ଭଦ୍ରକ: କୋରୋନା କଟକଣା ଭାଙ୍ଗିଲେ ବିଧାୟକ । ଭଦ୍ରକ ଜିଲ୍ଲା ଅନ୍ତର୍ଗତ ଚାନ୍ଦବାଲି ବିଧାୟକ ବ୍ୟୋମକେଶ ରାୟଙ୍କୁ ଗିରଫ ଦାବିରେ ବିଜେପି ଯୁବ ମୋର୍ଚ୍ଚା ପକ୍ଷରୁ ବିକ୍ଷୋଭ ପ୍ରଦର୍ଶନ ସମେତ ଦାବିପତ୍ର ପ୍ରଦାନ କରାଯାଇଛି ।
ସୂଚନାନୁଯାୟୀ ଚାନ୍ଦବାଲି ବିଧାୟକ ବ୍ୟୋମକେଶ ରାୟଙ୍କ ବିବାହ କିଛିଦିନ ତଳେ ସମାପ୍ତ ହୋଇଛି । ଆଉ ଏହି ଅବସରରେ କୋଭିଡ କଟକଣାକୁ ସେ ସମ୍ପୂର୍ଣ୍ଣ ଭାବେ ଉଲଙ୍ଘନ କରିଥିବା ନେଇ ସୂଚନା ମିଳିଛି । ଯାହାର ଭିଡ଼ିଓ ସମ୍ପ୍ରତି ଭାଇରାଲ ହେବା ଘଟଣାରେ, ବିଧାୟକଙ୍କୁ ଗିରଫ ଦାବି କରି ଆଜି (ସୋମବାର) ବିଜେପି ଯୁବ ମୋର୍ଚ୍ଚା ପକ୍ଷରୁ ଚାନ୍ଦବାଲି ତହସିଲ କାର୍ଯ୍ୟାଳୟ ଆଗରେ ପ୍ରତିବାଦ ଜଣାଇଛନ୍ତି ।
ଏନେଇ ବିଜେପି ଯୁବ ମୋର୍ଚ୍ଚାର କର୍ମୀମାନେ ତହସିଲଦାରଙ୍କ ମାଧ୍ୟମରେ ଏକ ଦାବିପତ୍ର ମହାମହିମ ରାଜ୍ୟପାଳଙ୍କ ଉଦ୍ଦେଶ୍ୟରେ ପ୍ରଦାନ କରିଛନ୍ତି । ଯଦି ସରକାର ଆସନ୍ତା ଦୁଇଦିନ ମଧ୍ୟରେ ବିଧାୟକଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ କରନ୍ତି, ତେବେ ବିଜେପି ଯୁବ ମୋର୍ଚ୍ଚା ଚାନ୍ଦବାଲିରେ କୋରୋନା କଟକଣା ଭାଙ୍ଗି ବିବାହ ଭୋଜି କ୍ଷେତ୍ରରେ DJ ବଜାଇ ପ୍ରତିବାଦ କରିବେ ବୋଲି ଚେତାବନୀ ଦେଇଛନ୍ତି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
