ଲକ୍ଷ୍ନୌ: ପରୀକ୍ଷା ଖାତାରେ 'ଜୟ ଶ୍ରୀରାମ', 'ଜୟ ହନୁମାନ' ଲେଖି ପାସ୍ ହେଲେ ଛାତ୍ର । ତା' ପୁଣି ଫାଷ୍ଟ କ୍ଲାସରେ । କଥାଟା ଶୁଣିବାକୁ ଅଜବ ଲାଗୁଥିଲେ ବି ଏମିତି କିଛି ଘଟଣା ସାମ୍ନାକୁ ଆସିଛି ଉତ୍ତରପ୍ରଦେଶରୁ । ଏଠାରେ ଥିବା ବୀର ବାହାଦୂର ସିଂହ ବିଶ୍ବବିଦ୍ୟାଳୟର ଫାର୍ସାମୀ ବିଭାଗର କିଛି ଛାତ୍ରଙ୍କୁ ପରୀକ୍ଷା ଖାତାରେ ସଠିକ୍ ଉତ୍ତର ନଦେଇ ଜୟ ଶ୍ରୀରାମ ଲେଖିବା ସତ୍ତ୍ବେ ୬୦%ରୁ ଅଧିକ ନମ୍ବର ମିଳିଥିଲା । ଉତ୍ତରଖାତାର ପୁନଃମୂଲ୍ୟାୟନ କରାଯିବାରୁ ସେହି ପିଲା ଫେଲ୍ ନମ୍ବର ରଖିଥିବା ଜଣାପଡିଛି । ଏହି ଘଟଣା ସାମ୍ନାକୁ ଆସିବା ପରେ ବିଶ୍ବବିଦ୍ୟାଳୟର ଦୁଇ ଜଣ ପ୍ରଫେସର ବହିଷ୍କୃତ ହୋଇଛନ୍ତି ।
ଯାହା ଜଣାପଡିଛି, ଫାର୍ସାମୀ ବିଭାଗର ପ୍ରଥମ ବର୍ଷ ପରୀକ୍ଷାରେ ଅନେକ ଛାତ୍ର ଫ୍ଲାଷ୍ଟ କ୍ଲାସରେ ପାସ୍ କରିଥିଲେ । ବିଶ୍ବବିଦ୍ୟାଳୟର ଦୁଇ ପ୍ରଫେସର ଲାଞ୍ଚ ନେଇ ପିଲାଙ୍କୁ ପାସ୍ କରାଉଥିବା ଦିବ୍ୟାଂଶୁ ସିଂହ ନାମକ ଜଣେ ପୂର୍ବତନ ଛାତ୍ର ଅଭିଯୋଗ ଆଣିଥିଲେ । ସତ ଜାଣିବାକୁ ଦିବ୍ୟାଂଶୁ ଆରଟିଆଇ ଜରିଆରେ ପ୍ରଥମ ବର୍ଷର ୧୮ ଜଣ ପିଲାଙ୍କ ପରୀକ୍ଷା ଖାତା ମଗାଇଥିଲେ । ଏହାର ଯାଞ୍ଚ କରାଯିବାରୁ ଅନେକ ଛାତ୍ର ଉତ୍ତରଖାତାରେ ଜୟ ଶ୍ରୀରାମ, ଜୟ ହନୁମାନ, କ୍ରିକେଟରଙ୍କ ନାଁ ଭଳି ଏମିତି ଅନେକ ଅଜବ ଗଜବ ଉତ୍ତର ଲେଖିଥିବା ଦେଖାଯାଇଥିଲା । ତଥାପି ସେହି ଛାତ୍ରୀଙ୍କୁ ଭଲ ନମ୍ବର ଦିଆଯାଇଥିଲା ।
ଏହା ମଧ୍ୟ ପଢନ୍ତୁ: ପରୀକ୍ଷା ଦେବା ବେଳେ ପ୍ରସବ ଯନ୍ତ୍ରଣା, ଶିଶୁକୁ ଜନ୍ମ ଦେଲେ ମହିଳା
ଦିବ୍ୟାଂଶୁ ସିଂହ ଅଭିଯୋଗ କରିଛନ୍ତି ଯେ, ପ୍ରଫେସର ବିନୟ ବର୍ମା ଏବଂ ଆଶିଷ ଗୁପ୍ତା ପିଲାଙ୍କୁ ପରୀକ୍ଷାରେ ପାସ୍ କରିବାକୁ ଲାଞ୍ଚ ନେଇଥିଲେ । ଉତ୍ତରଖାତାର ପୁନଃମୂଲ୍ୟାୟନ କରାଯିବାରୁ ଏହା ଜଣାପଡିଥିଲା । ପ୍ରକୃତରେ ସେହି ପିଲାମାନେ ଫେଲ୍ ନମ୍ବର ରଖିଥିଲେ । ଏନେଇ ସେ ସମସ୍ତ ପ୍ରମାଣ ସହ ରାଜ୍ୟପାଳଙ୍କ ନିକଟରେ ଅଭିଯୋଗ କରିଥିଲେ । ଏହାପରେ ରାଜଭବନ ପକ୍ଷରୁ ବିଶ୍ବବିଦ୍ୟାଳୟ କୁଳପତିଙ୍କୁ ଚିଠି ଲେଖି ଘଟଣାରେ ଯଥୋଚିତ କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦିଆଯାଇଥିଲା । ତେବେ ବର୍ତ୍ତମାନ ସମ୍ପୃକ୍ତ ଦୁଇ ପ୍ରଫେସରଙ୍କୁ ଚାକିରିରୁ ବହିଷ୍କୃତ କରାଯାଇଥିବା ଜଣାପଡିଛି ।
ବିଶ୍ବବିଦ୍ୟାଳୟ କୁଳପତି ପ୍ରଫେସର ବନ୍ଦନା କହିଛନ୍ତି ଯେ, ଡି-ଫାର୍ମାର ପ୍ରଥମ ବର୍ଷ ଛାତ୍ରଙ୍କୁ ଅଧିକ ନମ୍ବର ଦିଆଯାଇଥିବା ଅଭିଯୋଗ ହୋଇଥିଲା । ଏନେଇ ଏକ କମିଟି ଗଠନ କରାଯାଇ ଯାଞ୍ଚ କରାଯାଇଥିଲା । ଯାଞ୍ଚରୁ କିଛି ପିଲାଙ୍କୁ ଅଧିକ ନମ୍ବର ଦିଆଯାଇଥିବା ଜଣାପଡିଥିଲା । ତେବେ ଉତ୍ତର ଖାତାରେ ଜୟ ଶ୍ରୀରାମ ଲେଖାଯିବା ସମ୍ପର୍କରେ କୁଳପତି କହିଛନ୍ତି, ସମ୍ପୃକ୍ତ ଛାତ୍ରଙ୍କ କପିରେ ସ୍ପଷ୍ଟ ଲେଖା ହୋଇନଥିଲା, ଯାହାକୁ ପଢି କିଛି ବୁଝାପଡିବ ଏବଂ ନମ୍ବର ଦିଆଯିବ । ତେବେ ଘଟଣାରେ ପ୍ରଫେସର ମନୀଷ ଗୁପ୍ତା ଓ ବିନୟ ଶର୍ମା ଦୋଷୀ ସାବ୍ୟସ୍ତ ହୋଇଛନ୍ତି । ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ ।
