ହଂକଂ: ରବିବାର ଚାଇନାର ଉଇଘୁର ସଂଖ୍ୟାଲଘୁଙ୍କ ସମର୍ଥନରେ କରାଯାଉଥିବା ଏକ ରାଲିରେ ହଂକଂ ପୋଲିସ ଓ ବିକ୍ଷୋଭକାରୀଙ୍କ ମଧ୍ୟରେ ସଂଘର୍ଷ ଘଟିଛି । ଏହି ଶୋଭାଯାତ୍ରାରେ ଚୀନ ପତାକାକୁ ପୋଡିବାକୁ ଚେଷ୍ଟା କରୁଥିବା ଦୁଇଜଣଙ୍କୁ ପୋଲିସ ଗିରଫ କରିଛି । ବିକ୍ଷୋଭକାରୀମାନେ ଜିନଜିୟାଙ୍ଗର ସ୍ବାଧୀନତା ଆନ୍ଦୋଳନର ପତାକା ଧରିଥିବା ଦେଖିବାକୁ ମିଳିଛି ।
ଜିନଜିୟାଙ୍ଗ ପ୍ରଦେଶରେ ବସବାସ କରୁଥିବା ଉଇଘୁର ଓ ଅନ୍ୟ ମୁସଲିମ ସଂଖ୍ୟାଲଘୁମାନଙ୍କ ବିରୋଧରେ ଚୀନ କାର୍ଯ୍ୟାନୁଷ୍ଠାନ ଗ୍ରହଣ କରୁଛି । ଏପରିକି ସେମାନଙ୍କୁ ଶିବିରରେ ବନ୍ଦୀ କରି ରଖାଯାଉଥିବା ଅଭିଯୋଗ ହୋଇଛି । ଫଳରେ ଏହା ବିରୋଧରେ ହଂକଂରେ ସ୍ବର ଉତ୍ତୋଳନ କରାଯାଉଛି ।
ଏହି ଘଟଣାରେ ଚୀନ କୌଣସି ରାଜନୈତିକ କଏଦୀମାନଙ୍କୁ ରଖି ନଥିବା ଚୀନ ମୁଖପାତ୍ର ପ୍ରକାଶ କରିଛନ୍ତି । ଏହା ସହ ଚୀନ ଧାର୍ମିକ ଚରମପନ୍ଥୀଙ୍କ ବିରୋଧରେ ଶିକ୍ଷା ପ୍ରଦାନ କରୁଥିବା ସେ ଉଲ୍ଲେଖ କରିଛନ୍ତି । ସୂଚନାଯୋଗ୍ୟ, ଚୀନର ଅର୍ଦ୍ଧ ସ୍ବଂୟଶାସିତ ପ୍ରଦେଶ ଭାବରେ ହଂକଂ ପରିଚାଳିତ ହେଉଛି ।