ଠାରୁ କିଟ୍ ଓ କିସ୍ ସମସ୍ତ ପ୍ରକାର ଭିତ୍ତିଭୂମି ଯୋଗାଇଦେବାକୁ ଯୋଜନା କରିଛି ଓ ଆନ୍ତର୍ଜାତିକ ଚେସ ଫେଡରେସନ ଏହାକୁ ପରିଚାଳନା କରିବ ବୋଲି ସେ କହିଛନ୍ତି । ଏହି ଉପଲକ୍ଷେ ଆୟୋଜିତ ସାମ୍ବାଦିକ ସମ୍ମିଳନୀରେ ଭାରତୀୟ ଚେସ୍ ସଙ୍ଘର ସଭାପତି ସଞ୍ଜୟ କପୁର ଏହା ପିଲାମାନଙ୍କ ବୌଦ୍ଧିକ ବିକାଶରେ ସାହାଯ୍ୟ କରିବା ସହ ଆମକୁ ଚେସ୍ରେ ବିଶ୍ବସ୍ତରୀୟ ପ୍ରତିଯୋଗୀ ମିଳିବାରେ ସାହାଯ୍ୟ କରିବ ବୋଲି କହିଛନ୍ତି । କ୍ରିକେଟ ଭଳି ଚେସ୍ର ଜାତୀୟ ଏକାଡେମୀ କରବାକୁ ସଙ୍ଘ ନିଷ୍ପତ୍ତି ନେଇଥିବା ବେଳେ ଓଡିଶାକୁ ଏ କ୍ଷେତ୍ରରେ ପ୍ରାଧାନ୍ୟ ଦିଆଯିବ ବୋଲି ସେ କହିଛନ୍ତି ।
ରାଜ୍ୟର ଅନ୍ତର୍ଜାତୀୟ ଚେସ୍ ଖେଳାଳି ପଦ୍ମିନୀ ରାଉତ ଏହି ପ୍ରୟାସକୁ ଖୁବ ସୁନ୍ଦର କହିବା ସହ ଆଗାମୀ ଦିନରେ ରାଜ୍ୟ ତଥା ଦେଶ ପାଇଁ ସୁନାମ ଆଣିବାରେ ସହାୟକ ହେବ ବୋଲି କହିଛନ୍ତି ।
ଭୁବନେଶ୍ବରରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