ଭୁବନେଶ୍ବର: ଏଣିକି ଲୋକସଭା-ରାଜ୍ୟସଭା ଢାଞ୍ଚାରେ ଚାଲିବ ବିଭିନ୍ନ ବିଧାନସଭା କମିଟିର କାର୍ଯ୍ୟପ୍ରଣାଳୀ । ଚିରାଚରିତ କାର୍ଯ୍ୟପ୍ରଣାଳୀକୁ ପରିବର୍ତ୍ତନ କରାଯାଇ ନୂତନ ରୂପରେ ବିଧାନସଭା କମିଟିକୁ ପରିଚାଳିତ କରାଯିବ । ଏଥିରେ ବିଭିନ୍ନ କମିଟିର ବିଶେଷଜ୍ଞଙ୍କୁ ଡାକି ମତାମତ ନିଆଯିବା ସହ ରାଜ୍ୟ ବାହାରୁ ମଧ୍ୟ ବିଶେଷଜ୍ଞଙ୍କୁ ଡକାଯିବ । ସବୁ କମିଟିର ସୁପାରିଶ, ପରାମର୍ଶ ଓ ମତାମତକୁ ପ୍ରାଧାନ୍ୟ ଦିଆଯିବ । ବାଚସ୍ପତି ସୂର୍ଯ୍ୟନାରାୟଣ ପାତ୍ର ଏହି ସୂଚନା ଦେଇଛନ୍ତି ।
ଶୁକ୍ରବାର ବାଚସ୍ପତିଙ୍କ ଉପସ୍ଥିତିରେ ସମସ୍ତ ଷ୍ଟାଣ୍ଡିଂ କମିଟିର ଅଧ୍ୟକ୍ଷଙ୍କ ସହ ବିଚାର ବିମର୍ଷ ପରେ ଏହି କାର୍ଯ୍ୟପ୍ରଣାଳୀ ଉପରେ ସହମତି ଦିଆଯାଇଛି । ଏଥିରେ ଲୋକସଭା, ରାଜ୍ୟସଭା ଢାଞ୍ଚାରେ କାର୍ଯ୍ୟପ୍ରଣାଳୀକୁ ଗୁରୁତ୍ବ ଦିଆଯିବ । ବିଶେଷ କରି ଯେଉଁ କ୍ଷେତ୍ର ପାଇଁଙ୍କ କମିଟି ଗଠନ କରାଯାଇଛି ସେହି କ୍ଷେତ୍ରରୁ ବିଶେଷଜ୍ଞଙ୍କୁ ଡକାଯାଇ ସେମାନଙ୍କ ମତାମତ ନେଇପାରିବେ କମିଟି ସଭ୍ୟ । ତେବେ ଏଥିରେ ସରକାରୀ ବାବୁ ଉପସ୍ଥିତ ରହିବେ ନାହିଁ, କେବଳ ସଭ୍ୟ ରହିବେ । ଏଠାରୁ ପରାମର୍ଶ ଗ୍ରହଣ କରିବା ପରେ ସେମାନେ ଅଫିସରଙ୍କ ସହିତ ଆଲୋଚନା କରିବେ । ଏହାଦ୍ବାରା କିଛି ଭଲ ସୁପାରିଶ ଆସିପାରିବ ବୋଲି କହିଛନ୍ତି ବାଚସ୍ପତି ।
ଶୁକ୍ରବାର ବିଧାନସଭା ନିଜ ପ୍ରକୋଷ୍ଠରେ ଏନେଇ ସମସ୍ତ ଷ୍ଟାଣ୍ଡିଂ କମିଟି ଅଧ୍ୟକ୍ଷଙ୍କ ବୈଠକ ଡାକିଥିଲେ ବାଚସ୍ପତି । ସମସ୍ତଙ୍କ ସହିତ ଆଲୋଚନା କରିବା ପରେ ଏହା କହିଛନ୍ତି । ସେପଟେ ଅଧ୍ୟକ୍ଷ ମଧ୍ୟ ବିଭିନ୍ନ ସୁଚିନ୍ତିତ ପରାମର୍ଶ ଦେଇଛନ୍ତି ।
ଭୁବନେଶ୍ବର ଜ୍ଞାନଦର୍ଶୀ ସାହୁ, ଇଟିଭି ଭାରତ
