ହାଇଦ୍ରାବାଦ: ଗୁଜୁରାଟ ନିର୍ବାଚନ (Gujarat poll) ପାଇଁ ଦ୍ବିତୀୟ ତଥା ଅନ୍ତିମ ପର୍ଯ୍ୟାୟ ଭୋଟିଂ ଜାରି ରହିଛି । ଖେଡା ଜିଲ୍ଲାରେ ପୋଲିସର ବର୍ବର କାର୍ଯ୍ୟାନୁଷ୍ଠାନ ପ୍ରତିବାଦରେ ଭୋଟ ବର୍ଜନ କରିଛି ଏକ ସଂଖ୍ୟାଲଘୁ ଗ୍ରାମ (Muslims Boycott Polls In Gujarat Village)। ଆଜି ବିଧାନସଭା ନିର୍ବାଚନରେ ଗ୍ରାମର କେହି ବାସିନ୍ଦାରେ ସେମାନଙ୍କ ମତାଧିକାର ସାବ୍ୟସ୍ତ କରିନାହାନ୍ତି । ଖେଡା ଜିଲ୍ଲାର ଉନ୍ଧେଲା ଗ୍ରାମରେ ଏପରି ଘଟଣା ଦେଖିବାକୁ ମିଳିଛି ।
ଚଳିତବର୍ଷ ଅକ୍ଟୋବରରେ ନବରାତ୍ରୀ ପାଳନ ସମୟରେ ଗାରବା ନୃତ୍ୟ ପରିବେଷଣକାରୀଙ୍କ ଉପରେ ପଥର ମାଡ ହୋଇଥିଲା । ଏହି ଅଭିଯୋଗରେ ସ୍ଥାନୀୟ ପୋଲିସ ଗ୍ରାମର ବହୁ ଯୁବକଙ୍କୁ ରାସ୍ତା ମଝିରେ ହାତବାନ୍ଧି କମ୍ବା ବିଦ୍ୟୁତ ଖୁଣ୍ଟରେ ବାନ୍ଧି ପିଟିଥିଲା । ପରେ ସେମାନଙ୍କୁ ରାସ୍ତା ମଝିରେ ଦୋଷ ସ୍ବୀକାର କରିବା ସହ କ୍ଷମା ପ୍ରାର୍ଥନା କରିବାକୁ ପୋଲିସ କହିଥିଲା । ସାଧା ପୋଷାକରେ କିଛି ପୋଲିସ କର୍ମୀ ଖୁଣ୍ଟରେ ଯୁବକଙ୍କୁ ବାନ୍ଧି ମାଡ ମାରିବାର ଭିଡିଓ ଗଣମାଧ୍ୟମରେ ପ୍ରସାରିତ ହେବା ପରେ ପୋଲିସର ବର୍ବରତାକୁ ନେଇ ମଧ୍ୟ ପ୍ରଶ୍ନ ଉଠିଥିଲା । ଯାହାକୁ ନେଇ ସେତେବେଳେ ଚର୍ଚ୍ଚା ମଧ୍ୟ ହୋଇଥିଲା । ଏହାକୁ କିଛି ସଂଗଠନ ବିରୋଧ କରିବା ସହ ପୋଲିସର କଙ୍ଗାରୁ କୋର୍ଟ କହି କାର୍ଯ୍ୟାନୁଷ୍ଠାନ ଦାବି କରିଥିଲେ (Muslims Boycott Polls In Gujarat Village)।
ପୋଲିସ କାର୍ଯ୍ୟାନୁଷ୍ଠାନ ପ୍ରତିବାଦରେ ସେତେବେଳେ ଗ୍ରାମବାସୀ ଧାରଣା ଦେଇଥିଲେ । ପୋଲିସ ବର୍ବରତାର ତଦନ୍ତ ପାଇଁ ଏକ କମିଟି ମଧ୍ୟ ଗଠନ କରାଯାଇଥିଲା । ହେଲେ କମିଟି ଗଠନ ସତ୍ତ୍ବେ ସୁଦ୍ଧା ସମ୍ପୃକ୍ତ ପୋଲିସ ଅଧିକାରୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିଲା । ଯାହାକୁ ନେଇ ଗ୍ରାମବାସୀଙ୍କ ମଧ୍ୟରେ କ୍ଷୋଭ ରହିଥିଲା । ଚଳିତ ନିର୍ବାଚନରେ ଏହାର ପ୍ରତିବାଦ ସ୍ବରୂପ ସେମାନେ ମତଦାନରୁ ବିରତ ରହି ଭୋଟ ବର୍ଜନ କରିଛନ୍ତି (Muslims Boycott Polls In Gujarat Village)।
ବ୍ୟୁରୋ ରିପୋର୍ଟ, ଇଟିଭି ଭାରତ
