ପୁରୀ: ରଖେ ହରି ତ ମାରେ କିଏ, ଏହାର ଜ୍ବଳନ୍ତ ଉଦାହରଣ ପୁରୀ ଜିଲ୍ଲା ସୁଆର ସାହିରେ ଦେଖିବାକୁ ମିଳିଛି । 50ଫୁଟରୁ ଗଭୀର କୂଅ ଭିତରକୁ ଖସିପଡିଥିଲେ ଜଣେ 74ବର୍ଷୀୟା ବୃଦ୍ଧା । କିନ୍ତୁ ସୁରକ୍ଷିତ ଭାବେ ତାଙ୍କୁ ଉଦ୍ଧାର କରାଯାଇଛି । ଶୁଣିଲେ ଆଶ୍ଚର୍ଯ୍ୟ ଲାଗିଲେ ବି କଥାଟା ସତ । ସୂଚନା ମୁତାବକ ଗତକାଲି ଅପରହ୍ନ ସମୟରେ ହରପ୍ରିୟା ମହାପାତ୍ର କୂଅ ଉପରେ ପଡ଼ିଥିବା ଜାଲି ଉପରେ ବସିଥିବାବେଳେ ଭିତରକୁ ପଡ଼ିଯାଇଥିଲେ । ଏନେଇ ତାଙ୍କ ପୁଅ ଅଗ୍ନିଶମ ବାହିନୀକୁ ଯୋଗାଯୋଗ କରିଥିଲେ ।
ଯାହାକୁ ରଖିବେ ଅନନ୍ତ: 50ଫୁଟ ଗଭୀର କୂଅରୁ ସୁରକ୍ଷିତ ଉଦ୍ଧାର ହେଲେ ବୃଦ୍ଧା
ଖବର ପାଇ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ବୃଦ୍ଧାଙ୍କୁ ଉଦ୍ଧାର କରିଥିଲେ । ଆହତ ବୃଦ୍ଧାଙ୍କୁ ପ୍ରଥମେ ପୁରୀ ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ମୁଣ୍ଡ ବୁଲାଇ ଦେବାରୁ ସେ କୂଅରେ ପଡ଼ିଯାଇଥିବା ଅନୁମେୟ ହେଉଛି । ବର୍ତ୍ତମାନ ବୃଦ୍ଧା ଜଣକ ସୁସ୍ଥ ଥିବା ଜଣାପଡ଼ିଛି । ତେବେ ଏତେ ବଡ଼ କୂଅ ଭିତରେ ଖସିପଡ଼ି ମଧ୍ୟ ବୃଦ୍ଧାଙ୍କୁ ସୁରକ୍ଷିତ ଭାବେ ଉଦ୍ଧାର କରିବାରେ ଅଗ୍ନିଶମ ବିଭାଗ ସଫଳ ହୋଇଛି ।
