ହାଇଦ୍ରାବାଦ: କିଛି ଦିନର ବ୍ୟବଧାନ ମଧ୍ୟରେ ପୁଣି ଚରମ ତିକ୍ତତା ଆଡକୁ ବଢିବାକୁ ଯାଉଛି ଇରାନ ଓ ଇସ୍ରାଏଲ ମଧ୍ୟରେ ଲାଗିଥିବା ବିବାଦ । ପୂର୍ବରୁ ଇସ୍ରାଏଲ ଉପରେ ଡ୍ରୋନ ଆକ୍ରମଣ କରିସାରିଥିବା ଇରାନ ଏବେ ପରମାଣୁ ଆକ୍ରମଣ ଧମକ ଦେଇଛି । ଇରାନର ସର୍ବୋଚ୍ଚ ନେତା ଆୟାତୁଲ୍ଲା ଅଲ୍ଲୀ ଖାମେନେଇଙ୍କର ନିକଟତମ ପରାମର୍ଶଦାତା ଇରାନ ଆଣବିକ ଶକ୍ତି ବ୍ୟବହାର କରିପାରେ ବୋଲି ସୂଚନା ଦେଇଛନ୍ତି । ଇସ୍ରାଏଲ ସହ ସଙ୍କଟ କିମ୍ବା ଆକ୍ରମଣ ପ୍ରତିଆକ୍ରମଣ ବୃଦ୍ଧି ପାଇଲେ ଇରାନ ଆଣବିକ ଶକ୍ତି ବ୍ୟବହାର କରିବାକୁ ପଛାଇବ ନାହିଁ ବୋଲି ସେ ପରୋକ୍ଷରେ ଇଙ୍ଗିତ କରିଛନ୍ତି । ଏହି ଚେତାବନୀ ସେ ଇସ୍ରାଏଲ ଉଦ୍ଦେଶ୍ୟରେ ଦେଇଥିବା ସ୍ପଷ୍ଟ ହୋଇଛି ।
ଇରାନ ରାଷ୍ଟ୍ରମୁଖ୍ୟଙ୍କ ପରାମର୍ଶଦାତା କମଲ ଖରାଜୀ କହିଛନ୍ତି, ‘‘ଆଣବିକ ଅସ୍ତ୍ର ନିର୍ମାଣ କରିବା ପାଇଁ ଇରାନ କିଛି ନିଷ୍ପତ୍ତି ନେଇନି । ମାତ୍ର ଯଦି ଇରାନରେ ଅସ୍ଥିତ୍ବ ପ୍ରତି ବିପଦ ଦେଖାଯାଏ, ତେବେ କ’ଣ କରାଯାଇପାରିବ । ଇରାନ ନିଜ ସାମରିକ ତତ୍ତ୍ୱରେ ପରିବର୍ତ୍ତନ କରିବାକୁ ବାଧ୍ୟ ହେବ । ଆବଶ୍ୟକ ପଡିଲେ ଆଣବିକ ଅସ୍ତ୍ର ନିର୍ମାଣ ଓ ବ୍ୟବହାର ମଧ୍ୟ ଇରାନ କରିବାକୁ ବାଧ୍ୟ ହେବ । କାରଣ ଏହା ବ୍ୟତୀତ ଇରାନ ନିକଟରେ ଅନ୍ୟ କୌଣସି ବିକଳ୍ପ ନିର୍ଣ୍ଣୟ ନଥିବ ।’’
ଏପ୍ରିଲ ପହିଲାରେ ଇସ୍ରାଏଲ ସିରିୟାରେ ଥିବା ଇରାନୀୟ ଦୂତାବାସ ଉପରେ ଏୟାରଷ୍ଟ୍ରାଇକ କରିଥିଲା । ଏଥିରେ ଇରାନ ରେଭୁଲୁସନେରୀ ଗାର୍ଡର କିଛି ସୈନିକଙ୍କ ସମେତ ଏକାଧିକ କୂଟନୈତିକ ଅଧିକାରୀଙ୍କ ମୃତ୍ୟୁ ହୋଇଥିଲା । ଏହାକୁ ନେଇ ମାସାଧିକ ସମୟ ଉଭୟ ପକ୍ଷ ମଧ୍ୟରେ ତିକ୍ତତା ଜାରି ରହିଥିବା ବେଳେ ଏପ୍ରିଲ ଶେଷ ଭାଗରେ ଇରାନ ଇସ୍ରାଏଲ ଅଞ୍ଚଳରେ ଡ୍ରୋନ ଆକ୍ରମଣ ମଧ୍ୟ କରିଥିଲା । ଏଥିରେ ଇସ୍ରାଏଲ ପ୍ରତିଆକ୍ରମଣ କରିବା ନେଇ ଅନୁମାନ କରାଯାଉଥିଲେ ସୁଦ୍ଧା ସେପରି କିଛି କାର୍ଯ୍ୟାନୁଷ୍ଠାନ ଗ୍ରହଣ କରିନଥିଲା ଇସ୍ରାଏଲ ଏକ ଇସ୍ରାଏଲୀ ଜାହାଜକୁ ମଧ୍ୟ ଇରାନ ଫୋର୍ସ ଆରବ ସାଗରରୁ ଅପହରଣ କରିନେଇଥିଲା । ଯେଉଁଥିରେ ଭାରତୀୟ ନାଗରିକ ଥିଲେ । ଆମେରିକା ଓ ଅନ୍ୟ କିଛି ଦେଶଙ୍କ ହସ୍ତକ୍ଷେପ ପରେ ଉଭୟ ଦେଶ ମଧ୍ୟରେ ତିକ୍ତତା ସାମାନ୍ୟ ପ୍ରଶମିତ ହୋଇଥିଲା । ହେଲେ ଆବଶ୍ୟକ ପଡିଲେ ଇରାନ ନିଜର ସୁରକ୍ଷା ଓ ଅସ୍ଥିତ୍ବ ପାଇଁ ଆଣବିକ ଅସ୍ତ୍ର ବ୍ୟବହାର କରିପାରେ ବୋଲି କହିବା ପରେ ପୁଣି ଥରେ ତିକ୍ତତା ବଢିବାକୁ ଯାଉଛି ।
ଗତବର୍ଷ ଇସ୍ରାଏଲର ଗାଜା ଆକ୍ରମଣ ପରେ ଆରବ ରାଷ୍ଟ୍ରସମୂହ ପ୍ରତିକ୍ରିୟାଶୀଳ ହୋଇଛନ୍ତି । ଇରାନ ଓ ଇସ୍ରାଏଲ ମଧ୍ୟରେ ସମ୍ପର୍କ ବିଗିଡିବାର କାରଣ ମଧ୍ୟ ଏହି ଯୁଦ୍ଧ । ଇରାନ ସମର୍ଥନରେ ଲେବନନରେ ସକ୍ରିୟ ଥିବା ହିଜବୁଲ୍ଲା ଆତଙ୍କବାଦୀ ସଂଗଠନ ଇସ୍ରାଏଲ ସୀମାରେ ଆକ୍ରମଣ କରିଥିଲା । ଯାହା ଫଳରେ ସିରିୟାର ଏକାଧିକ ଠିକଣାରେ ଇସ୍ରାଏଲ ଏୟାର ଷ୍ଟ୍ରାଇକ କରିଥିଲା । ଏଥିରେ ଇରାନର ଦୂତାବାସ ମଧ୍ୟ ଆକ୍ରମଣର ଶିକାର ହୋଇଥିଲା । ୟେମେନର ହୁତି ଆତଙ୍କୀ ସଂଗଠନ ମଧ୍ୟ ଇରାନ ସହାୟତାରେ ଲୋହିତ ସାଗର ଓ ଆରବ ଖାଡିରେ ନିୟମିତ ହାଜଜ ଆକ୍ରମଣ କରୁଥିବା ଅଭିଯୋଗ ହୋଇଥିଲା । ଏହାକୁ ନେଇ ଉଭୟ ଆମେରିକା ଓ ଇସ୍ରାଏଲ ଇରାନକୁ ଦୋଷାରୋପ କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
