ଭୁବନେଶ୍ବର: ଚଳିତ ଖରିଫ ଋତୁ ପାଇଁ ପ୍ରଧାନମନ୍ତ୍ରୀ ଫସଲ ବୀମା ଯୋଜନାରେ ପଞ୍ଜୀକରଣ ପ୍ରକ୍ରିୟାକୁ ତ୍ୱରାନ୍ୱିତ କରାଯାଇଛି । ଫସଲବୀମା ପଞ୍ଜୀକରଣ ଚାଷୀଙ୍କର ଇଚ୍ଛାଧିନ ବିଷୟ ହୋଇଥିବାରୁ ଏ ବିଷୟରେ ବ୍ୟାପକ ସଚେତନତା ସୃଷ୍ଟି କରିବା ପାଇଁ ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ ନିର୍ଦ୍ଦେଶ ଦେଇଛନ୍ତି । ଏହି କାର୍ଯ୍ୟରେ ଇନ୍ସୁରାନ୍ସ୍ କମ୍ପାନୀ, ବ୍ୟାଙ୍କ୍, କ୍ଷେତ୍ର ସ୍ତରୀୟ କୃଷି କର୍ମଚାରୀ, କୃଷକ କ୍ଲବ୍, ପ୍ରଡ୍ୟୁସର ଗ୍ରୁପ୍ ମାନଙ୍କୁ ସକ୍ରିୟ ଭାବେ ସହଯୋଗ କରିବା ପାଇଁ ଅନୁରୋଧ କରାଯାଇଛି । ଜୁଲାଇ ୩୧ ତାରିଖ ସୁଦ୍ଧା ବୀମାଭୁକ୍ତ ହେବା ପାଇଁ ଇଚ୍ଛୁକ କୃଷକମାନେ ପଞ୍ଜୀକରଣ କରିପାରିବେ ।
ମଙ୍ଗଳବାର ଲୋକସେବା ଭବନଠାରେ ଅନୁଷ୍ଠିତ ପ୍ରଧାନମନ୍ତ୍ରୀ ଫସଲ ବୀମା ସଂକ୍ରାନ୍ତ ଏକ ଉଚ୍ଚସ୍ତରୀୟ ସମୀକ୍ଷା ବୈଠକରେ ମୁଖ୍ୟ ଶାସନ ସଚିବ ତ୍ରିପାଠୀ ଏହି ନିର୍ଦ୍ଦେଶ ନେଇଛନ୍ତି । ଫସଲ ବୀମା ସମ୍ବନ୍ଧିତ ବିଷୟ ଉପସ୍ଥାପନ କରି କୃଷି ଓ କୃଷକ ସଶକ୍ତିକରଣ ବିଭାଗ ପ୍ରମୁଖ ଶାସନ ସଚିବ ସୌରଭ ଗର୍ଗ କହିଥିଲେ ଯେ ଚଳିତ ଖରିପ୍ ଋତୁରେ ଧାନ, ମକା, କପା, ଚିନାବାଦାମ, ମାଣ୍ଡିଆ, ହରଡ, ଅଦା, ହଳଦୀ ଆଦି ୮ ଟି ଶସ୍ୟ ବୀମା ଅନ୍ତର୍ଭୁକ୍ତ କରାଯାଇଛି । ଇତିମଧ୍ୟରେ ଜମି ରେକର୍ଡକୁ ଜାତୀୟ ଶସ୍ୟ ବୀମା ପୋର୍ଟାଲ୍ ସହିତ ସଂଯୁକ୍ତ କରାସରିଛି । ଜୁଲାଇ ୩୧ ତାରିଖ ସୁଦ୍ଧା ବୀମାଭୁକ୍ତ ହେବା ପାଇଁ ଇଚ୍ଛୁକ କୃଷକମାନେ ପଞ୍ଜୀକରଣ କରିପାରିବେ ।
