ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପୈତୃକ ବାସଭବନ ନବୀନ ନିବାସ ଜମିକୁ ନେଇ ମୁଣ୍ଡ ଟେକୁଛି ବିବାଦ । ଏହାକୁ ନବୀନ ପଟ୍ଟନାୟକଙ୍କ ପିତା ତଥା ପୂର୍ବତନ ମୁଖ୍ୟମନ୍ତ୍ରୀ ସ୍ବର୍ଗତ ବିଜୁ ପଟ୍ଟନାୟକ 1992 ମସିହାରେ ମୁଖ୍ୟମନ୍ତ୍ରୀ ଥିବା ସମୟରେ ଜିଏ ଡିପାର୍ଟମେଣ୍ଟ ମାଧ୍ୟମରେ ତାଙ୍କ ସ୍ତ୍ରୀ ଜ୍ଞାନ ପଟ୍ଟନାୟକଙ୍କ ନାମରେ ଲିଜ୍ ପ୍ରଦାନ କରାଯାଇଥିବା କହିଛି ଭାରତୀୟ ବିକାଶ ପରିଷଦ।
ଏପରିକି ସେହି ଜମିରେ ସେତେବେଳେ ଜବରଦଖଲ କରି ରହୁଥିବା ଶ୍ରୀମତୀ ଉଷାପ୍ରିୟା ଦାସ,ସ୍ବା-ଗୋବିନ୍ଦ ଚନ୍ଦ୍ର ଦାସ, ଯାହାନପୁର, ଜଗତସିଂହପୁର ଜିଲ୍ଲା କଟକଙ୍କୁ ଜବରଦଖଲରୁ ଅନ୍ତର କରି ଜ୍ଞାନ ପଟ୍ଟନାୟକଙ୍କ ନାମରେ ରେକର୍ଡ କରାଯାଇଛି। ଯାହା ମ୍ୟୁଟେସନ କେଶ ନଂ 11951/09 ପୃଷ୍ଠା 3ରେ ଦର୍ଶାଯାଇଥିବା କହିଛନ୍ତି ପରିଷଦର ସଭାପତି ସୁରେନ୍ଦ୍ର ପାଣିଗ୍ରାହୀ।
ଏହାସହ ପରିଷଦ ପକ୍ଷରୁ ନବୀନ ନିବାସ ଜମି ହେରଫେର ବିରୋଧରେ ଏକ ଜନସ୍ବାର୍ଥ ମାମଲା ରୁଜୁ କରାଯାଇଥିଲା । ଯାହାକୁ ତଦନ୍ତ କରି 4 ମାସ ମଧ୍ୟରେ ରିପୋର୍ଟ ପ୍ରଦାନ କରିବାକୁ ହାଇକୋର୍ଟ, ମୁଖ୍ୟ ଶାସନ ସଚିବଙ୍କୁ ନିର୍ଦ୍ଦେଶ ଦେଇଥିଲେ । ତେବେ ଏନେଇ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିବାରୁ ଭାରତୀୟ ବିକାଶ ପରିଷଦ କ୍ଷୋଭ ପ୍ରକାଶ କରିଛି । ତେବେ ଆସନ୍ତା 15 ଦିନ ମଧ୍ୟରେ ଏଥିଲାଗି ପଦକ୍ଷେପ ନ ଗ୍ରହଣ କଲେ ପରିଷଦ ମୁଖ୍ୟ ଶାସନ ସଚିବଙ୍କ ବିରୋଧରେ ଉଚ୍ଚ ନ୍ୟାୟାଳୟରେ ମାମଲା ରୁଜୁ କରିବା ସହିତ ସର୍ବୋଚ୍ଚ ନ୍ୟାୟାଳୟରେ ଆଶ୍ରୟ ନେବାକୁ ଚେତାବନୀ ଦେଇଛି।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
