ନୂଆଦିଲ୍ଲୀ: ସୁନା କିଣିବାରେ ସଉକ ରଖୁଥିବା ଲୋକଙ୍କୁ ଭାରି ବାଧିବ । ଦୀର୍ଘ ଦିନ ପରେ ପୁଣି ସୁନା ଦର ବୃଦ୍ଧି ହେବା ନେଇ ଚର୍ଚ୍ଚା ହେଉଛି । ୨୦୨୧ ଦ୍ବିତୀୟ ଭାଗରେ କିଛିଟା ଫିକା ପଡିଥିବା ସୁନା ବ୍ୟବସାୟ ନୂଆବର୍ଷରୁ ପୁଣି ଚମକିବ (Gold price may cross Rs 55k per 10 gm in 2022) । ମହାମାରୀ, ମୁଦ୍ରାସ୍ପୀତି ଆଶଙ୍କା ଯୋଗୁଁ ସୁନା 55 ହଜାର ଟଙ୍କା ଟପିପାରେ ବୋଲି ବଜାର ବିଶେଷଜ୍ଞମାନେ ଅନୁମାନ କରିଛନ୍ତି । ଏଥିରୁ ବ୍ୟବସାୟୀଙ୍କ ବ୍ୟବସାୟ ତ ଚାଲିବ ହେଲେ ଗ୍ରାହକଙ୍କ ପାଇଁ ଏହା ଚିନ୍ତାର କାରଣ ହୋଇପାରେ ।
ବଜାରର ଦୋଳାୟମାନ ସ୍ଥିତିରେ ସୁନା ନିବେଶର ଏକ ନିରାପଦ ମାଧ୍ୟମ ଭାବେ ବିବେଚିତ ହୋଇଥାଏ । ହେଲେ ସମ୍ଭାବ୍ୟ ଆଶଙ୍କାଗୁଡିକ ମଧ୍ୟରେ ଆଗକୁ ପୁଣି ଥରେ ଏହାର ଚାହିଦା ବଢିଚାଲିବ । ବର୍ତ୍ତମାନ ସୁନା ୧୦ ଗ୍ରାମ ପିଛା ୪୮ ହଜାର ଟଙ୍କା ରହିଛି । ୨୦୨୨ରେ ଏହା ଉର୍ଦ୍ଧ୍ବମୁଖୀ ହେବ ବୋଲି ଅନୁମାନ କରାଯାଉଛି । ୨୦୨୦ରେ କୋଭିଡ ଯୋଗୁଁ ବଜାରରେ ଦେଖାଦେଇଥିବା ଅସ୍ଥିରତା କାରଣରୁ ସୁନା ଚାହିଦା ପ୍ରବଳ ମାତ୍ରାରେ ବଢିଥିଲା ।
ଅଗଷ୍ଟରେ ଏମସିଏକ୍ସରେ (Multi Commodity Exchange) 56 ହଜାର ଟଙ୍କାରେ ପହଞ୍ଚିଥିଲା । ବର୍ତ୍ତମାନ ରହିଥିବା ସୁନା ଦର ରେକର୍ଡ ତୁଳନାରେ ୧୪% କମ ଏବଂ ୨୦୨୧ ଜାନୁଆରୀ ତୁଳନରେ ୪% କମ୍ । ହେଲେ ଅନ୍ତର୍ଜାତୀୟ ତୁଳନାରେ ଏହି ଦର ୩% କମ ରହିଛି । ବର୍ତ୍ତମାନ ବିଶ୍ବରେ ଓମିକ୍ରନ ଭୟର ବାତାବରଣ ସୃଷ୍ଟି କଲାଣି । ବିଭିନ୍ନ ସ୍ଥାନରେ ନୂଆ କଟକଣା ଲାଗିବା ଆରମ୍ଭ ହେଲାଣି । ଯାହାର ପରିଣାମ ବଜାରରେ ଆଗକୁ ଅସ୍ଥିରତା ଦେଖା ଦେବା ନେଇ ଆଶଙ୍କା କରାଯାଉଛି । ତେଣୁ ଆଗକୁ ସୁନା ମହଙ୍ଗା ହୋଇପାରେ ବୋଲି କହିଛନ୍ତି କମଟ୍ରେଣ୍ଡକ ସହ ପ୍ରତିଷ୍ଠାତା ତଥା ସିଇଓ ଜ୍ଞାନଶେଖର ଥ୍ୟାଗରାଜନ କହିଛନ୍ତି ।
ପ୍ରକାଶ ଥାଉ କି, ଭାରତରେ ଏମସିଏକ୍ସରେ (Multi Commodity Exchange) ୧୦ ଗ୍ରାମ ପିଛା ୪୭, ୭୪୦ ଟଙ୍କାରେ କାରବାର କରୁଛି । ୨୦୨୨ ଦ୍ବିତୀୟାର୍ଦ୍ଧରେ ଏହା ୨,୦୦୦ ଡଲାର ଅତିକ୍ରମ କରିପାରେ । ନୂଆବର୍ଷ ପ୍ରଥମାର୍ଦ୍ଧରେ ଏହା ୪୫ରୁ ୫୦ ହଜାର ଭିତରେ ରହିପାରେ ହେଲେ ଦ୍ବିତୀୟାର୍ଦ୍ଧରେ ଏହା ୫୫ ହାଜର ଛୁଇଁବା ନେଇ ଅନୁମାନ କରାଯାଉଛି ।
