ବାଲେଶ୍ବର: ବାଲେଶ୍ବରରେ ପାରଦ ୪୫ ଡିଗ୍ରୀ ପାର ହୋଇଥିବା ବେଳେ ବଢିବାରେ ଲାଗିଛି ରାଜନୈତିକ ଉଷ୍ମତା । ବାଲେଶ୍ବର ସଦର ବିଧାନସଭା ଆସନର କଂଗ୍ରେସ ବିଧାୟିକା ପ୍ରାର୍ଥୀ ମୋନାଲିସା ଲେଙ୍କା ତାଙ୍କର ନିର୍ବାଚନୀ ପ୍ରଚାର ଆରମ୍ଭ କରିଛନ୍ତି । ବାଲେଶ୍ବର ସହରର ମିର୍ଜାପୋଖରୀ ଠାରେ ଥିବା ସାଇ ମନ୍ଦିରରେ ପୂଜାର୍ଚ୍ଚନା କରି ଆଶୀର୍ବାଦ ନେଇ ତାଙ୍କର ପ୍ରଚାର ଆରମ୍ଭ କରିଥିଲେ । ଆଖପାଖରେ ଥିବା ଦୋକାନୀମାନଙ୍କୁ କଂଗ୍ରେସ ଗ୍ୟାରେଣ୍ଟି କାର୍ଡ ପ୍ରଦାନ କରିବା ସହ ଚଳିତ ନିର୍ବାଚନରେ ସମର୍ଥନ ପାଇଁ ଲୋକମାନଙ୍କୁ ନିବେଦନ କରିଥିଲେ ।
ଏହା ମଧ୍ୟ ପଢନ୍ତୁ ... କଂଗ୍ରେସ ପ୍ରାର୍ଥୀଙ୍କ ନିର୍ବାଚନୀ ପ୍ରଚାର, ବିଜେଡି ଓ ବିଜେପି ଉପରେ ବର୍ଷିଲେ ଶ୍ରୀକାନ୍ତ ଜେନା - Congress Campaign In Balasore
ସେ ହାତରେ କଂଗ୍ରେସର ଗ୍ୟାରେଣ୍ଟି କାର୍ଡ ସାଙ୍ଗକୁ ମହିଳା କଂଗ୍ରେସ କର୍ମୀମାନଙ୍କ ସହ ଏକଜୁଟ ହୋଇ ଘର ଘର ବୁଲି ପ୍ରଚାର କରିଥିଲେ । ସ୍ବାମୀ ସରୋଜ ଲେଙ୍କା ସ୍ତ୍ରୀଙ୍କ ମିଶି ଭୋଟ ଭିକ୍ଷା କରିଥିବା ଦେଖିବାକୁ ମିଳିଥିଲା । ପ୍ରଚାର ବେଳେ ଲୋକମାନଙ୍କ ସମର୍ଥନ ମିଳୁଥିବା ଏବଂ ସେମାନେ ଏଥର କଂଗ୍ରେସ ପ୍ରତି ନିଜର ମତ ସାଵ୍ୟସ୍ତ କରିବେ ବୋଲି ମୋନାଲିସା ସାମଲ କହିଛନ୍ତି । ଏମିତିକି ବିଜେଡି ଏବଂ ବିଜେପି ଗୋଟିଏ ମୁଦ୍ରାର ଦୁଇଟି ପାର୍ଶ୍ଵ ବୋଲି କହିଥିବା ବେଳେ କାଳେ ସେମାନେ ମେଣ୍ଟ କଲେ କଂଗ୍ରେସ ଫାଇଦା ନେବ ବୋଲି ସେମାନେ ଭିତିରିଆ ମେଣ୍ଟ କରିଥିବା କହିଛନ୍ତି ମୋନାଲିସା । ଯେଉଁକଥା ସାଧାରଣ ଲୋକେ ବୁଝି ସାରିଲେଣି ଏବଂ ଏଥର ନିର୍ବାଚନରେ ଉଚିତ ଜବାବ ଦେବେ ବୋଲି ମୋନାଲିସା କହିଛନ୍ତି ।
ବିଜେଡି ବିଜେପି ମେଣ୍ଟ ହୋଇ ସରକାର ଗଢିବାର ସ୍ବପ୍ନ ଦେଖିଥିବା ବେଳେ ବାଲେଶ୍ବରରେ ପ୍ରାୟତଃ ବେକାରୀ ଯୁବକ ଯୁବତୀମାନଙ୍କୁ ରୋଜଗାର ଦେଉଥିବା କଳ କାରଖାନା ବନ୍ଦ ହୋଇଗଲାଣି ଏବଂ କିଛି ବନ୍ଦ ହେବାକୁ ବସିଲାଣି । ସେଥିପ୍ରତି ଦୁଇଟି ଦଳର ପ୍ରତିନିଧି 10 ବର୍ଷ ଧରି ବାଲେଶ୍ବରବାସୀଙ୍କ ପ୍ରତିନିଧିତ୍ବ କରିଥିବା ବେଳେ କୌଣସି ପଦକ୍ଷେପ ନେଇ ନଥିବା ମୋନାଲିସା ଅଭିଯୋଗ କରିଛନ୍ତି । ସେହିପରି ବାଲେଶ୍ବରରେ ଇଂଜିନିୟରିଂ କଲେଜରେ ପ୍ରତିବର୍ଷ ପିଲା ପାସ କରି ଚାକିରି ନ ପାଇ ବାହାର ରାଜ୍ୟକୁ ଚାଲି ଯାଉଛନ୍ତି, ବାଲେଶ୍ବରରେ ନିଯୁକ୍ତି ସୁଯୋଗ କଥା ପୂର୍ବରୁ ଦୁଇଟି ଦଳର ନେତାମାନେ ଚିନ୍ତା କରି ନାହାଁନ୍ତି । ଯାହାକି ଏଥର ସାଧାରଣ ଲୋକଙ୍କ ସମର୍ଥନ ଏବଂ ଆଶୀର୍ବାଦ ରହିଲେ ତାହା ପୂରଣ କରାଯିବ ବୋଲି ମୋନାଲିସା କହିଛନ୍ତି । ତେବେ ଆଗାମୀ ଦିନରେ ବିଜେଡି ଏବଂ ବିଜେପିର ପ୍ରାର୍ଥୀ ମାନଙ୍କ ମଧ୍ୟରେ ମୋନାଲିସା କେମିତି ନିଜର ପତିଆରା ବିସ୍ତାର କରୁଛନ୍ତି ତାହାହିଁ ଦେଖିବାକୁ ବାକି ରହିଲା ।
ଇଟିଭି ଭାରତ, ବାଲେଶ୍ବର
