ପୁରୀ: ଆସନ୍ତାକାଲି ପିପିଲିରେ ଉପନିର୍ବାଚନ ନେଇ ଭୋଟ ଗ୍ରହଣ ଅନୁଷ୍ଠିତ ହେବ। ତେବେ ଏହା ପୂର୍ବରୁ ପୁରୀ ଜିଲାପାଳ ସମର୍ଥ ବର୍ମା ପିପିଲି ଯାଇ ବିଭିନ୍ନ ସ୍ଥିତି ଅନୁଧ୍ୟାନ କରିଛନ୍ତି । କିଭଳି ମୁକ୍ତ ଓ ଅବାଧ ନିର୍ବାଚନ ଅନୁଷ୍ଠିତ ହୋଇ ପାରିବ ସେ ନେଇ ସମସ୍ତ ବ୍ୟବସ୍ଥାକୁ ସେ ଅନୁଧ୍ୟାନ କରିଛନ୍ତି ଜିଲ୍ଲାପାଳ।
ଜିଲ୍ଲାପାଳଙ୍କ ସୂଚନା ଅନୁଯାୟୀ, ସବୁ ମତଦାନ କେନ୍ଦ୍ରରେ ପୋଲିଂ ପାର୍ଟି ପହଞ୍ଚିବା ସହ EVM ମେସିନ ଓ ଅନ୍ୟାନ୍ୟ ସରଞ୍ଜାମ ତଦାରଖ କରୁଛନ୍ତି । ସେହିପରି ସେକ୍ଟର ଅଫିସରମାନେ ବିଭିନ୍ନ ବୁଥ ପରଦର୍ଶନ କରି ମତଦାନ ପୂର୍ବରୁ ସମସ୍ତ ଆନୁସଙ୍ଗିକ ବ୍ୟବସ୍ଥା ଶେଷ କରିବାକୁ ପ୍ରୟାସ ଜାରି ରଖିଛନ୍ତି । ମତଦାନ ପୂର୍ବରୁ ଆଜି ବୁଥ ଗୁଡିକୁ ସାନିଟାଇଜ କରାଯାଉଛି ।
ନିର୍ବାଚନ ମଣ୍ଡଳୀରେ ଚିହ୍ନଟ ହୋଇଥିବା ମୋଟ 201ଟି ଉତ୍ତେଜନାପ୍ରବଣ ବୁଥରୁ 175 ଟିରେ ୱେବ-କାଷ୍ଟିଂର ବ୍ୟବସ୍ଥା ହୋଇଛି । ଉକ୍ତ ବୁଥର ମତଦାନ ପ୍ରକ୍ରିୟାର ସିଧା ପ୍ରସାରଣ ନିର୍ବାଚନ ଆୟୋଗଙ୍କ ଓ୍ବେବସାଇଟରେ ଯେ କେହି ବି ଦେଖିପାରିବେ । ସେହିପରି ସମ୍ବେଦନଶୀଳ ଚିହ୍ନଟ ହୋଇଥିବା ବୁଥଗୁଡ଼ିକରେ ମାଇକ୍ରୋ ଅବଜରଭର, ଭିଡିଓ ଗ୍ରାଫିର ମଧ୍ୟ ବ୍ୟବସ୍ଥା କରାଯାଇଛି। ସୁରକ୍ଷା ଓ ଶାନ୍ତି ବଜାର ରଖିବା ପାଇଁ ଯଥେଷ୍ଟ ସୁରକ୍ଷା ବଳ ମଧ୍ୟ ମୁତୟନ ହୋଇଛନ୍ତି । ଶାନ୍ତିପୂର୍ଣ୍ଣ ଓ ଅବାଧ ମତଦାନ ପାଇଁ ପ୍ରଶାସନିକ ସ୍ତରରେ ସମସ୍ତ ବ୍ୟବସ୍ଥା ସରିଛି । ଭୋଟରମାନେ ନିର୍ଭୟରେ ଯାଇ ନିଜର ଗଣତାନ୍ତ୍ରିକ ଅଧିକାରକୁ ସାବ୍ୟସ୍ତ ପାଇଁ ଭୋଟ ଦେବା ଉଚିତ ବୋଲି ପୁରୀ ଜିଲ୍ଲାପାଳ କହିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
