ନୂଆଦିଲ୍ଲୀ: ଆଜି ଭାରତୀୟ ଜନତା ପାର୍ଟି (ବିଜେପି) ସାଧାରଣ ନିର୍ବାଚନ ପାଇଁ ଇସ୍ତାହାର ଘୋଷଣା କରିଛି । ‘ମୋଦି ଗ୍ୟାରେଣ୍ଟି’ ନାମରେ ଦଳ ଆଜି ଏକାଧିକ ପ୍ରସଙ୍ଗରେ ବଡ ପ୍ରତିଶୃତି ଘୋଷଣା କରିଛି । ତମାମ ଦଳୀୟ ନେତାଙ୍କ ଉପସ୍ଥିତିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଏହି ଘୋଷଣାପତ୍ର ଉନ୍ମୋଚନ କରିଛନ୍ତି । ଏହି ଘୋଷଣାନାମାକୁ ନାପସନ୍ଦ କରିବା ସହ ବିରୋଧୀ କଂଗ୍ରେସ କଡା ଭାଷାରେ ସମାଲୋଚନା କରିଛି । ଏହି ଘୋଷଣାପତ୍ର କେବଳ ଏକ ମିଥ୍ୟା ପ୍ରତିଶୃତିର ବଣ୍ଡଲ । ଏଥିରେ ନିଯୁକ୍ତି ଓ ଦେଶରେ ଜାରି ରହିଥିବା ବେକାରୀ ସମସ୍ୟା ସମ୍ପର୍କରେ କିଛି ନାହିଁ ବୋଲି କଂଗ୍ରେସ କହିଛି ।
ସେହିପରି କଂଗ୍ରେସ ଆଜି ବିଜେପିର 2014 ନିର୍ବାଚନୀ ଇସ୍ତାହାରକୁ ମଧ୍ୟ ପୁଣି ସ୍ମରଣ କରାଇଛି । ବିଜେପି ସେତେବେଳେ ବିଦେଶୀ ବ୍ୟାଙ୍କରେ ଥିବା କଳାଧନ ଫେରାଇବା ନେଇ ପ୍ରତିଶୃତି ଦେଇଥିଲା । ହେଲେ ସେମାନେ କ୍ଷମତାର 10ବର୍ଷ ପରେ ମଧ୍ୟ ଏହା ଆଣିବାକୁ ସକ୍ଷମ ହୋଇଛନ୍ତି କି ବୋଲି ଦଳ ପ୍ରଶ୍ନ କରିଥିଲା । ସେମାନେ କଳାଧନ ଆଣିବା ପରିବର୍ତ୍ତେ ଦେଶରେ ନିର୍ବାଚନୀ ବଣ୍ଡ ଯୋଜନା କାର୍ଯ୍ୟକାରୀ କଲେ ବୋଲି କଂଗ୍ରେସ ପାଲଟା ଅଭିଯୋଗ କରିଛି ।
କଂଗ୍ରେସ ମୁଖ୍ୟ ମଲ୍ଲିକାର୍ଜୁନ ଖଡଗେ ଏହି ଘୋଷଣାକୁ ନେଇ ଉଭୟ ବିଜେପି ଓ ପ୍ରଧାନମନ୍ତ୍ରୀଙ୍କୁ ସମାଲୋଚନା କରିଛନ୍ତି । ବିଜେପି ପୂର୍ବ ନିର୍ବାଚନଗୁଡିକରେ ମଧ୍ୟ ଯେଉଁ ପ୍ରତିଶୃତି ଦେଇଥିଲା, ତାହା ଏପର୍ଯ୍ୟନ୍ତ ପୂରଣ ହୋଇପାରନି । ଏହା କେବଳ ପୂର୍ବ ମିଛ ଘୋଷଣାର ଏକ ନକଲ । ବିଜେପି ଗତ 10 ବର୍ଷ କ୍ଷମତାରେ ରହିବା ପରେ ମଧ୍ୟ ଦେଶରେ ଯୁବପିଢି ଓ କୃଷକଙ୍କ ପାଇଁ କିଛି କରିନି । ଉଭୟ ବର୍ଗ ଏବେ ରାସ୍ତାକୁ ଆସିବାକୁ ବାଧ୍ୟ ହେଉଛନ୍ତି । ବେକାରୀ ଓ ମୁଦ୍ରାସ୍ଫୀତି ପରି ସମସ୍ୟା ବିଜେପି ଅମଳରେ ବୃଦ୍ଧି ପାଇଛି । ବିଜେପି ନିଜ ନିର୍ବାଚନୀ ଘୋଷଣାପତ୍ରରେ ସେ ସମ୍ପର୍କରେ କିଛି ଉଲ୍ଲେଖ କରିନଥିବା ଖଡଗେ ଅଭିଯୋଗ କରିଛନ୍ତି ।
ଅନ୍ୟପଟେ କଂଗ୍ରେସ ଇସ୍ତାହାର କମିଟି ସଦସ୍ୟ ତଥା ଛତିଶଗଡ ପୂର୍ବତନ ଉପମୁଖ୍ୟମନ୍ତ୍ରୀ ଟି.ଏସ ସିଂଦେଓ କହିଛନ୍ତି, କଂଗ୍ରେସ ସମସ୍ତ ବର୍ଗକୁ ଦୃଷ୍ଟିରେ ରଖି ନିଜର ନିର୍ବାଚନୀ ଇସ୍ତାହାର ଘୋଷଣା କରିଛି । ଦଳ ବିଭିନ୍ନ ବର୍ଗରୁ ମତାମତ ସଂଗ୍ରହ କରି ଦୀର୍ଘ 3ମାସ ବିଚାରବିମର୍ଶ କରିବା ପରେ ଇସ୍ତାହାର ପ୍ରସ୍ତୁତ କରିଛି । ଯୁବପିଢିଙ୍କ ପାଇଁ ନିଯୁକ୍ତି ଓ ମୁଦ୍ରାସ୍ଫୀତି ନିୟନ୍ତ୍ରଣ କଂଗ୍ରେସର ମୁଖ୍ୟ ଏଜେଣ୍ଡା ରହିଛି । ମାତ୍ର ବିଜେପି ଇସ୍ତାହାରରେ ଏହାର ଉଲ୍ଲେଖ ମଧ୍ୟ ନାହିଁ ।
ଏଠାରେ ସୂଚନାଯୋଗ୍ୟ ଯେ, ଆଜି ଭାରତୀୟ ଜନତା ପାର୍ଟି ଘୋଷଣା କରିଥିବା ଇସ୍ତାହାରରେ ଗୋଟିଏ ଦେଶ, ଗୋଟିଏ ନିର୍ବାଚନ, ଦେଶରେ ଏକକ ନାଗରିକ ସଂହିତା କାର୍ଯ୍ୟକାରୀ, ଅଲିମ୍ପିକ୍ସ ଆୟୋଜନ, କୃଷକଙ୍କ ଏମଏସପି ବୃଦ୍ଧି, ବନ୍ଦେ ଭାରତ ମେଟ୍ରୋ ସେବା ଓ ବିଭିନ୍ନ କ୍ଷେତ୍ରରେ ଭିତ୍ତିଭୂମି ସୁଦୃଢୀକରଣ ପରି ବଡ ପ୍ରତିଶୃତି ରହିଛି । ଏହି ପ୍ରତିଶୃତିକୁ ପାଥେୟ କରି ଦଳ ଏବେ ଦେଶବ୍ୟାପୀ ଭୋଟ ମାଗିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
