ସୁନ୍ଦରଗଡ: ଜିଲ୍ଲାର ୪ଟି ଜିଲ୍ଲାରେ ଆଜି ତ୍ରିସ୍ତରୀୟ ପଞ୍ଚାୟତ ନିର୍ବାଚନର ପ୍ରଥମ ପର୍ଯ୍ୟାୟ ମତଦାନ ଶେଷ ହୋଇଛି । ସୁନ୍ଦରଗଡ ଜିଲ୍ଲାର ବଡଗାଁ , କୁଆଁରମୁଣ୍ଡା , ଲାଠିକଟା ଓ ବଣାଇଗଡରେ ଭୋଟ ଗ୍ରହଣ ହୋଇଛି । ୪ଟି ବ୍ଲକର 66ଟି ଗ୍ରାମ ପଞ୍ଚାୟତର 873ଟି ୱାର୍ଡ ସହ ସମିତି ସଭ୍ୟ ଓ 9 ଟି ଜିଲ୍ଲା ପରିଷଦ ଆସନ ପାଇଁ ଭୋଟର ମାନେ ସେମାନଙ୍କ ମତ ସାବ୍ୟସ୍ତ କରିଛନ୍ତି ।
ତେବେ ଏହି ନିର୍ବାଚନୀ ରଣ କ୍ଷେତ୍ରରେ ମୁଖ୍ୟତଃ ଶାସକ ବିଜେଡି ଦଳ ଓ ବିଜେପି ଦଳ ସମର୍ଥିତ ପ୍ରାର୍ଥୀଙ୍କ ମଧ୍ୟରେ ଲଢେଇ ଜୋର ହେବା ନେଇ ଆଲୋଚନା ହୋଇଛି । ସେଥିମଧ୍ୟରେ କେତେକ ସ୍ବାଧୀନ ପ୍ରାର୍ଥୀ ବା ଅନ୍ୟ ରାଜନୈତିକ ଦଳ ସମର୍ଥିତ ପ୍ରାର୍ଥୀମାନେ ମଧ୍ୟ ମୈଦାନରେ ଅଂଶ ଗ୍ରହଣ କରିଛନ୍ତି । ତେବେ ଆଜି ମତଦାନ ବେଳେ କୌଣସି ବିଶୃଙ୍ଖଳାର ଚିତ୍ର ସାମ୍ନାକୁ ଆସି ନାହିଁ । ନିର୍ବାଚନକୁ ସ୍ବଚ୍ଛ, ନିର୍ମଳ କରିବା ନେଇ ଜିଲ୍ଲା ପୋଲିସ ଓ ଜିଲ୍ଲା ପ୍ରଶାସନ ସମସ୍ତ ପଦକ୍ଷେପ ହାତକୁ ନେଇଥିଲା ।
ବଡଗାଁ ବ୍ଲକର ଦୁଇଟି ଜିଲ୍ଲା ପରିଷଦ ଆସନ ପାଇଁ 6 ଜଣ ପ୍ରାର୍ଥୀ , ସମିତି ସଭ୍ୟ ପାଇଁ 50 ଜଣ ,ସରପଞ୍ଚ ପାଇଁ 61 ଜଣ ଓ ୱାର୍ଡ ମେମ୍ବର ପାଇଁ 129 ଜଣ ପ୍ରାର୍ଥୀ ଲଢୁଛନ୍ତି । ସେହିପରି ଲାଠିକଟା ବ୍ଲକର 3 ଟି ଜିଲ୍ଲା ପରିଷଦ ଆସନ ପାଇଁ 15 ଜଣ ପ୍ରାର୍ଥୀ , ସମିତି ସଭ୍ୟ ପାଇଁ – 62 ଜଣ ,ସରପଞ୍ଚ ପାଇଁ – 111ଜଣ ଓ ୱାର୍ଡ ମେମ୍ୱର ପାଇଁ 153 ଜଣ ପ୍ରାର୍ଥୀ ମୈଦାନକୁ ଓହ୍ଲାଇଛନ୍ତି । କୁଆଁରମୁଣ୍ଡା ବ୍ଲକର ଦୁଇଟି ଜିଲ୍ଲା ପରିଷଦ ଆସନ ପାଇଁ 9 ଜଣ , ସମିତି ସଭ୍ୟ ପାଇଁ 89 ଜଣ ,ସରପଞ୍ଚ ପାଇଁ 113 ଜଣ ଓ ୱାର୍ଡ ମେମ୍ବର ପାଇଁ 88 ଜଣ ପ୍ରାର୍ଥୀ ପ୍ରତିଦ୍ବନ୍ଦିତା କରୁଛନ୍ତି ।
ସେହିପରି ବଣାଇଗଡ ଦୁଇଟି ଜିଲ୍ଲା ପରିଷଦ ଆସନ ପାଇଁ 12 ଜଣ ପ୍ରାର୍ଥୀ, ସମିତି ସଭ୍ୟ ପାଇଁ 59 ଜଣ ,ସରପଞ୍ଚ ପାଇଁ 58 ଜଣ ଓ ୱାର୍ଡ ମେମ୍ବର ପାଇଁ 212 ଜଣ ପ୍ରାର୍ଥୀ ସଂଘର୍ଷ କରୁଛନ୍ତି । ତେବେ ଆଜିର ଏହି ମତଦାନ ଶାନ୍ତିର ସହ ଶେଷ, ହୋଇଥିବା ବେଳେ ବଡଗାଁରେ 66 ପ୍ରତିଶତ, ଲାଠିକଟାରେ 84 ପ୍ରତିଶତ, କୁଆଁର ମୁଣ୍ଡାରେ 57 ପ୍ରତିଶତ ଓ ବଣାଇଗଡରେ 61 ପ୍ରତିଶତ ମତଦାନ ହୋଇଛି ।
ସୁନ୍ଦରଗଡ଼ରୁ ହରିହର ଦାସମହାପାତ୍ର, ଇଟିଭି ଭାରତ
