ନୂଆଦିଲ୍ଲୀ: ଆଇସିସି ଦିନିକିଆ ବିଶ୍ବକପ୍ ୨୦୨୩ ପରାଜୟ ପରେ ଟି୨୦ ବିଶ୍ବକପ୍ ୨୦୨୪ ପାଇଁ ପ୍ରସ୍ତୁତି ଆରମ୍ଭ କରିଛି ଟିମ୍ ଇଣ୍ଡିଆ । ବାରମ୍ବାର ଆଇସିସି ଟ୍ରଫି ସ୍ବପ୍ନ ଧୂଳିସାତ ହେବାପରେ ଏଥର ପୁରୁଣା ଭୁଲ ନଦୋହରାଇ କିପରି ସଠିକ ଦଳ ଚୟନ ହେବ ଓ ସଠିକ ରଣନୀତି ପ୍ରସ୍ତୁତ ହେବ, ସେନେଇ ଗୁରୁତ୍ବ ଦେଇଛି ବିସିସିଆଇ । ହେଲେ ଏହି ବଡ଼ ଆଇସିସି ଇଭେଣ୍ଟରେ ଦଳର ନେତୃତ୍ବ କିଏ ନେବ, ସେନେଇ ଦ୍ବନ୍ଦ୍ବରେ ବିସିସିଆଇ । କାରଣ ଏହି ରେସ୍ରେ ଏକାଧିକ ଷ୍ଟାର ଅଛନ୍ତି । ରୋହିତ ଶର୍ମାଙ୍କ ସହିତ ହାର୍ଦ୍ଦିକ ପାଣ୍ଡ୍ୟା, ସୂର୍ଯ୍ୟକୁମାର ଯାଦବ, କେଏଲ୍ ରାହୁଲ ମଧ୍ୟ ଅଧିନାୟକ ପଦ ପାଇଁ ଦାବିଦାର ଥିବା ଚର୍ଚ୍ଚା ହେଉଛି । କିନ୍ତୁ ଏସବୁ ଚର୍ଚ୍ଚା ଭିତରେ ବିସିସିଆଇର ପୂର୍ବତନ ଅଧ୍ୟକ୍ଷ ସୌରଭ ଗାଙ୍ଗୁଲିଙ୍କ ବଡ଼ ବୟାନ ସାମ୍ନାକୁ ଆସିଛି ।
ଗାଙ୍ଗୁଲି ଆଗାମୀ ଟି୨୦ ବିଶ୍ବକପ୍ରେ ଭାରତୀୟ ଅଧିନାୟକ ଭାବେ ରୋହିତଙ୍କୁ ପ୍ରଥମ ପସନ୍ଦ ଭାବେ ବାଛିଛନ୍ତି । ଗାଙ୍ଗୁଲି କହିଛନ୍ତି, "ଆଗାମୀ ଟି୨୦ ବିଶ୍ବକପ୍ରେ ଅନେକ ଖେଳାଳିଙ୍କୁ ଅଧିନାୟକ କରିବା ନେଇ ଚର୍ଚ୍ଚା ହେଉଛି । କିନ୍ତୁ କେବଳ ରୋହିତ ଶର୍ମାଙ୍କୁ ହିଁ ଅଧିନାୟକ ଦାୟିତ୍ବ ଦେବା ଉଚିତ୍ । ବର୍ତ୍ତମାନ ଦଳରେ ଅଧିନାୟକ ପଦ ପାଇଁ ରୋହିତଙ୍କ ଭଳି ଅଭିଜ୍ଞ ଖେଳାଳି ଆଉ କେହି ନୁହଁନ୍ତି । ନିକଟରେ ରୋହିତଙ୍କ ନେତୃତ୍ବରେ ଦିନିକିଆ ବିଶ୍ବକପ୍ରେ ଲଗାତର ୧୦ଟି ମ୍ୟାଚ୍ ଟିମ୍ ଇଣ୍ଡିଆ ଜିତିଲା । ଫାଇନାଲ ହାରିଛି ସତ, ହେଲେ ଦଳ ଖରାପ ଖେଳିନାହିଁ । ହୁଏତ ସେହିଦିନ (ଫାଇନାଲ୍) ଟିମ୍ ଇଣ୍ଡିଆ ପାଇଁ ଭଲ ସମୟ ନଥିଲା । ଏପରିକି ଟସ୍ ମଧ୍ୟ ଦଳ ସପକ୍ଷରେ ଯାଇନଥିଲା । ସେଥିପାଇଁ ଫାଇନାଲରେ ହାରିଥିଲା ଭାରତ ।"
ପ୍ରକାଶ ଥାଉ, ଦିନିକିଆ ବିଶ୍ବକପ୍ ୨୦୨୩ ପରଠାରୁ ରୋହିତ ଶର୍ମା ବିଶ୍ରାମ ନେଇଛନ୍ତି । ଏନେଇ ଗାଙ୍ଗୁଲି କହିଛନ୍ତି, "ଯେତିକି ବିଶ୍ରାମ ନେବା କଥା ନିଅନ୍ତୁ । କିନ୍ତୁ ଟି୨୦ ବିଶ୍ବକପ୍ରେ ରୋହିତ ହିଁ ଟିମ୍ର ନେତୃତ୍ବ ନେବା ଉଚିତ୍ ।" ରୋହିତ ଶର୍ମା ଓ ବିରାଟ କୋହଲିଙ୍କୁ ଟି୨୦ରୁ ବିଶ୍ରାମ ଦେବା ନେଇ ଚାଲିଥିବା ଚର୍ଚ୍ଚା ଉପରେ ଗାଙ୍ଗୁଲି କହିଛନ୍ତି, "ଏ କଥା ମୁଁ ଶୁଣୁଛି । ହେଲେ ଏହା ଉଚିତ୍ ନୁହେଁ । ଉଭୟ ଏବେ ଭଲ ଫର୍ମରେ ଅଛନ୍ତି । ରୋହିତ ଓ ବିରାଟଙ୍କ ପରି ମ୍ୟାଚ୍ ୱିନର ଆମକୁ ଆଜି ଦିନରେ ମିଳିବେ ନାହିଁ । ତେଣୁ ସେମାନେ ଆଗାମୀ ଟି୨୦ ବିଶ୍ବକପ୍ ଖେଳିବା ଉଚିତ୍ । ଏହାଦ୍ବାରା ଟୁର୍ଣ୍ଣାମେଣ୍ଟରେ ଆମ ଦଳର ଫାଇଦା ହେବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
