ଭୁବନେଶ୍ବର: ମହାରାଷ୍ଟ୍ରରେ ଲଗାଣ ବର୍ଷା ଯୋଗୁଁ ସୃଷ୍ଟି ହୋଇଛି ଭୟଙ୍କର ବନ୍ୟା ପରିସ୍ଥିତି । ଫଳରେ ବନ୍ୟା ଜଳରେ ଫସି ରହିଥିବା ଲୋକଙ୍କୁ ଉଦ୍ଧାର କରିବା ପାଇଁ ଆଗେଇଛି ଓଡିଶା । ରାଜ୍ୟରୁ ଆଜି(ଶୁକ୍ରବାର) 8ଟି NDRF ଟିମ ସ୍ବତନ୍ତ୍ର ବିମାନ ଯୋଗେ ମହାରାଷ୍ଟ୍ରକୁ ଯାଇଛନ୍ତି ।
କଟକ ଗୋଆ ଓ ମହାରାଷ୍ଟ୍ର ଅଭିମୁଖେ ବାହାରିଛନ୍ତି ମୁଣ୍ଡଳିରୁ ୮ ଟିମର ୪୭ ଯବାନ । ପୁଣେକୁ ୪ଟି ଟିମ୍, ଗୋଆକୁ ୨ଟି ଟିମ୍, ରତ୍ନଗିରିକୁ ୨ଟିମ ସ୍ବତନ୍ତ୍ର ବାୟୁସେନା ବିମାନ ଯୋଗେ ଭୁବନେଶ୍ଵର ବିମାନ ବନ୍ଦରରୁ ଗସ୍ତ ପାଇଁ ବାହାରିଛି । ଏନେଇ ସୁଚନା ଦେଇଛନ୍ତି ଏନଡିଆର ଏଫ କମାଣ୍ଡାଣ୍ଟ ଅରୁଣ ଦେଓଗାମ ।
ଚାରିଆଡେ ବନ୍ୟା ପାଣିଥିବାରୁ ଗମନାଗମନ ବାଧାପ୍ରାପ୍ତ ହୋଇଛି । କୋଙ୍କଣ ରେଳ ମାର୍ଗରେ ଟ୍ରେନ୍ ସେବା ପ୍ରଭାବିତ ହୋଇଥିବାରୁ ପ୍ରାୟ 6,000 ଯାତ୍ରୀ ଫସିରହିଥିବା ସୂଚନା ମିଳିଛି । ମୁମ୍ବାଇ ସମେତ ରାଜ୍ୟର ଅନ୍ୟାନ୍ୟ ଅଞ୍ଚଳରେ ରେଳ ଓ ଯାତାୟାତ ବାଧା ପ୍ରାପ୍ତ ହୋଇଛି । ଏହି କାରଣରୁ ଉଦ୍ଧାର କାର୍ଯ୍ୟରେ ପ୍ରଶାସନକୁ ସହାୟତା କରିବା ରାଜ୍ୟରୁ ଯାଇଛନ୍ତି ଏହି ଉଦ୍ଧାରକାରୀ ଟିମ ।
ରତ୍ନଗିରି ଜିଲ୍ଲାର ପ୍ରମୁଖ ଜଗବୁଡି, ବଶିଷ୍ଟି, କୋଡାଭଲୀ, ଶସ୍ତ୍ରୀ, ବାଭ ସମେତ ଅନେକ ନଦୀ ବିପଦ ସଙ୍କେତ ଉପରେ ପ୍ରବାହିତ ହେଉଛି । ଏହାଫଳରେ ଖେଡ, ଚିପଲୁନ୍, ଲାଞ୍ଜା, ରାଜାପୁର, ସାଙ୍ଗମେଶ୍ବର ଏବଂ ଏହାର ଆଖପାଖ ଅଞ୍ଚଳରେ ପାଣି ପଶିବା କାରଣରୁ ଲୋକଙ୍କୁ ନିରାପଦ ସ୍ଥାନକୁ ସ୍ଥାନାନ୍ତର କରାଯାଇଛି । ବନ୍ୟା କାରଣରୁ ମୁମ୍ବାଇରେ ଭୂସ୍ଖଳନ ଘଟିଥିବା ମଧ୍ୟ ସୂଚନା ମିଳିଛି ।
ଭୁବନେଶ୍ବରରୁ ତାପସ ପରିଡ଼ା, ଇଟିଭି ଭାରତ
