'ନିଦରୁ ଉଠି ବନ୍ୟା ପୀଡିତଙ୍କୁ ସାହାଯ୍ୟ କରନ୍ତୁ ନୀତିଶ ସରକାର'

ପାଟନା: ବିହାରରେ ବନ୍ୟା ପରିସ୍ଥିତି ନେଇ କ୍ଷମତାରେ ଥିବା ନୀତିଶ ସରକାରଙ୍କୁ ସମାଲୋଚନା କରିଛି କଂଗ୍ରେସ । ରାଜ୍ୟରେ 11ଟି ଜିଲ୍ଲାରେ ବନ୍ୟା ଯୋଗୁଁ ଲକ୍ଷାଧିକ ଲୋକ ପ୍ରଭାବିତ ହୋଇଛନ୍ତି । ହେଲେ ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ନେତୃତ୍ବରେ ବିହାର ସରକାର ଏବେ ନିଦରେ ଶୋଇରହିଛନ୍ତି ବୋଲି କଂଗ୍ରେସ ଅଭିଯୋଗ କରିଛି ।

ପୂର୍ବତନ କେନ୍ଦ୍ରମନ୍ତ୍ରୀ ତଥା ବିହାରରୁ କଂଗ୍ରେସ ରାଜ୍ୟସଭା ସାଂସଦ ଥିବା ଅଖିଳେଶ ପ୍ରସାଦ ସିଂହ ଏହି ତାତ୍ସଲ୍ୟ କରିଛନ୍ତି । ନୀତିଶ କ୍ଷମତା ଦଖଲ କରିବା ପରଠାରୁ ବିହାରରେ ବନ୍ୟା ପରିସ୍ଥିତିର ପରିଚାଳନା ସଠିକ ଭାବେ ହୋଇନାହିଁ । ଫଳରେ ଅଧା ରାଜ୍ୟ ଓ ଉତ୍ତର ବିହାରର ତୃତୀୟ-ଚତୁର୍ଥାଂଶ ଭାଗ ବନ୍ୟା ଦ୍ବାରା ପ୍ରଭାବିତ ହୋଇଛନ୍ତି । ଲୋକ ନିଜ ଘର ଛାଡିବାକୁ ବାଧ୍ୟ ହୋଇଛନ୍ତି । ବନ୍ୟା ପୀଡିତଙ୍କ ରହିବା ପାଇଁ କୌଣସି ବ୍ୟବସ୍ଥା ହୋଇନାହିଁ । ଗୃହପାଳିତ ପଶୁଙ୍କ ଖାଇବା ପାଇଁ ମଧ୍ୟ କିଛି ସୁବିଧା କରିନାହାନ୍ତି ସରକାର ।

ସମୟ ଆସିଯାଇଛି ନିଦରୁ ଉଠି କାମ କରନ୍ତୁ ନୀତିଶ ସରକାର । ପ୍ରାୟ ଶହେରୁ ଅଧିକ ଲୋକ ବନ୍ୟା ଯୋଗୁଁ ପ୍ରାଣ ହରାଇଛନ୍ତି । ଜୀବନ ଓ ସମ୍ପତ୍ତି ଉଭୟ ନଷ୍ଟ ହେବାରେ ଲାଗିଛି । ପୂର୍ବରୁ ବିହାର ଓ ଆସାମ ସରକାର ସବୁବେଳେ ବନ୍ୟା ପାଇଁ ସତର୍କ ରହିବା ସହ ପ୍ରାକ୍ ପ୍ରସ୍ତୁତି କରିଥାନ୍ତି । ହେଲେ ଏଥର ବିହାର ସରକାରଙ୍କ ନିକଟରେ ସେପରି କୌଣସି ପ୍ରସ୍ତୁତି ଦେଖିବାକୁ ମିଳିନାହିଁ ବୋଲି ଅଖିଳେଶ କହିଛନ୍ତି । ଏହାସହ ବିହାର ସରକାର ନ ଶୋଇ ଏବେ କାମରେ ଲାଗିଯାଆନ୍ତୁ ବୋଲି ସେ ତାତ୍ସଲ୍ୟ କରି କହିଛନ୍ତି ।

ପ୍ରକାଶ ଥାଉ କି ବିହାରକୁ ଏବେ କୋରୋନା ସହ ବନ୍ୟା ମାଡ ହୋଇଛି । ଉତ୍ତର ରାଜ୍ୟରେ ଅନେକ ଜିଲ୍ଲା ଏହାଦ୍ବାରା ପ୍ରଭାବିତ ହୋଇଛନ୍ତି । ଏନଡିଆରଏଫ ଓ ଏସଡିଆରଏଫର 22ଟି ଟିମ୍ ଉଦ୍ଧାର କାର୍ଯ୍ୟରେ ଲାଗିଛନ୍ତି । ଭାରତୀୟ ବାୟୁସେନା ପକ୍ଷରୁ ମଧ୍ୟ ବନ୍ୟା ପ୍ରଭାବିତ ଅଞ୍ଚଳରେ ଖାଦ୍ୟ ସାମଗ୍ରୀ ଆକାଶମାର୍ଗରୁ ବଣ୍ଟାଯାଉଛି ।