ଜଗତସିଂହପୁର: 'ଆମ ଓଡିଶା ନବୀନ ଓଡିଶା' କାର୍ଯ୍ୟକ୍ରମକୁ ନେଇ ବିବାଦ । ଏଭଳି ଘଟଣା ଘଟିଛି ଜଗତସିଂହପୁର ଜିଲ୍ଲା ସଦର ବ୍ଲକ ଅନ୍ତର୍ଗତ ମଧୁସୂଦନପୁର ଶାସନ ପଞ୍ଚାୟତରେ । ଏହି ପଞ୍ଚାୟତରେ ଆମ ଓଡ଼ିଶା ନବୀନ ଓଡିଶା କାର୍ଯ୍ୟକ୍ରମରେ ସରକାରୀ କର୍ମଚାରୀଙ୍କ ନିର୍ଦ୍ଦିଷ୍ଟ ଦଳୀୟ ପତାକାକୁ ନେଇ ଦେଖାଦେଇଛି ବିବାଦ । ଏହାପରେ ଜିଲ୍ଲା କଂଗ୍ରେସ ପକ୍ଷରୁ ତୀଵ୍ର ପ୍ରତିକ୍ରିୟା ପ୍ରକାଶ ପାଇଥିବା ବେଳେ କାର୍ଯ୍ୟାନୁଷ୍ଠାନ ନେଇ ଦାବି ହୋଇଛି । ଆମ ଓଡିଶା ନବୀନ ଓଡିଶା କାର୍ଯ୍ୟକ୍ରମ ନାଁରେ ଦଳର ମାର୍କେଟିଂ କାର୍ଯ୍ୟ ହେଉଥିବା ନେଇ କଂଗ୍ରେସ ଅଭିଯୋଗ କରିଛି ।
ସୂଚନା ଅନୁସାରେ ମଧୁସୂଦନପୁର ଶାସନ ପଞ୍ଚାୟତରେ ଗତ ଶୁକ୍ରବାର ଦିନ ଆମ ଓଡ଼ିଶା ନବୀନ ଓଡ଼ିଶା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏହି କାର୍ଯ୍ୟକ୍ରମରେ ଜଗତସିଂହପୁର ବିଧାୟକ ପ୍ରଶାନ୍ତ କୁମାର ମୁଦୁଲି, ଜିଲ୍ଲା ପରିଷଦ ସଭାପତି ମନୋଜ କୁମାର ଭୋଇ, ଜଗତସିଂହପୁର ପଞ୍ଚାୟତ ସମିତି ଅଧ୍ୟକ୍ଷ କନକପ୍ରଭା ଲେଙ୍କା ଯୋଗଦେବାର କାର୍ଯ୍ୟକ୍ରମ ରହିଥିଲା । କିନ୍ତୁ ବିଧାୟକ ନ ଆସିବାରୁ ପଞ୍ଚାୟତ ସମିତି ଅଧ୍ୟକ୍ଷ କନକପ୍ରଭା ଲେଙ୍କା ଏହି କାର୍ଯ୍ୟକ୍ରମକୁ ପରିଚାଳନା କରିଥିଲେ । ଏହି କାର୍ଯ୍ୟକ୍ରମରେ ପଞ୍ଚାୟତର ବିଭିନ୍ନ ମହିଳା ସ୍ବୟଂ ସହାୟକ ଗୋଷ୍ଠୀର ମହିଳାମାନଙ୍କୁ ଅଣାଯାଇଥିଲା । ତେବେ ଏହି କାର୍ଯ୍ୟକ୍ରମରେ ପଞ୍ଚାୟତରେ କାର୍ଯ୍ୟରତ ସି.ଆର.ପି ମାନଙ୍କୁ ଦଳୀୟ ଉତ୍ତରୀୟ ଦିଆଯାଇଥିଲା ।
ଏହା ମଧ୍ୟ ପଢନ୍ତୁ ... ଦୁର୍ନୀତିରେ ଉବୁଟୁବୁ ମାଲକାନଗିରି ପୌରପରିଷଦ, ଆନ୍ଦୋଳନ ଚେତାବନୀ ଦେଲା କଂଗ୍ରେସ
ଏହି ଫଟୋ ଭାଇରାଲ ହେବାପରେ ଜିଲ୍ଲା କଂଗ୍ରେସ ପକ୍ଷରୁ ତୀଵ୍ର ପ୍ରତିକ୍ରିୟା ପ୍ରକାଶ ପାଇଛି । ଜିଲ୍ଲା ଯୁବ କଂଗ୍ରେସର ଉପସଭାପତି ଲିପୁ ମହାନ୍ତି ଅଭିଯୋଗ କରିଛନ୍ତି ଯେ ଜଗତସିଂହପୁର ବ୍ଲକ କାହିଁକି ସମଗ୍ର ଜିଲ୍ଲାରେ ସରକାରୀ କାର୍ଯ୍ୟକ୍ରମକୁ ବିଜେଡିର ଦଳୀୟ କାର୍ଯ୍ୟକ୍ରମ ଭାବେ ପରିଣତ କରାଯାଇଛି । ଏହା ସମ୍ପୂର୍ଣ୍ଣ ଭାବେ ପ୍ରହସନ ଯାହା ଗଣତନ୍ତ୍ରକୁ ହତ୍ୟା ସଦୃଶ । ଜିଲ୍ଲାରେ ସରକାରୀ କର୍ମଚାରୀ ମାନେ ମଧ୍ୟ ଦଳୀୟ କର୍ମୀ ଭାବରେ କାର୍ଯ୍ୟ କରୁଛନ୍ତି । ଏହା ଦ୍ୱାରା କେବଳ ବିଜେଡି ଦଳର ମାର୍କେଟିଂ କାମ ହେଉଛି ।
ଖାଲି ମଧୁସୂଦନପୁର ଶାସନ ପଞ୍ଚାୟତ କାହିଁକି ଜଗତସିଂହପୁର ନିର୍ବାଚନ ମଣ୍ଡଳୀ ଅଧୀନ ସଦରବ୍ଲକର 30 ଟି ପଞ୍ଚାୟତ ଓ ନାଉଗାଁ ବ୍ଲକର 16ଟି ପଞ୍ଚାୟତରେ କରାଯାଉଥିବା ଆମ ଓଡ଼ିଶା, ନବୀନ ଓଡିଶା କାର୍ଯ୍ୟକ୍ରମ ସମ୍ପୂର୍ଣ୍ଣ ଭାବେରେ ଦଳୀୟ କାର୍ଯ୍ୟକ୍ରମ ପରିବର୍ତ୍ତନ କରି ଦିଆସାରିଲାଣି । ଏହାକୁ ଜିଲ୍ଲା ଯୁବ କଂଗ୍ରେସ ବିରୋଧ କରି ଆସୁଛି । ମଧୁସୂଦନପୁର ଶାସନ ପଞ୍ଚାୟତରେ ସରକାରୀ କର୍ମଚାରୀଙ୍କ ଯେଉଁଭଳି ଜନଗହଳି ସଭା ମଧ୍ୟରେ ଦଳୀୟ ଉତ୍ତରୀୟ ପକାଇ କାର୍ଯ୍ୟକ୍ରମ କରାଗଲା ତାହା ଅକ୍ଷମଣୀୟ ଅପରାଧ । ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ କଂଗ୍ରେସ ଦାବି କରିଛି ।
ଇଟିଭି ଭାରତ, ଜଗତସିଂହପୁର
