କାବୁଲ: ଆଫଗାନିସ୍ତାନ ରାଜଧାନୀ କାବୁଲକୁ କାବୁ କରି ନେଇଛି ତାଲିବାନ ଆତଙ୍କୀ ସଂଘଠନ । ଜୀବନ ବଞ୍ଚାଇବାକୁ କାବୁଲରେ ଚାଲିଛି ସଂଘର୍ଷ । ଆଫଗାନିସ୍ତାନକୁ ତାଲିବାନ ଦଖଲ କରି ନେବାପରେ ଦେଶ ଛାଡି ପଳାଇଛନ୍ତି ରାଷ୍ଟ୍ରପତି ଅସରଫ ଘନି । ସାଙ୍ଗରେ ୪ଟି କାର, ଗୋଟିଏ ହେଲିକପ୍ଟର ଓ ନଗଦ ଟଙ୍କା ସହିତ ଦେଶ ଛାଡି ପଳାଇଥିବା କହିଛି ଋଷ ଦୂତାବାସ ।
ଶାସନ ପତନ ହେଲା ପରେ ଘନି ଏପରି କରିଛନ୍ତି । ୪ଟି କାର ଟଙ୍କାରେ ଭର୍ତ୍ତି ହୋଇଥିଲା । କିଛି ଟଙ୍କା ହେଲିକପ୍ଟରରେ ଭର୍ତ୍ତି କରିବାରୁ ଚେଷ୍ଟା କରିଥିଲେ ମାତ୍ର ତାହା ସମ୍ଭବ ହୋଇନଥିଲା ଫଳରେ କିଛି ଟଙ୍କା ରନୱେରେ ଛାଡି ଦେଇଥିବା କହିଛି ଋଷ ଦୂତାବାସ ।
ପ୍ରକାଶ ଥାଉ କି, ରବିବାର ତାଲିବାନମାନେ କାବୁଲ କବଜା କରିବା ପରେ ରାଷ୍ଟ୍ରପତି ଭବନରେ ପ୍ରବେଶ କରିଥିଲେ । ଏହା ପୂର୍ବରୁ ରାଷ୍ଟ୍ରପତି ଘନି ଦେଶ ଛାଡି ଦେଇଥିଲେ । ଏହା ପରେ ସେ ସୋସିଆଲ ମିଡିଆରେ କହିଥିଲେ ଯେ, ବର୍ତ୍ତମାନ ଠାରୁ ଆଫଗାନିସ୍ତାନ ଲୋକଙ୍କ ସମ୍ମାନ, ଧନ ଏବଂ ରକ୍ଷା ପାଇଁ ତାଲିବାନ ଦାୟୀ ରହିବ ।
ସେ ଆହୁରି କହିଥିଲେ, ଯଦି ସେ ଆଫଗାନିସ୍ତାନରେ ରହିଥାନ୍ତେ ବହୁ ସଂଖ୍ୟାକ ଲୋକ ଦେଶ ପାଇଁ ତାଲିବାନ ସହିତ ଲଢ଼େଇ କରିଥାନ୍ତେ । ଏପରି ପରିସ୍ଥିତିରେ ଅନେକ ଲୋକ ପ୍ରାଣ ହରାଇଥାନ୍ତେ । କାବୁଲ ସହର ମଧ୍ୟ ସମ୍ପୂର୍ଣ୍ଣ ଧ୍ବଂସ ହୋଇଯାଇଥାନ୍ତା । ଆଫଗାନିସ୍ତାନରେ ରକ୍ତପାତ ପରିସ୍ଥିତି ସୃଷ୍ଟି ନ କରିବାକୁ ସେ ଦେଶ ଛାଡ଼ି ପଳାଇ ଆସିଛନ୍ତି ବୋଲି ଫେସବୁକ ପୋଷ୍ଟ ଜରିଆରେ ଲେଖିଛନ୍ତି ଘନି ।
ଆମେରିକାର ସେନା ପ୍ରତ୍ୟାହାର ପରେ ତାଲିବାନ ଆଫଗାନିସ୍ତାନରେ ଆତଙ୍କ ସୃଷ୍ଟି କରିଛି । ତାଲିବାନ କାନ୍ଦାହାର, ଗଜନି ସମେତ ସମସ୍ତ ବଡ ସହରକୁ କାବୁ କରି କାବୁଲକୁ ଅକ୍ତିଆର କରିଛି । ତାଲିବାନ ମାତ୍ର ୨୨ ଦିନ ମଧ୍ୟରେ କାବୁଲକୁ ନିଜ ଅଧୀନକୁ ନେଇଛି ।
@ANI
