ଆଦିବାସୀଙ୍କ ବିକାଶ ପାଇଁ ମୋଦି ସରକାରଙ୍କ ଅବଦାନ ଅତୁଳନୀୟ: ଅନନ୍ତ ନାଏକ

ଭୁବନେଶ୍ବର: ଆଦିବାସୀଙ୍କ ବିକାଶ ପାଇଁ ମୋଦି ସରକାରଙ୍କ ଅବଦାନ ଅତୁଳନୀୟ ବୋଲି ସାମ୍ବାଦିକ ସମ୍ମିଳନୀରେ ଦାବି କରିଛନ୍ତି ଜାତୀୟ ଜନଜାତି କମିଶନ ସଦସ୍ୟ ଅନନ୍ତ ନାଏକ ଓ କେନ୍ଦ୍ର ଆଦିବାସୀ ବ୍ୟାପାର ରାଷ୍ଟ୍ରମନ୍ତ୍ରୀ ବିଶ୍ବେଶ୍ବର ଟୁଡୁ । ୮ ଜଣ ଆଦିବାସୀ ସାଂସଦଙ୍କୁ ମନ୍ତ୍ରୀ ପଦ ଦିଆଯାଇଛି । ଜଣେ ଆଦିବାସୀ ମହିଳାଙ୍କୁ ରାଷ୍ଟ୍ରପତି କରାଯାଇଛି । ଆଦିବାସୀ ମାନେ ସଚେତନ ହୁଅନ୍ତୁ, ଜନଜାତିଙ୍କ ପାଇଁ କାମ କରୁଥିବା ଦଳ ହେଉଛି ବିଜେପି ବୋଲି କହିଛନ୍ତି ଉଭୟ ।

ଜାତୀୟ ଜନଜାତି କମିଶନ ସଦସ୍ୟ ତଥା ବିଜେପି ନେତା ଅନନ୍ତ ନାଏକ କହିଛନ୍ତି, "ଆଦିବାସୀଙ୍କ ବିକାଶ ପାଇଁ ମୋଦି ସରକାରଙ୍କ ଅବଦାନ ଅତୁଳନୀୟ । ଆଦିବାସୀଙ୍କୁ ସମ୍ମାନ ଦେଇଛି ବିଜେପି । ୮ ଜଣ ଆଦିବାସୀ ସାଂସଦଙ୍କୁ ମନ୍ତ୍ରୀ ପଦ ଦିଆଯାଇଛି । ଜଣେ ଆଦିବାସୀ ମହିଳାଙ୍କୁ ରାଷ୍ଟ୍ରପତି କରାଯାଇଛି । ୨୦୨୫ ସୁଦ୍ଧା ଓଡ଼ିଶାର ସବୁ ଗାଁକୁ ଯୋଜନାରେ ଅନ୍ତର୍ଭୁକ୍ତ କରାଯିବ । ଆଦିବାସୀମାନେ ସଚେତନ ହୁଅନ୍ତୁ । ଜନଜାତିଙ୍କ ପାଇଁ କାମ କରୁଥିବା ଦଳ ହେଉଛି ବିଜେପି । ବାଜପେୟୀ ଏବଂ ମୋଦିଙ୍କ କାର୍ଯ୍ୟକାଳ ସମୟରେ ଆଦିବାସୀଙ୍କର ଅଧିକ ବିକାଶ ହୋଇଛି । ପରମ୍ପରା ଆଧାରରେ ଜନଜାତି ସମାଜର ବିକାଶ ହୋଇପାରିବ । 300ରୁ ଅଧିକ ବିଶ୍ବବିଦ୍ୟାଳୟରେ ଜନଜାତି ସମାଜ ଉପରେ ଗବେଷଣା ପ୍ରକ୍ରିୟା ଆରମ୍ଭ ହୋଇଛି । ଯାହାକି ଇଂରେଜ ମାନେ ନଷ୍ଟ କରିଥିଲେ । ଆଦିବାସୀ ସମାଜର ବିକାଶ ନାଁରେ ସରକାର ଅନେକ ଯୋଜନା କରିଛନ୍ତି । ପ୍ରଧାନମନ୍ତ୍ରୀ ଅଧିକ ପରିମାଣରେ ସବୁ ସ୍କିମରେ ବହୁଗୁଣରେ ଆର୍ଥିକ ସହାୟତା ଦେଇଛନ୍ତି । ବିଭିନ୍ନ ପ୍ରତିଯୋଗିତା ମୂଳକ ପରୀକ୍ଷା ସାମ୍ନା କରିବା ପାଇଁ ଏକଲବ୍ୟ ସ୍କୁଲ ସ୍ଥାପନ କରାଯାଇଛି । ପେଶା ଆଇନ ମାଧ୍ୟମରେ ଗାଁରେ ହିଁ ବିକାଶ ପାଇଁ ନିଷ୍ପତ୍ତି ନେଇ ପାରୁଛନ୍ତି । କିନ୍ତୁ ଓଡ଼ିଶାରେ ଦୁର୍ଭାଗ୍ୟବଶତଃ ଏବେ ଯାଏଁ ପେଶା ଆଇନ ଲାଗୁ ହୋଇପାରିନାହିଁ ।"

