ଥିରୁଅନନ୍ତପୁରମ/ନୂଆଦିଲ୍ଲୀ: କେରଳ କୋଜିକୋଡେରେ ହୋଇଥିବା ଦୁଇ ଆକ୍ରାନ୍ତଙ୍କ ସନ୍ଦେହଜନକ ମୃତ୍ୟୁ କାରଣ ନିପା ଭୂତାଣୁ । ଉଭୟ ନିପା ଭୂତାଣୁରେ ସଂକ୍ରମିତ ହୋଇ ପ୍ରାଣ ହରାଇଥିବା ସ୍ପଷ୍ଟ ହୋଇଥିବା ନେଇ କେନ୍ଦ୍ର ସ୍ବାସ୍ଥ୍ଯମନ୍ତ୍ରୀ ଡା.ମନସୁଖ ମାଣ୍ଡବ୍ୟ ସ୍ପଷ୍ଟ କରିଛନ୍ତି । ଏହି ଦୁଇ ସନ୍ଦିଗ୍ଧଙ୍କ ମୃତ୍ୟୁ ପରେ ସେମାନଙ୍କ ନମୂନା ସଂଗ୍ରହ କରାଯାଇ ପୁଣେ ସ୍ଥିତ ଜାତୀୟ ଭୂତାଣୁ ସଂସ୍ଥାନ (NIV) କୁ ପଠାଯାଇଥିଲା । ତେବେ ଆଜି ସଂଧ୍ୟା ସୁଦ୍ଧା ଏହାର ରିପୋର୍ଟ ପ୍ରକାଶ ପାଇବା ସହ ଉଭୟ ନିପା ଭୂତାଣୁରେ ସଂକ୍ରମିତ ଥିବା ଜଣାପଡିଛି । ନିପା ଭୂତାଣୁ ମୃତ୍ୟୁ ମାମଲା ସ୍ପଷ୍ଟ ହେବା ପରେ କେନ୍ଦ୍ରୀୟ ଟିମ କେରଳକୁ ପଠାଯିବା ନେଇ ମଧ୍ୟ ମାଣ୍ଡବ୍ୟ ସୂଚନା ଦେଇଛନ୍ତି ।
କୋଜିକୋଡେର ଏକ ଘରୋଇ ହସ୍ପିଟାଲରେ ଚିକିତ୍ସାଧିନ ଅବସ୍ଥାରେ ଅଗଷ୍ଟ 30 ତାରିଖରେ ପ୍ରଥମ ଆକ୍ରାନ୍ତଙ୍କ ମୃତ୍ୟୁ ହୋଇଥିଲା । ମୃତ୍ୟୁର କାରଣ ସ୍ପଷ୍ଟ ହୋଇନଥିବା ବେଳେ ମୃତକଙ୍କ ନମୂନା ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଥିଲା । ଏହା ପରେ ସୋମବାର ଅନ୍ୟ ତଥା 40 ବର୍ଷୀୟ ଦ୍ବିତୀୟ ଆକ୍ରାନ୍ତଙ୍କର ମୃତ୍ୟୁ ହୋଇଥିଲା । ଦ୍ବିତୀୟ ମୃତକ, ପ୍ରଥମ ମୃତକଙ୍କ ଚିକିତ୍ସା ବେଳେ ତାଙ୍କ ସଂସ୍ପର୍ଶରେ ଆସିଥିଲେ । ତାଙ୍କର ମଧ୍ଯ ନମୂନା ସଂଗ୍ରହ କରାଯାଇ ପୁଣେ ପଠାଯାଇଥିଲା ।
ଉଭୟ ମୃତକଙ୍କ ସଂସ୍ପର୍ଷରେ ପ୍ରାୟ 70ରୁ ଅଧିକ ଲୋକ ଆସିଥିବା ଜଣାପଡିଛି । ଏମାନଙ୍କ ମଧ୍ୟରୁ ଅଧିକାଂଶ ଉଭୟ ମୃତକଙ୍କ ସମ୍ପର୍କୀୟ ସେମାନଙ୍କୁ ଚିହ୍ନଟ କରି ଆଇସୋଲେସନରେ ରଖାଯାଇ ଚିକିତ୍ସା କରାଯାଉଛି । ତେବେ ଆଜି ସଂଧ୍ୟାରେ ଏହି ଦୁଇ ମୃତ୍ୟୁ ନିପା ସଂକ୍ରମଣରୁ ହୋଇଥିବା ପୁଣି ଭାଇରୋଲୋଜି ସଂସ୍ଥାନ ପକ୍ଷରୁ ସ୍ପଷ୍ଟ କରାଯାଇଥିବା କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବ୍ୟ ସୂଚନା ଦେଇଛନ୍ତି । 2018 ରେ କେରଳରେ ନିପା ଭୂତାଣୁର ସର୍ବାଧିକ ସଂକ୍ରମଣ ମାମଲା ସାମ୍ନାକୁ ଆସିଥିଲା । ଏଥିରେ 18 ଜଣ ଲୋକଙ୍କ ପ୍ରାଣହାନୀ ଘଟିଥିଲା ।
ଆଜି ଏହି ଦୁଇ ମୃତ୍ୟୁ ମାମଲା ନିପା ଭୂତାଣୁ ଜନିତ ହୋଇଥିବା ସ୍ପଷ୍ଟ ହେବା ପୂର୍ବରୁ ମୁଖ୍ୟମନ୍ତ୍ରୀ ପିନାରାଇ ବିଜୟନ ସୋସିଆଲ ମିଡିଆରେ ଏକ ଭିଡିଓ ବାର୍ତ୍ତା ପୋଷ୍ଟ କରିଥିଲେ । ଏହି ଘଟଣାରେ ଆତଙ୍କିତ ହେବାର କାରଣ ନାହିଁ । ମୃତକଙ୍କ ସହ ଯେଉଁମାନେ ସଂସ୍ପର୍ଷରେ ଥିଲେ, ସେମାନଙ୍କୁ ଆଇସୋଲେସନରେ ରଖାଯାଇ ଚିକିତ୍ସା କରାଯାଉଛି । ଏପରି ସମୟରେ ସତର୍କ ରହିବାର ଆବଶ୍ୟକତା ରହିଛି । ସ୍ଥିତିକୁ ଦୃଷ୍ଟିରେ ରଖି ସରକାର ଏକ ନିର୍ଦ୍ଦେଶାବଳୀ ପ୍ରସ୍ତୁତ କରିଛନ୍ତି । ସମସ୍ତେ ଏହି ନିୟମ ପାଳନ କରି ସରକାରଙ୍କୁ ସହଯୋଗ କରନ୍ତୁ ବୋଲି ମୁଖ୍ୟମନ୍ତ୍ରୀ ଭିଡିଓ ବାର୍ତ୍ତାରେ ନିବେଦନ କରିଥିଲେ । ହେଲେ ଏବେ ନିପା ସଂକ୍ରମଣ ସ୍ପଷ୍ଟ ହେବା ପରେ ଚିନ୍ତା ବଢିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
