ନୂଆଦିଲ୍ଲୀ: ଦେଶ ପାଳନ କରିଛି ଗୌରବମୟ 74ତମ ସାଧାରଣତନ୍ତ୍ର ଦିବସ । କାଶ୍ମୀର ଠାରୁ କନ୍ୟା କୁମାରୀ କଚ୍ଛ ଠାରୁ କୋହିମା ପର୍ଯ୍ୟନ୍ତ ସବୁଠି ଉଡିଛି ତ୍ରିରଙ୍ଗା । ସାରା ଦେଶରେ ପ୍ରକମ୍ପିତ ହୋଇଛି ଭାରତମାତା କି ଜୟ । ଦେଶର ବିବିଧତା ମଧ୍ୟରେ ଏକତାରେ କମ୍ପିଲା କର୍ତ୍ତବ୍ୟପଥ । ପ୍ରଥମ ଥର ପାଇଁ ନୂଆଦିଲ୍ଲୀ କର୍ତ୍ତବ୍ୟପଥରେ ଜାତୀୟସ୍ତରୀୟ ସାଧାରଣତନ୍ତ୍ର ଦିବସ ସମାରୋହ ଅନୁଷ୍ଠିତ ହୋଇଛି । ସାଧାରଣତନ୍ତ୍ର ଦିବସକୁ ନେଇ ଉତ୍ସବମୁଖର ହୋଇଛି ଦେଶ । କର୍ତ୍ତବ୍ୟପଥରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଜାତୀୟ ପତକା ଉତ୍ତୋଳନ କରିଛନ୍ତି । ଏହାପରେ ଆରମ୍ଭ ହୋଇଥିଲା ଚିତ୍ତାକର୍ଷକ ପରେଡ । ପ୍ରଥମେ ନର୍ଥ ଇଷ୍ଟ ରାଜ୍ୟ ଗୁଡିକର ପ୍ରଜ୍ଞାପନ ମେଢ କର୍ତ୍ତବ୍ୟପଥରେ ଆଗକୁ ବଢିଥିଲା । ପରେ ଗୋଟିଏ ପରେ ଗୋଟିଏ ହୋଇ ମୋଟ 16 ଟି ରାଜ୍ୟର ପ୍ରଜ୍ଞାପନ ମେଢ ପ୍ରଦର୍ଶିତ ହୋଇଥିଲା । ପରେଡରେ ପ୍ରଦର୍ଶିତ ହୋଇଛି ଭାରତର ସମୃଦ୍ଧି ସାଂସ୍କୃତିକ ବିବିଧତା ମଧ୍ଯରେ ଏକତା ।
ପୂର୍ବାହ୍ନ 10ଟା 30ରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓ ଇଜିପ୍ଟ ରାଷ୍ଟ୍ରପତି ଅବ୍ଦୁଲ ଫତ୍ତାହ ଅଲ-ସିସି କର୍ତ୍ତବ୍ୟପଥରେ ପହଞ୍ଚିଥିଲେ । ଏହାପରେ ରାଷ୍ଟ୍ରପତିଙ୍କୁ 21 ତୋପ ସଲାମି ଦିଆଯାଇଥିଲା । ପରେ ଜାତୀୟ ପତାକା ଉତ୍ତୋଳନ କରିବା ସହ ଅଭିବାଦନ ଗ୍ରହଣ କରିଥିଲେ ରାଷ୍ଟ୍ରପତି । ଭାରତୀୟ ସେନାର ତିନି ବାହିନୀ ଯବାନ, ଇଜିପ୍ଟ ସେନାର ଗୋଟିଏ ପ୍ଲାଟୁନ, ଦିଲ୍ଲୀ ପୋଲିସ, ବିଭିନ୍ନ ସ୍ବେଚ୍ଛାସେବୀ ସଂଗଠନ ଓ ସ୍କୁଲ କଲେଜ ଛାତ୍ରଛାତ୍ରୀ ପରେଡରେ ସାମିଲ ହୋଇଥିଲେ ।
ଜାତୀୟ ପତାକା ଉତ୍ତୋଳନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦିଲ୍ଲୀର ଜାତୀୟ ଯୁଦ୍ଧ ସ୍ମାରକୀ ଯାଇ ବୀର ଶହୀଦଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ । କର୍ତ୍ତବ୍ୟପଥରେ ପ୍ରଥମ ଥର ପାଇଁ ସାଧାରଣତନ୍ତ୍ର ଦିବସ ସମାରୋହ ଅନୁଷ୍ଠିତ ହୋଇଛି । ପ୍ରଥମ ଥର ପାଇଁ ପତାକା ଉତ୍ତୋଳନ କରିଛନ୍ତି ଆଦିବାସୀ ମହିଳା ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଚଳିତ ବର୍ଷ ପରେଡରେ 45 ହଜାର ଦର୍ଶକ ସାମାଲି ହୋଇଥିଲେ । ଭର୍ଟିକାଲ ପ୍ଲାଟଫର୍ମରେ ବସିବାର ବ୍ୟବସ୍ଥା ହୋଇଛି । ପ୍ରାୟ 12 ହଜାର ପାସ ବଣ୍ଟନ କରାଯାଇଥିଲା । 32 ହଜାର ଅନଲାଇନ ଟିକେଟ ନେଇଥିଲେ । ପଛରେ ବସିଥିବା ଲୋକ ମଧ୍ୟ ସହଜରେ ପରେଡ ଦେଖିପାରୁଛନ୍ତି । ପରେଡ ବିଜୟ ଚୌକରୁ ଲାଲକିଲ୍ଲା ଯାଏଁ ଚାଲିଥିଲା ।
ପରେଡରେ ଭାରତୀୟ ସ୍ଥଳସେନା, ବାୟୁସେନା ଓ ନୌସେନା ସେମାନଙ୍କର ରଣକୌଶଳ ଓ ଅତ୍ୟାଧୁନିକ ଅସ୍ତ୍ରଶସ୍ତ୍ର ପ୍ରଦର୍ଶନ କରିଥିଲେ । ଭାରତୀୟ ସେନାର ମହିଳା ଅଧିକାରୀ ମଧ୍ୟ ଚିତ୍ତାକର୍ଷକ ଷ୍ଟଣ୍ଟ ପ୍ରଦର୍ଶନ କରିବା ସହ କଣ୍ଟିଜେଣ୍ଟର ନେତୃତ୍ବ ନେଇଥିଲେ । ଭାରତୀୟ ନାରୀଶକ୍ତିର ପରାକ୍ରମ ଦେଖିଛି ବିଶ୍ବ । ଏତତ ବ୍ୟତୀତ ପରେଡରେ ଆତ୍ମନିର୍ଭର ଭାରତ, ଭବିଷ୍ୟତ ଭାରତ, ଭାରତର ଉପଲବ୍ଧି ପ୍ରଦର୍ଶିତ ହୋଇଛି ।
