ନୂଆଦିଲ୍ଲୀ: ନ୍ୟୁୟର୍କରେ ଗାନ୍ଧିଜୀଙ୍କ ପ୍ରତିମୂର୍ତ୍ତି ଭାଙ୍ଗିଲେ ଦୁର୍ବୃତ୍ତ (Mahatma Gandhi statue vandalized in New York) । ଗତ ଦୁଇ ସପ୍ତାହ ମଧ୍ୟରେ ନ୍ୟୁୟର୍କରେ ଏହା ଦ୍ବିତୀୟ ଘଟଣା । କୁଇନ୍ସ ସିଟିର ଏକ ମନ୍ଦିର ବାହାରେ ଥିବା ଗାନ୍ଧିଜୀଙ୍କ ପ୍ରତିମୂର୍ତ୍ତିକୁ ୬ ଜଣ ଦୁର୍ବୃତ୍ତ ଭାଙ୍ଗି ଚୁର୍ମାର୍ କରିଛନ୍ତି । ଖାଲି ସେତିକି ନୁହେଁ ଦୁର୍ବୃତ୍ତମାନେ ପ୍ରତିମୂର୍ତ୍ତି ଥିବା ସ୍ଥାନରେ ପେଣ୍ଟ ସାହାଯ୍ୟରେ ଅପଶବ୍ଦ ଲେଖିବାକୁ ମଧ୍ୟ ପଛାଇ ନଥିଲେ ।
ଦୁଇ ସପ୍ତାହ ପୂର୍ବରୁ ଅଗଷ୍ଟ ୩ ତାରିଖରେ ମଧ୍ୟରେ ନ୍ୟୁୟର୍କରେ ଏଭଳି ଘଟଣା ଦେଖିବାକୁ ମିଳିଥିଲା । ଦକ୍ଷିଣ ରିଚ୍ମଣ୍ଡ ହିଲ୍ରେ ଥିବ ତୁଳସୀ ମନ୍ଦିର ସମ୍ମୁଖରେ ଥିବା ଗାନ୍ଧଜୀଙ୍କ ପ୍ରତିମୂର୍ତ୍ତୀକୁ ଭାଙ୍ଗିଥିଲେ ଦୁର୍ବୃତ୍ତ । ନ୍ୟୁୟର୍କରେ ଧାର୍ମିକ ଘୃଣାଭାବ ତିଆରି କରିବା ଉଦ୍ଦେଶ୍ୟରେ ଏଭଳି କରାଯାଉଥିବା ସନ୍ଦେହ କରାଯାଉଛି । ପ୍ରବାସୀ ଭାରତୀୟ ଅସନ୍ତୋଷ ଜାହିର କରିଛନ୍ତି ।
ଗାନ୍ଧିଜୀଙ୍କ ପ୍ରତିମୂର୍ତ୍ତିକୁ ଆକ୍ରମଣ କରୁଥିବା ଦୁର୍ବୃତ୍ତଙ୍କ ବୟସ ୨୫ରୁ ୩୦ ବର୍ଷ ହେବାନେଇ ଆକଳନ କରାଯାଉଛି । ଗାନ୍ଧିଜୀଙ୍କ ପ୍ରତିମୂର୍ତ୍ତି ଭାଙ୍ଗିବାକୁ ନେଇ ଦୁଃଖ ପ୍ରକାଶ କରିଛନ୍ତି ତୁଳସୀ ମନ୍ଦିର ପ୍ରତିଷ୍ଠାତା ଲଖ୍ରାମ ମହାରାଜ । ସେପଟେ ନ୍ୟୁୟର୍କ ସଂସଦ ସଦସ୍ୟ ଜେନିଫର ରାଜକୁମାର ଏହି ଘଟଣାର ତୀବ୍ର ନିନ୍ଦା କରିଛନ୍ତି ।
ଜେନିଫର ରାଜକୁମାର ଟ୍ବିଟ୍ କରି କହିଛନ୍ତି, "ଦ୍ବିତୀୟ ଥର ପାଇଁ ତୁଳସୀ ମନ୍ଦିର ସମ୍ମୁଖରେ ଥିବା ଗାନ୍ଧୀଙ୍କ ପ୍ରତିମୂର୍ତ୍ତି ଭଙ୍ଗା ଯାଇଛି । ଏଥର ସମ୍ପୂର୍ଣ୍ଣ ରୂପେ ପ୍ରତିମୂର୍ତ୍ତି ନଷ୍ଟ କରି ଦିଆଯାଇଛି । ଏହି ଭଳି ଭାବରେ ଘୃଣାଭାବକୁ ଜନ୍ମ ଦେବାକୁ ଚେଷ୍ଟା କରାଯାଉଛି । ଏଥିରେ ସେମାନଙ୍କୁ ସଫଳ ହେବାକୁ ଦିଆଯିବ ନାହିଁ ବୋଲି ମୋର ଆଶା ।"
