ଭୁବନେଶ୍ବର: କେନ୍ଦ୍ରମନ୍ତ୍ରୀ ବିଶେଶ୍ବର ଟୁଡୁଙ୍କ ସରକାରୀ ଅଧିକାରୀଙ୍କୁ ମାଡ଼ତତ୍ଵ ମନ୍ତବ୍ୟ ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି ବିଜେପିର ବରିଷ୍ଠ ନେତା ତଥା ସାଂସଦ ସୁରେଶ ପୂଜାରୀ । ସିଧାସଳଖ ନହେଲେ ବି ବୁଲେଇ ବଙ୍କେଇ କେନ୍ଦ୍ରମନ୍ତ୍ରୀଙ୍କୁ ସୁରେଶ ସମାଲୋଚନା କରିଥିବା ଦେଖିବାକୁ ମିଳିଛି। ସୁରେଶ କହିଛନ୍ତି, ଲଢେଇ କରିବାର କୁରୁକ୍ଷେତ୍ର ଭିନ୍ନ । ସମସ୍ତଙ୍କୁ ସାଙ୍ଗରେ ନେଇ ବିକାଶ କରିବାର ରାସ୍ତା ଭିନ୍ନ।
ଗତକାଲି ଏକ ସରକାରୀ କାର୍ଯ୍ୟକ୍ରମରେ ଯୋଗଦେଇ କେନ୍ଦ୍ରମନ୍ତ୍ରୀ ବିଶେଶ୍ବର ଟୁଡୁ ସରକାରୀ ଅଧିକାରୀଙ୍କୁ ମାଡ଼ତତ୍ଵ କଥା ଉଠାଇଥିଲେ। କେନ୍ଦ୍ର ମନ୍ତ୍ରୀଙ୍କର ଏପରି ବିବାଦୀୟ ବୟାନ ସାମ୍ନାକୁ ଆସିବା ପରେ ବିଭିନ୍ନ ମହଲରେ ପ୍ରତିକ୍ରିୟା ପ୍ରକାଶ ପାଇଛି । କେନ୍ଦ୍ରମନ୍ତ୍ରୀ ଏମିତି ବ୍ୟବହାରକୁ ନେଇ ଦୁଇ ପ୍ରକାର ମତ ପ୍ରକାଶ ପାଉଛି । ସେପଟେ ଏହି ପ୍ରସଙ୍ଗରେ ମୁହଁ ଖୋଲିଛନ୍ତି ଦଳୀୟ ନେତା ସୁରେଶ ପୂଜାରୀ । ସିଧାସଳଖ ନହେଲେ ବି ପରୋକ୍ଷରେ କେନ୍ଦ୍ରମନ୍ତ୍ରୀଙ୍କୁ ସମାଲୋଚନା କରିବା ସହ ପରାମର୍ଶ ଦେଇଛନ୍ତି ବିଜେପିର ଏହି ବରିଷ୍ଠ ନେତା ।
ସୁରେଶ କହିଛନ୍ତି, ନିର୍ବାଚିତ ପ୍ରତିନିଧି, ପ୍ରଶାସନିକ ଅଧିକାରୀ, ବିଚାର ବ୍ୟବସ୍ଥା ଓ ଗଣମାଧ୍ୟମ ସହ ସମନ୍ବୟ ରହିଲେ ଗଣତନ୍ତ୍ର ରୁଦ୍ଧିମନ୍ତ ହେବା ସହ ବିକାଶ ଧାରା ତ୍ବାରାନ୍ବିତ ହୋଇପାରିବ । ଲଢେଇ କରିବାର କୁରୁକ୍ଷେତ୍ର ଭିନ୍ନ । ସମସ୍ତଙ୍କୁ ସାଙ୍ଗରେ ନେଇ ବିକାଶ କରିବାର ରାସ୍ତା ଭିନ୍ନ ବୋଲି କହି ପରୋକ୍ଷରେ କେନ୍ଦ୍ରମନ୍ତ୍ରୀ ଟୁଡୁଙ୍କୁ ସମାଲୋଚନା କରିଛନ୍ତି ସୁରେଶ ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
