ଭୁବନେଶ୍ବର: ପୂର୍ବତନ ବଲାଙ୍ଗୀର ଜିଲ୍ଲା ବିଜେପି ସଭାପତି ପ୍ରଭାସ ପାଣିଗ୍ରାହୀ ଆଜି ବିଜେଡିରେ ସାମିଲ ହୋଇଛନ୍ତି । ଶଙ୍ଖ ଭବନରେ ଅନୁଷ୍ଠିତ ଏକ ମିଶ୍ରଣ ପର୍ବ କାର୍ଯ୍ୟକ୍ରମରେ ସେ ବିଜେଡିରେ ଯୋଗ ଦେଇଛନ୍ତି । ପୂର୍ବତନ ବଲାଙ୍ଗୀର ସାଂସଦ ତଥା ବଲାଙ୍ଗୀର ବିଧାନସଭା ଆସନର ବିଜେଡି ବିଧାୟକ ପ୍ରାର୍ଥୀ କଳିକେଶ ସିଂହଦେଓ, ରାଜ୍ୟସଭା ସାଂସଦ ଡକ୍ଟର ସସ୍ମିତ ପାତ୍ରଙ୍କ ଉପସ୍ଥିତିରେ ଏହି ମିଶ୍ରଣ କାର୍ଯ୍ୟକ୍ରମ ଅନୁଷ୍ଠିତ ହୋଇଛି । ପ୍ରଭାସଙ୍କ ସହିତ ଅନ୍ୟ ଦୁଇ ବରିଷ୍ଠ ନେତା ସ୍ବରମ୍ୟ ବବି ମିଶ୍ର ଏବଂ ବିନୋଦ ବିହାରୀ ନାଗ ମଧ୍ୟ ବିଜେଡିରେ ଯୋଗ ଦେଇଛନ୍ତି ।
ବିଜେପି ଛାଡି ସେମାନେ ବିଜେଡିରେ ମିଶି ଦଳର ଶକ୍ତି ବୃଦ୍ଧି ହୋଇଥିବା କହିଛନ୍ତି ସାଂସଦ ସସ୍ମିତ ପାତ୍ର । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ପକ୍ଷରୁ ସେମାନଙ୍କୁ ସେ ଦଳକୁ ସ୍ବାଗତ କରିଛନ୍ତି । ବଲାଙ୍ଗୀର ବିଜେଡି ବିଧାୟକ ପ୍ରାର୍ଥୀ କଳିକେଶ ନାରାୟଣ ସିଂଦେଓ କହିଛନ୍ତି ଯେ, ନୂଆ ଆକାରରେ ବିଜେପି ଛାଡି ବିଜେଡିରେ ମିଶିଛନ୍ତି । ବିଜେଡି ପରିବାରକୁ ସ୍ବାଗତ । ବିଜେପି ପାଇଁ ଅନେକ କାମ କରିଥିଲେ । ଆମ ସହ ମିଶି ସେମାନେ ସାମାଜିକ, ଶିକ୍ଷା, ସାହିତ୍ୟରେ ସହଯୋଗ କରିବେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ କାର୍ଯ୍ୟକ୍ରମରେ ପ୍ରେରଣାରେ ସେ ମିଶିଛନ୍ତି । ମିଶିକି ବଲାଙ୍ଗୀର ବିକାଶ କରିବୁ ।
ଏହା ମଧ୍ୟ ପଢନ୍ତୁ ... ବିଜେପିରେ ରାଣୀ ସୁଜ୍ଞାନୀ ଦେଓଙ୍କ ଶତାଧିକ ସମର୍ଥକ, ପୀତବାସ ଓ ସୀତାରାମ ବି ଧରିଲେ ପଦ୍ମ - BJP Joining Program
ବିଜେଡ଼ିରେ ସାମିଲ ହୋଇଥିବା ପ୍ରଭାସ ପାଣିଗ୍ରାହୀ କହିଛନ୍ତି ଯେ, ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଆଦର୍ଶ ଓ ଜନପ୍ରିୟ କାର୍ଯ୍ୟ ଦ୍ବାରା ଅନୁପ୍ରାଣିତ ହୋଇ ବିଜେଡିରେ ଯୋଗ ଦେଇଛି । ବଡ଼ ହୃଦୟ ଓ ଭାବପ୍ରବଣତାକୁ ନେଇ ବିଜେଡିରେ ସାମିଲ ହୋଇଛି । ଦଳରେ ମୁଁ ଭାଇ ପରି ସେବା କରିବି । ବଲାଙ୍ଗୀର ରାଜନୀତି ପାଇଁ କହିବି ଯେ ୨୦୨୯ରେ ବିଜେପିକୁ ୫୦ ବର୍ଷ ହେବେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆହ୍ବାନ ଦେଉଛନ୍ତି କଂଗ୍ରେସ ମୁକ୍ତ ଭାରତ । ହେଲେ ବଲାଙ୍ଗୀରରେ କଂଗ୍ରେସ ଯୁକ୍ତ ବିଜେପି ରହିଛି । ଯେଉଁଥିପାଇଁ ମୁଁ ବିଜେପି ଛାଡ଼ିଲି । ବିଜେଡିରେ ଶ୍ରଦ୍ଧା, ପ୍ରେମ ଓ ଭକ୍ତିର ଆଶା ରଖିଛି । ନବୀନ ପଟ୍ଟନାୟକଙ୍କ କାମରେ ସହାଭାଗିତା ନେଇ କାମ କରିବି ଓ ସ୍ବାଭିମାନ ନେଇ ଦଳରେ ମିଶିଲି । ଶେଷରେ ବିଜେଡ଼ି ମୁଖପାତ୍ର ଡଃ ପ୍ରିୟବ୍ରତ ମାଝୀ ଧନ୍ୟବାଦ ଅର୍ପଣ କରିଥିଲେ ।
ଇଟିଭି ଭାରତ, ଭୁବନେଶ୍ବର