ବ୍ୟାଙ୍କ୍, ଇନ୍ସୁରାନ୍ସ୍ କମ୍ପାନୀ ପ୍ରତିନିଧି, ପ୍ରାଥମିକ କୃଷି ସମବାୟ ସମିତି କିମ୍ବା, ପଞ୍ଚାୟତ ଓ ବ୍ଳକ୍ ମାନଙ୍କରେ ଥିବା ଜନ ସେବା କେନ୍ଦ୍ର (କମନ୍ ସର୍ଭିସ୍ ସେଣ୍ଟର) ମାନଙ୍କରେ କୃଷକମାନେ ନିଜକୁ ପଞ୍ଜୀକୃତ କରିପାରିବେ ।
କୃଷି ନିର୍ଦ୍ଦେଶକ ମୁଥୁ କୁମାର ଜଣାଇଥିଲେ ଯେ ଗତ ୫ ବର୍ଷ ମଧ୍ୟରେ ଲଗାତାର ଭାବେ ବୀମାଭୁକ୍ତ ଚାଷ ଜମିର ପରିମାଣ ବୃଦ୍ଧି ପାଇଛି । ୨୦୧୬ ମସିହା ଖରିଫ୍ ଋତୁରେ ୧୨.୫୭ ଲକ୍ଷ ହେକ୍ଟର, ୨୦୧୭ ମସିହାରେ ୧୩.୪୬ ଲକ୍ଷ ହେକ୍ଟର, ୨୦୧୮ ମସିହାରେ ୧୪.୨୬ ଲକ୍ଷ ହେକ୍ଟର ଏବଂ ୨୦୧୯ ମସିହାରେ ୧୮.୫୨ ଲକ୍ଷ ହେକ୍ଟର ଚାଷ ଜମି ବୀମାଭୁକ୍ତ ହୋଇଥିଲା । ୨୦୧୬ ମସିହାଠାରୁ ରିମୋର୍ଟ ସେନ୍ସିଂ ଆପ୍ଲିକେସନ୍ ଏବଂ ମୋବାଇଲ୍ ଆପ୍ ମାଧ୍ୟମରେ ଫସଲ କଟା ପରୀକ୍ଷଣ ସଫଳତାର ସହ କରାଯାଉଛି । ଓଡ଼ିଶା ଏ କ୍ଷେତ୍ରରେ ଏକ ଅଗ୍ରଣୀ ରାଜ୍ୟ ବୋଲି ମୁଥୁ କୁମାର କହିଥିଲେ ।
ପ୍ରାପ୍ତ ସୂଚନାରୁ ଜଣାପଡିଛି, ଏହି ଯୋଜନାରେ ଚାଷ ଜମିର ଆକାର ଏବଂ ଫସଲର ପ୍ରକାର ଅନୁସାରେ ବୀମା ରାଶି ନିର୍ଦ୍ଧାରଣ ହୁଏ । ନିର୍ଦ୍ଧାରିତ ରାଶିର ଶତକଡା ୨ ଭାଗ ଚାଷୀ ଦିଅନ୍ତି । ଅବଶିଷ୍ଟ ରାଶିର ଶତକଡା ୫୦ ଭାଗ ରାଜ୍ୟ ଓ ଶତକଡା ୫୦ ଭାଗ କେନ୍ଦ୍ର ସରକାର ଦିଅନ୍ତି । ଅର୍ଥକାରୀ ଫସଲ ଯଥା କପା, ଅଦା ଓ ହଳଦୀ ପାଇଁ ଚାଷୀଙ୍କୁ ବୀମା ରାଶିର ଶତକଡା ୫ ଭାଗ ଏବଂ ଅନ୍ୟାନ୍ୟ ଫସଲ ପାଇଁ ଶତକଡା ୨ ଭାଗ ଦେବାକୁ ହୁଏ । ଓଡ଼ିଶା ଏକ ପ୍ରାକୃତିକ ବିପର୍ଯ୍ୟୟ ପ୍ରବଣ ରାଜ୍ୟ ହୋଇଥିବାରୁ ଅଧିକରୁ ଅଧିକ ଚାଷୀଙ୍କୁ ଏହି ଶସ୍ୟ ନିରାପତ୍ତା ବ୍ୟବସ୍ଥାର ଅନ୍ତର୍ଭୁକ୍ତ କରାଇବା ନିମନ୍ତେ ମୁଖ୍ୟ ଶାସନ ସଚିବ ତ୍ରିପାଠୀ ନିର୍ଦ୍ଦେଶ ଦେଇଥିଲେ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
