ନୂଆଦିଲ୍ଲୀ: ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(BCCI)ର ବଡ ନିଷ୍ପତ୍ତି । ଘରୋଇ କ୍ରିକେଟରଙ୍କ ମ୍ୟାଚ୍ ଫି ବଢାଇଲା ବୋର୍ଡ । ମହାମାରୀ COVID-୧୯ ଯୋଗୁଁ ୨୦୨୦-୨୦୨୧ ବର୍ଷର ଭାରତୀୟ ଘରୋଇ କ୍ରିକେଟ କ୍ୟାଲେଣ୍ଡର ପ୍ରଭାବିତ ହୋଇଛି । ସେଥିପାଇଁ ୨୦୧୯-୨୦୨୦ ଘରୋଇ ସିଜିନରେ ଅଂଶଗ୍ରହଣ କରିଥିବା କ୍ରିକେଟର କ୍ଷତିପୂରଣ ସ୍ବରୂପ ୫୦ ପ୍ରତିଶତ ଅଧିକ ମ୍ୟାଚ୍ ଫି ପାଇବେ । ଏନେଇ ବୋର୍ଡ ସମ୍ପାଦକ ଜୟ ଶାହା ଘୋଷଣା କରିଛନ୍ତି ।
ସୋମବାର ବସିଥିବା BCCI ର ଆପେକ୍ସ କାଉନସିଲ ବୈଠକରେ ଗୁରୁତ୍ବପୂର୍ଣ୍ଣ କ୍ଷତିପୂରଣ ପ୍ୟାକେଜ ନେଇ ଆଲୋଚନା ହେବାପରେ ଏହି ନିଷ୍ପତ୍ତି ହୋଇଛି । ୪୦ରୁ ଅଧିକ ମ୍ୟାଚ ଖେଳିଥିବା ବରିଷ୍ଠ ଖେଳାଳିଙ୍କୁ ୬୦,୦୦୦ ଟଙ୍କା, ୨୩ ବର୍ଷରୁ କମ ଖେଳାଳିଙ୍କୁ ୨୫,୦୦୦, ୧୯ ବର୍ଷରୁ କମ ଖେଳାଳିଙ୍କୁ ୨୦,୦୦୦ ଟଙ୍କା ମିଳିବ ।
BCCI ପକ୍ଷରୁ ଗଠିତ କାର୍ଯ୍ୟକାରୀ କମିଟି ମୋଟ୍ ମ୍ୟାଚ୍ ଫିର ୫୦ ପ୍ରତିଶତ କ୍ଷତିପୂରଣ ପ୍ୟାକେଜ୍ ନେଇ ବିଚାର କରିବେ । ଏହି କମିଟିରେ ରହିଛନ୍ତି ପୂର୍ବତନ ଭାରତୀୟ କ୍ୟାପଟେନ ମହମ୍ମଦ ଆଝାରୁଦ୍ଦିନ, ସନ୍ତୋଷ ମେନନ, ଜୟଦେବ ଶାହ, ଯୁଧବୀର ସିଂହ, ରୋହନ ଜେଟଲି, ଅଭିଶେକ ଡାଲମିୟା ଓ ଦେବଜିତ ସାଇକିଆ ।
ବ୍ୟୁରୋ ରିପୋର୍ଟ, ଇଟିଭି ଭାରତ
