ସମ୍ବଲପୁର: ସ୍ବାମୀଙ୍କ ପାଇଁ ପ୍ରଚାର ମୈଦାନକୁ ଓହ୍ଲାଇଲେ ସ୍ତ୍ରୀ । ସ୍ବାମୀଙ୍କ ପାଇଁ କଲେ ଭୋଟ ଭିକ୍ଷା । ତେବେ ଆଜି ସମ୍ବଲପୁରରେ ଏକ କାର୍ଯ୍ୟକ୍ରମରେ ସମ୍ବଲପୁର ଲୋକସଭା ଆସନ ପ୍ରାର୍ଥୀ ତଥା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏକ କାର୍ଯ୍ୟକ୍ରମରେ ଯୋଗ ଦେବାରଥିଲା । କିନ୍ତୁ ତାଙ୍କ ସ୍ଥାନରେ ପତ୍ନୀ ମୃଦୁଳା ଠାକୁର ପ୍ରଧାନ ସେହି କାର୍ଯ୍ୟକ୍ରମରେ ଯୋଗଦେଇ ବିଜେପି ପାଇଁ ପ୍ରଚାର କରିବା ସହ ଧର୍ମେନ୍ଦ୍ରଙ୍କ ପାଇଁ ଭୋଟ ମାଗିଛନ୍ତି ।
ଆଜି କେନ୍ଦ୍ରମନ୍ତ୍ରୀଙ୍କ ପାଇଁ ପ୍ରଚାର ଆରମ୍ଭ କରିଛନ୍ତି ତାଙ୍କ ପତ୍ନୀ ମୃଦୁଲା ଠାକୁର ପ୍ରଧାନ । ସମ୍ବଲପୁର ମହାନଗର କାନିଜୁରୀ ଠାରେ ଅନୁଷ୍ଠିତ ନାରୀ ଶକ୍ତି ବନ୍ଦନ କାର୍ଯ୍ୟକ୍ରମରେ ଧର୍ମେନ୍ଦ୍ର ପ୍ରଧାନ ଯୋଗଦେବାର ଥିଲା । କିନ୍ତୁ କୌଣସି କାରଣରୁ ଧର୍ମେନ୍ଦ୍ର ନ ଆସିପାରିବାରୁ କେନ୍ଦ୍ରମନ୍ତ୍ରୀଙ୍କ ଧର୍ମପତ୍ନୀ ମୃଦୁଳା ଠାକୁର ପ୍ରଧାନ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ । କାର୍ଯ୍ୟକ୍ରମରେ ଯୋଗଦେଇ ସ୍ବାମୀ ଧର୍ମେନ୍ଦ୍ରଙ୍କ ପାଇଁ ତଥା ବିଜେପି ପାଇଁ ଭୋଟ ମାଗିଛନ୍ତି । ଏହି ଅବସରରେ ମୃଦୁଳା କହିଛନ୍ତି, "ଆଜି ହେଉଛି ନବରାତ୍ରି ଓ ହିନ୍ଦୁ ନବବର୍ଷର ଆରମ୍ଭ । ଏଥିପାଇଁ ଆଜି ମାତୃଶକ୍ତିଙ୍କ ଆଶୀର୍ବାଦ ନେଇ କେନ୍ଦ୍ରମନ୍ତ୍ରୀ ପ୍ରଚାର ଆରମ୍ଭ କରିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସରକାର ନାରୀମାନଙ୍କୁ ସମ୍ମାନ ଓ ପ୍ରାଧାନ୍ୟ ଦେଇଆସୁଛି । ଏଥିପାଇଁ କେନ୍ଦ୍ର ସରକାର ମାଆ ଭଉଣୀଙ୍କ ପାଇଁ କାମ କରିଆସୁଛନ୍ତି । ଏହାର ପ୍ରମାଣ ହେଉଛି ଯେ ପ୍ରଧାନମନ୍ତ୍ରୀ ବହୁ ବର୍ଷରୁ ଅଟକି ରହିଥିବା ନାରୀ ମାନଙ୍କ ପାଇଁ 33 ପ୍ରତିଶତ ସଂରକ୍ଷଣ ବିଲକୁ ପାସ କରିଛନ୍ତି ।"
ମୃଦୁଳା ଏହା ମଧ୍ୟ କହିଛନ୍ତି, "ପ୍ରଧାନମନ୍ତ୍ରୀ କେବଳ କଥାରେ ନୁହେଁ କାର୍ଯ୍ୟରେ ମଧ୍ୟ ନାରୀଶକ୍ତିଙ୍କୁ ସମ୍ମାନ ଦିଅନ୍ତି । ଏଥିପାଇଁ 2014ରୁ 24 ପର୍ଯ୍ୟନ୍ତ ନାରୀମାନଙ୍କ ପାଇଁ ବିଭିନ୍ନ ଯୋଜନା ଲାଗୁ କରିଛନ୍ତି କେନ୍ଦ୍ର ସରକାର । ଯାହାର ସିଧାସଳଖ ଲାଭ ମହିଳାମାନଙ୍କ ପାଖକୁ ଯାଉଛି । ପ୍ରଧାନମନ୍ତ୍ରୀ ଆବାସ ଯୋଜନା, ପ୍ରଧାନମନ୍ତ୍ରୀ ଉଜ୍ୱଳା ଗ୍ୟାସ ଯୋଜନା, ବେଟି ବଚାଓ ବେଟି ପଢ଼ାଓ, ସୁକନ୍ୟା ସମୃଦ୍ଧି ଯୋଜନା ଲାଗୁ କରିବା ସହ ତିନି ତଲାକ ବଳି ପ୍ରଥାକୁ ମଧ୍ୟ ଉଚ୍ଛେଦ କରିଛନ୍ତି । ଏଥିପାଇଁ ଏଥର ଭାରତୀୟ ଜନତା ପାର୍ଟିକୁ ଭୋଟ ଦେବା । ଏହାସହ ଚଳିତ ନିର୍ବାଚନରେ ସାରା ଦେଶରେ ବିଜେପି 4 ଶହ ସିଟ ଜିତିବା ସହ ଓଡ଼ିଶାରେ ମଧ୍ୟ ଡବଲ ଇଞ୍ଜିନ ସରକାର ଗଠନ କରିବ ସମ୍ବଲପୁର ଲୋକସଭା ସିଟ ଓ ଏହାର ଅନ୍ତର୍ଗତ 7ଟି ବିଧାନସଭା ସିଟରେ ଭାରତୀୟ ଜନତା ପାର୍ଟୀକୁ ଲୋକେ ବିପୁଳ ମାତ୍ରରେ ଭୋଟ ଦେଇ ବିଜୟୀ କରିବେ ।"
ଇଟିଭି ଭାରତ, ସମ୍ବଲପୁର
