ରାଇରଙ୍ଗପୁର: ନିର୍ବାଚନ ପୂର୍ବରୁ ଅବକାରୀ ବିଭାଗ ହାତରେ ଲାଗିଲା ଚୋରା ମଦ କାରବାର । ନିର୍ବାଚନ ପାଇଁ ଆଉ କିଛି ଦିନ ବାକି ଥିବାବେଳେ ରାଇରଙ୍ଗପୁର ଉପଖଣ୍ଡରେ ଏବେଠୁ ଆରମ୍ଭ ହୋଇ ଯାଇଛି ନକଲି ମଦ ପ୍ରସ୍ତୁତ ସହ ଚୋରାରେ ମଦ କାରବାର । ପୂର୍ବରୁ ମଧ୍ୟ ରାଇରଙ୍ଗପୁର ଅଞ୍ଚଳରେ ଚୋରାରେ ମଦ ବିକ୍ରି ଓ ନକଲି ମଦ ପ୍ରସ୍ତୁତ ହେଉଥିବାର ଅଭିଯୋଗ ହୋଇ ଆସୁଥିଲା । ହେଲେ ଅବକାରୀ ବିଭାଗର ଏଥିପ୍ରତି ଦୃଷ୍ଟି ପଡି ପାରୁନଥିଲା । ଏବେ ନିର୍ବାଚନ ପାଖେଇ ଆସୁଥିବାରୁ ଅବକାରୀ ବିଭାଗ ପୁଣି ଥରେ ସକ୍ରିୟ ହୋଇ ଉଠିଛି ।
ରାଇରଙ୍ଗପୁର ଉପଖଣ୍ଡର ବିଭିନ୍ନ ଅଞ୍ଚଳରେ ଚଢ଼ାଉ କରିଛି ଅବକାରୀ ବିଭାଗ । ଗୋରୁମହିଷାଣୀ ଓ ପୁରୁଣାପାଣି ଅଞ୍ଚଳରେ ଅବକାରୀ ବିଭାଗ ପକ୍ଷରୁ ଚଢାଉ କରା ଯାଇଥିଲା । ତେବେ ବିପୁଳ ପରିମାଣରେ ଦେଶୀ ଓ ବିଦେଶୀ ମଦ ଜବତ ସହିତ, ବିପୁଳ ପରିମାଣରେ ସ୍ପିରିଟ, ନକଲି ଲେବୁଲ, ନକଲି ଠିପି, ମଦ ପ୍ରସ୍ତୁତ ପାଇଁ ଏସେନ୍ସ ସହିତ ନକଲି ମଦ ପ୍ରସ୍ତୁତ ପାଇଁ ସରଞ୍ଜାମ ସବୁ ଜବତ କରିଛି ବିଭାଗ । ଏଥିସହି ମଦ ମାଫିଆମାନଙ୍କ ନିକଟରୁ ଏକ ହିରୋ ଡିଲକ୍ସ ବାଇକ ଜବତ କରିଛି ବିଭାଗ ।
ଆଜିର ଏହି ଚଢାଉ କରାଯାଇ ପୁରୁଣାପାଣିରୁ ୪ ଜଣ ଅଭିଯୁକ୍ତ ଓ ଗୋରୁମହିଷାଣୀରୁ 5 ଜଣ ଅଭିଯୁକ୍ତଙ୍କୁ ଗିରଫ କରିଛି ଅବକାରୀ ବିଭାଗ । ତେବେ ଅଭିଯୁକ୍ତମାନେ ହେଲେ ପୁରୁଣାପାଣିର ରାମପ୍ରସାଦ ମହାନ୍ତ, କୁନ୍ତଳା ମହାନ୍ତ, ସଞ୍ଜନ ମହାନ୍ତ ଓ ଦେବେନ ମହାନ୍ତ । ସେହିପରି ଗୋରୁମହିଷାଣୀର ରାମେଶ୍ବର ବାରିକ, ବିଦ୍ୟାପତି ମହାକୁଡ଼, ତପନ ମହାକୁଡ଼, ମୁକେଶ ସାହୁ ଓ ନରେନ୍ଦ୍ର ଗିରି । ଏହି କାରବାରରେ ଆଉ କେତେ ଜଣଙ୍କ ସମ୍ପୃକ୍ତି ରହିଛି ସେନେଇ ସମସ୍ତଙ୍କୁ ପଚରାଉଚରା ଜାରି ରଖିଛି ଅବକାରୀ ବିଭାଗ ।
ଏହା ମଧ୍ୟ ପଢନ୍ତୁ .....ବେଗୁନିଆରେ ବିପୁଳ ପରିମାଣର ଦେଶୀ ମଦ ଜବତ, ଡ୍ରାଇଭର ଗିରଫ - Liquors Seized In Begunia
ଆଜିର ଏହି ଚଢ଼ାଉରେ ଅବକାରୀ ଉପଅଧୀକ୍ଷକଙ୍କ ସମେତ ରାଇରଙ୍ଗପୁର, ବିଶୋଇ ଓ ବହଳଦାର ଅବକାରୀ ଅଧିକାରୀ ଓ କର୍ମଚାରୀ ମାନେ ସାମିଲ ହୋଇଥିଲେ । ତେବେ ରାଇରଙ୍ଗପୁର ସହରରେ ମଧ୍ୟ ଖୁଲମଖୁଲା ଚୋରାରେ ମଦ, ଗଞ୍ଜେଇ ଓ ଡ୍ରଗ୍ସ ଆଦିର କାରବାର ଚାଲୁଥିବାବେଳେ ଅବକାରୀ ବିଭାଗ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି ।
ଇଟିଭି ଭାରତ, ମୟୂରଭଞ୍ଜ
