ହାଇଦ୍ରାବାଦ: ଆପ ଟିକେଟରେ ଗୁଜୁରାଟର ବିଶାଭଦର ବିଧାନସଭା ଆସନରୁ ବିଜୟୀ ହୋଇଥିବା ବଧାୟକ ଭୂପତ ଭାୟାନୀ ବିଜେପିରେ ଯୋଗଦେବା ଚର୍ଚ୍ଚାକୁ ଖଣ୍ଡନ କରିଛନ୍ତି । ସେ ଭାରତୀୟ ଜନତା ପାର୍ଟିରେ ଖୁବଶୀଘ୍ର ସାମିଲ ହେବା ଚର୍ଚ୍ଚାକୁ ଏକ ଗୁଜବ ବୋଲି ଦର୍ଶାଇଛନ୍ତି । ତେବେ ସେ ନିର୍ବାଚନ ଫଳାଫଳ ପରେ ରାଜଧାନୀ ଗାନ୍ଧୀନଗର ଗସ୍ତ କରିବା ପରେ ଏପରି ଚର୍ଚ୍ଚା ଆରମ୍ଭ ହୋଇଥିଲା । ସେ ଭାରତୀୟ ଜନତା ପାର୍ଟିରେ ସାମିଲ ହେବା ନେଇ ଆଲୋଚନା ପାଇଁ ଗାନ୍ଧୀନଗର ଗସ୍ତ କରିଥିବା ଚର୍ଚ୍ଚା ହେଉଥିଲା । ଯାହାକୁ ସମ୍ପୂର୍ଣ୍ଣ ଖଣ୍ଡନ କରିଛନ୍ତି ବିଧାୟକ ଭୂପତ ।
ଭୂପତ କହିଛନ୍ତି, ‘‘ମୁଁ ଅନ୍ୟ କୌଣସି ଦଳରେ ଯୋଗ ଦେଉନାହିଁ । ଜାରି ରହିଥିବା ଚର୍ଚ୍ଚା କେବଳ ଏକ ଗୁଜବ । ମୁଁ ମୋର ବ୍ୟକ୍ତିଗତ କାମ ପାଇଁ ଗାନ୍ଧୀନଗର ଯାଇଥିଲି । ଭାରତୀୟ ଜନତା ପାର୍ଟିର ନେତାଙ୍କ ସହ ମୋର କୌଣସି ସାକ୍ଷାତ କିମ୍ବା ଆଲୋଚନା ହେବାର ପ୍ରଶ୍ନ ଉଠୁନାହିଁ ।’’
ଡିସେମ୍ବର 8ରେ ଗୁଜୁରାଟ ବିଧାନସଭା ନିର୍ବାଚନ ଜନାଦେଶ ପ୍ରକାଶ ପାଇଛି । ଏଥିରେ ସରକାର ଗଠନ କରିବାକୁ ଦାବି କରିଆସୁଥିବା କେଜ୍ରିଓ୍ବାଲଙ୍କ ଆମ ଆଦମୀ ପାର୍ଟି ନୈରାଶ୍ୟଜନକ ପ୍ରଦର୍ଶନ କରିଥିଲା । ସମସ୍ତ ଆସନରେ ପ୍ରାର୍ଥୀ ଦେଇଥିବା ଆପ ମାତ୍ର 5ଟି ଆସନରେ ଜିତିବାରେ ସଫଳ ହୋଇଛି । ଏହି ବିଧାୟକଙ୍କ ସ୍ଥାୟୀତ୍ବ ନେଇ ମଧ୍ୟ ବିଭିନ୍ନ ସମୟରେ ଭିନ୍ନଭିନ୍ନ ଚର୍ଚ୍ଚା ସୃଷ୍ଟି ହେଉଛି । ଏମାନେ ଭାରତୀୟ ଜନତା ପାର୍ଟିରେ ସାମିଲ ହେବା ନେଇ ମଧ୍ୟ ଚର୍ଚ୍ଚା ହେଉଛି । ଏହାରି ମଧ୍ୟରେ ବିଧାୟକ ଭୂପତଙ୍କୁ ନେଇ ଲାଗିରହିଥିବା ଚର୍ଚ୍ଚାକୁ ସେ ନିଜେ ଖଣ୍ଡନ କରିବା ସହ ବ୍ୟକ୍ତିଗତ କାମରେ ଗାନ୍ଧୀନଗର ଗସ୍ତ କରିଥିବା କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
