ଆବୁଧାବି: ସୋସିଆଲ ମିଡିଆରେ ଧର୍ମକୁ ଅପମାନ କରିବା ପଡିଛି ମହଙ୍ଗା । ଦୁବାଇରେ ରହୁଥିବା ଜଣେ ପ୍ରବାସୀ ଭାରତୀୟ ସୋସିଆଲ ମିଡିଆରେ ଇସଲାମ ଧର୍ମକୁ ନିନ୍ଦା କରିବା ସହ କିଛି ଦ୍ବିଅର୍ଥବୋଧକ ଶବ୍ଦ ଲେଖିଥିବା ଦେଖିବାକୁ ମିଳିଥିଲା । ଏହା ଇସଲାମ ଧର୍ମକୁ ଅପମାନିତ କରିଥିବାରୁ ସମ୍ପୃକ୍ତ ପ୍ରବାସୀ ଭାରତୀୟଙ୍କୁ ଗିରଫ କରିଛି ଦୁବାଇ ପୋଲିସ ।
ସୂଚନା ଅନୁଯାୟୀ କର୍ଣ୍ଣାଟକ ନିବାସୀ ରାକେଶ ବି କିଟ୍ଟୁରମଥ ଦୁବାଇର ‘ଏମିରିଲ ସର୍ଭିସେସ’ ନାମକ ଇଣ୍ଟିଗ୍ରେଟେଡ ଫାସିଲିଟି ମ୍ୟାନେଜମେଣ୍ଟରେ ଟିମ ଲିଡର ଭାବେ କାର୍ଯ୍ୟରତ । କୋରୋନା ସମ୍ପର୍କିତ ଏକ ଫେସବୁକ ପୋଷ୍ଟରେ ଉତ୍ତର ରଖି ସେ କିଛି ଇସଲାମ ଧର୍ମକୁ ଅପମାନ କରିବା ପରି ଶବ୍ଦର ବ୍ୟବହାର କରିଥିଲେ । ଯାହା କିଛି ଇସଲାମ ଧର୍ମୀ ଯୁବକ ତୀବ୍ର ନିନ୍ଦା କରିବା ସହ ଏହି ଖବର ସୋସିଆଲ ମିଡିଆରେ ନିଆଁ ପରି ବ୍ୟାପିଥିଲା ।
ଏନେଇ ଖବର ପାଇବା ପରେ ଏମିରିଲ ସର୍ଭିସେସର ସିଇଓ ଷ୍ଟୁଆର୍ଟ ହାରିସନ ପ୍ରତିକ୍ରିୟା ଦେଇ କହିଥିଲେ କି ରାକେଶଙ୍କ ଏପରି ବ୍ୟବହାର ପାଇଁ କମ୍ପାନୀରେ କୌଣସି ସ୍ଥାନ ନାହିଁ । ତାଙ୍କ କାର୍ଯ୍ୟକଳାପ କମ୍ପାନୀ ଦ୍ବାରା ତୀବ୍ର ନିନ୍ଦିତ । ତେଣୁ ତାଙ୍କୁ ଚାକିରୀରୁ ବହିଷ୍କୃତ କରାଯିବା ସହ ତାଙ୍କୁ ଦୁବାଇ ପୋଲିସକୁ ହସ୍ତାନ୍ତର କରାଯାଇଛି ।
ସେ ଏହା ମଧ୍ୟ କହିଛନ୍ତି କମ୍ପାନୀର ସୋସିଆଲ ମିଡିଆକୁ ନେଇ କିଛି ନିର୍ଦ୍ଦିଷ୍ଟ ନିୟମ କାନୁନ ରହିଛି । ଏଥିସହ କମ୍ପାନୀ ସବୁବେଳେ ନିରପେକ୍ଷ ମତ ଉପରେ ବିଶ୍ବାସ କରି ଆସିଛି । ଏଥିରେ କୌଣସି ଧର୍ମକୁ ଅପମାନ ଓ ବିରୋଧାଭାଷକୁ ଗ୍ରହଣ କରାଯିବ ନାହିଁ ।