ସେହିଭଳି କେନ୍ଦ୍ର ଆଦିବାସୀ ବ୍ୟାପାର ରାଷ୍ଟ୍ରମନ୍ତ୍ରୀ ବିଶ୍ବେଶ୍ବର ଟୁଡୁ କହିଛନ୍ତି, "ପ୍ରଥମ ଆଦିବାସୀ ରାଷ୍ଟ୍ରପତି ଦ୍ରୌପଦୀ ମୁର୍ମୁ, ପ୍ରଥମ କରି ଜୁଏଲ ଓରାମଙ୍କୁ ଆଦିବାସୀ ବିଭାଗର କେନ୍ଦ୍ରମନ୍ତ୍ରୀ କରାଯାଇଥିଲା । ମୋଦି ପ୍ରଧାନମନ୍ତ୍ରୀ ହେବା ପରେ ପ୍ରଥମେ ଶିକ୍ଷାକୁ ଅଧିକ ଧ୍ୟାନ ଦେଇଥିଲେ । ଦେଶରେ ୭୦୦ ଏକଲବ୍ୟ ସ୍କୁଲ, ଓଡ଼ିଶାରେ ୮୭ଟି ଏକଲବ୍ୟ ସ୍କୁଲ କରିଛନ୍ତି ମୋଦି । ୭୦ରୁ ଊର୍ଦ୍ଧ୍ବ ଏକଲବ୍ୟ ସ୍କୁଲର ଭୂମି ପୂଜନ କରାଯାଇଛି, କାମ ମଧ୍ୟ ଚାଲିଛି । ପ୍ରଧାନମନ୍ତ୍ରୀଙ୍କ ଉଦ୍ୟମରେ ସିକଲସେଲ୍‌ ଚିକିତ୍ସା ପାଇଁ ବିଭିନ୍ନ ଜିଲ୍ଲାରେ କାର୍ଯ୍ୟକ୍ରମ କରାଯାଇଛି । କୋଭିଡ ମହାମାରୀ ବେଳେ ଜନଜାତି ବହୁଳ ଅଞ୍ଚଳରେ ସଚେତନତା ଏବଂ ଚିକିତ୍ସା ସେବା ପହଞ୍ଚି ପାରିଥିଲା । କେନ୍ଦ୍ର ସରକାରଙ୍କ ୯ଟି ବିଭାଗ ମିଳିତ ଭାବେ ଜନଜାତିଙ୍କ ବିକାଶ ପାଇଁ କାମ କରୁଛନ୍ତି । ୧୨୦ଟି ଜନଜାତିର ତଥ୍ୟ ଓଡ଼ିଶା ସରକାର ଆଜି ଯାଏଁ ଠିକଭାବେ ଦେଇ ପାରିଲେ ନାହିଁ । ଗତ ସଂସଦ ଅଧିବେଶନ ଓଡ଼ିଶାର ୪୯ ଆଦିବାସୀ ସମୁଦାୟଙ୍କୁ ତାଲିକା ଭୁକ୍ତ କରିଛନ୍ତି କେନ୍ଦ୍ର ସରକାର । ବିଜେପି ସରକାର ହିଁ ପ୍ରଥମେ ଜନଜାତି ବିଭାଗ ତିଆରି କଲା । ଅଟଳ ବିହାରୀ ବାଜପେୟୀଙ୍କ ଠାରୁ ଆରମ୍ଭ କରି ନରେନ୍ଦ୍ର ମୋଦି ଆଦିବାସୀ ମାନଙ୍କ ଉନ୍ନତି ପାଇଁ ଅନେକ କାର୍ଯ୍ୟ କରିଛନ୍ତି ।"

ଇଟିଭି ଭାରତ, ଭୁବନେଶ୍ବର