ମୁମ୍ବାଇ: କୁଖ୍ୟାତ ଆତଙ୍କବାଦୀ ସଂଗଠନ ଇସଲାମିକ ଷ୍ଟେଟ (ISIS) ଲିଙ୍କରେ ମହାରାଷ୍ଟ୍ର ନାସିକର ଜଣେ 32 ବର୍ଷୀୟ ଯୁବ ଇଞ୍ଜିନିୟର । ନାସିକର ଏହି ଇଞ୍ଜିନିୟର ଜଣେ ବ୍ୟବସାୟୀ ମଧ୍ୟ । ସେ ପ୍ରାୟ 3 ଥର ISIS କୁ ଟଙ୍କା ମଧ୍ୟ ପଠାଇଛନ୍ତି । କିଛି ଦିନ ଧରି ସ୍କାନରରେ ଥିବା ଏହି ଇଞ୍ଜିନିୟରଙ୍କୁ ଆଜି ମୁମ୍ବାଇ ଏଟିଏସ ଟିମ୍ ଗିରଫ କରିଛି ।
ଗତ କିଛି ଦିନ ହେବ ଏହି ଯୁବକଙ୍କ ଆତଙ୍କୀ ଲିଙ୍କ ନେଇ ଏଟିଏସ ନିକଟରେ ସୂଚନା ଥିଲା । ଏବେ ତାଙ୍କୁ ନାସିକରୁ ଗିରଫ କରିବା ପରେ ଜେରା କରାଯାଉଛି । ସେ ପ୍ରାୟ 3 ଥର ISIS କୁ ଟଙ୍କା ପଠାଇଥିବା ପ୍ରାଥମିକ ତଦନ୍ତରେ ଜଣାପଡିବା ପରେ ‘ଉପା’ ଆକ୍ଟରେ ମାମଲା ରୁଜୁ କରିଛି ଏଟିଏସ । ତେବେ ଏହି ଯୁବକଙ୍କ ନାମ ଓ ତାଙ୍କ ସମ୍ପର୍କରେ ଅନ୍ୟ ସୂଚନା ତଦନ୍ତକାରୀ ସଂସ୍ଥା ସାର୍ବଜନୀନ କରିନି । ତାଙ୍କୁ ଆଜି କୋର୍ଟରେ ହାଜର କରିବା ପରେ ଅଧିକ ଜେରା କରିବା ପାଇଁ ଏଟିଏସ ରିମାଣ୍ଡ ମାଗିଥିଲା । କୋର୍ଟ ଚଳିତମାସ (ଜାନୁଆରୀ) 31 ପର୍ଯ୍ୟନ୍ତ ଅଭିଯୁକ୍ତକୁ ଏଟିଏସ କଷ୍ଟଡିକୁ ପଠାଇଛନ୍ତି ।
ରିମାଣ୍ଡରେ ଜେରା କରି ଅନ୍ୟ ସମସ୍ତ ତଥ୍ୟ ହାସଲ କରିବାକୁ ଚେଷ୍ଟା କରିବ ଏଟିଏସ । ସେ କିପରି ଏହି ଆତଙ୍କୀ ସଂଗଠନ ସହ ଯୋଗାଯୋଗରେ ଆସିଥିଲେ । ତାଙ୍କର ଆଉ କେହି ସହଯୋଗୀ ମଧ୍ୟ ଆତଙ୍କୀ ଲିଙ୍କରେ ସମ୍ପୃକ୍ତ କି ନାହିଁ ତାହା ତଦନ୍ତ ପରେ ଜଣାପଡିବ । ଅନ୍ୟ କେହି ସମ୍ପୃକ୍ତ ଥିଲେ,ତାଙ୍କୁ ମଧ୍ୟ ଗିରଫ କରାଯିବା ନେଇ ଏଟିଏସ କହିଛି ।
ଏହା ପୂର୍ବରୁ ମଧ୍ୟ ମୁମ୍ବାଇ ଏଟିଏସ ଡିଆରଡିଓର ଜଣେ ବରିଷ୍ଠ ବୈଜ୍ଞାନିକଙ୍କୁ ପାକିସ୍ତାନୀ ଗୁଇନ୍ଦା ସଂସ୍ଥାକୁ ଭାରତୀୟ ପ୍ରତିରକ୍ଷା ବ୍ୟବସ୍ଥା ସମ୍ପର୍କରେ ଗୋପନୀୟ ତଥ୍ୟ ଦେଇଥିବା ଅଭିଯୋଗରେ ଗିରଫ କରିଥିଲା । ସେ ଏବେ ବିଚାର ବିଭାଗୀୟ ଜେଲରେ ଅଛନ୍ତି । ସେ ପାକିସ୍ତାନୀ ଗୁଇନ୍ଦା ସଂସ୍ଥାର ଜଣେ ମହିଳାଙ୍କ ଦ୍ବାରା ହନିଟ୍ରାପର ଶିକାର ହୋଇଥିଲେ । ପ୍ରଥମେ ସୋସିଆଲ ମିଡିଆରେ ଉଭୟଙ୍କ ମଧ୍ୟରେ ପରିଚୟ ହେବା ପରେ ଉଭୟ ପ୍ରତ୍ୟେକ୍ଷ ସାକ୍ଷାତକାର ମଧ୍ୟ କରିଥିଲେ । ଡିଆରଡିଓ ଦ୍ବାରା ବିକଶିତ ହୋଇଥିବା ଯେପଣାସ୍ତ୍ର ପ୍ରଣାଳୀ ସମ୍ପର୍କରେ ଏହି ବୈଜ୍ଞାନିକ ସମ୍ପୃକ୍ତ ପାକିସ୍ତାନୀ ମହିଳାଙ୍କୁ ଗୋପନୀୟ ପ୍ରଦାନ କରିଥିବା ଜଣାପଡିଥିଲା । ଯାହା ସମଗ୍ର ଦେଶରେ ଉଦବେଗ ସୃଷ୍ଟି କରିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
