ଶ୍ରୀହରିକୋଟା: ପୁଣି ଇତିହାସ ରଚିଲା ଭାରତୀୟ ମହାକାଶ ଗବେଷଣା ସଂସ୍ଥାନ (ଇସ୍ରୋ) । ଅପରାହ୍ନ 3 ଟା 2 ମିନିଟରେ ଆନ୍ଧ୍ରପ୍ରଦେଶର ଶ୍ରୀହରିକୋଟାରୁ ଚଳିତ ବର୍ଷର ପ୍ରଥମ ଉପଗ୍ରହକୁ ସଫଳତାର ସହ ଲଞ୍ଚ କରିଛି ଇସ୍ରୋ । ଏଥିସହିତ ଅନ୍ୟ 9 ଟି ବିଦେଶୀ ଉପଗ୍ରହ କକ୍ଷପଥରେ ସ୍ଥାପନ କରିଛି । ସମସ୍ତ ବୈଜ୍ଞାନିକ, ଅଧିକାରୀ ଓ କର୍ମଚାରୀଙ୍କୁ ଅଭିନନ୍ଦନ ଜଣାଇଛନ୍ତି ଇସ୍ରୋ ଅଧ୍ୟକ୍ଷ କେ ଶିବନ ।
ଶ୍ରୀହରିକୋଟାର ସତୀଶ ଧୱାନ ସ୍ପେସ ସେଣ୍ଟରରୁ ଏହି ରକେଟ ଉତକ୍ଷେପଣ ହୋଇଛି । ଇସ୍ରୋର ସାଟେଲାଇଟ ଇଓଏସ (Earth Observation Satellite)କୁ PSLV-C 49 ରକେଟ ଜରିଆରେ ଲଞ୍ଚ କରାଯାଇଛି । ଖାସ କଥା ହେଉଛି ଯେ ଏହି ରକେଟ କେବଳ ଗୋଟିଏ ଭାରତୀୟ ନୁହେଁ ବରଂ ଅନ୍ୟ 9ଟି ବିଦେଶୀ ସାଟେଲାଇଟକୁ ମଧ୍ୟ କକ୍ଷପଥରେ ଅବସ୍ଥାପନ କରିଛି । ଏହି ଐତିହାସିକ ଉତକ୍ଷେପଣ ପରେ ଇସ୍ରୋ ଅଧ୍ୟକ୍ଷ କେ ଶିବନ କହିଛନ୍ତି ଏହି ଉତକ୍ଷେପଣ ଅତି ଗୁରୁତ୍ତ୍ବପୂର୍ଣ୍ଣ ଥିଲା । ଇଞ୍ଜିନିୟରଠୁ ଆରମ୍ଭ କରି ଲ୍ୟାବ ଟେକନିସିଆନ ଏକାଠୀ କାମ କରିଛନ୍ତି । ଏହାର ସଫଳ ଉତକ୍ଷେପଣ ହୋଇଥିବାରୁ ସମସ୍ତଙ୍କୁ ଦୀପାବଳୀର ଶୁଭେଚ୍ଛା ଜଣାଇଛନ୍ତି । ଏବଂ ଏହା ଦୀପାବଳୀର ଖୁସିକୁ ଦ୍ବିଗୁଣିତ କରିଛି ବୋଲି କହିଛନ୍ତି ।
ଇଓଏସ-01ର ଅର୍ଥ ହେଉଛି ଅବଜରଭେସନ ରିସେଟ ସାଟେଲାଇଟର ଏକ ଉନ୍ନତ ସଂସ୍କରଣ । ଏଥିରେ ସିନ୍ଥେଟିକ ଅପର୍ଚର ରାଡାର(ଏସଏଆର) ଲାଗିଛି । ଏହା କୌଣସି ବି ସୟୟରେ ଏବଂ ଯେକୌଣସି ଋତୁରେ ପୃଥିବୀ ଉପରେ ନଜର ରଖିପାରିବ ।
ଏହି ସାଟେଲାଇଟର ବିଶେଷତ୍ବ ହେଉଛି ଯେ ଏହା ବାଦଲ ଭିତରେ ବି ପୃଥିବୀ ଉପରେ ନଜର ରଖିପାରିବା ସହ ସ୍ପଷ୍ଟ ଚିତ୍ର ଉତ୍ତୋଳନ କରିପାରିବ । ଏହାର ଉଭୟ ଦିନରେ ଓ ରାତିରେ ଫଟୋ ଚିତ୍ର ଉତ୍ତୋଳନ କରିବାର କ୍ଷମତା ରହିଛି । ଏହାସହ ଇଓଏସ ନାଗରିକଙ୍କ ଗତିବିଧିରେ ମଧ୍ୟ ନଜର ରଖିପାରିବ । ଏହାଦ୍ବାରା ଦେଶର ନୀରିକ୍ଷଣ ବ୍ୟବସ୍ଥା ସୁଦୃଢ ହେବା ସହିତ ସାମୁଦ୍ରିକ ସୀମାରେ ଉପରେ ଆହୁରି ତୀକ୍ଷ୍ଣ ନଜର ରଖାଯାଇପାରିବ । କେବଳ ସାମରିକ ତଦାରଖ ନୁହେଁ ବରଂ ଚାଷ, ଜଙ୍ଗଲ, ଭୂବିଜ୍ଞାନ ନୀରିକ୍ଷଣରେ ମଧ୍ୟ ସହାୟକ ହେବ ବୋଲି ଜଣାପଡିଛି ।
