ହାଇଦ୍ରାବାଦ: ସମୂହ ଛୁଟି ପାଇଁ କ୍ରୁ ମେମ୍ବରଙ୍କୁ ଚାକିରିରୁ ବାହାର କରିଥିଲା ଏୟାର ଇଣ୍ଡିଆ । ଏବେ ଏହି ବରଖାସ୍ତ ନିଷ୍ପତ୍ତିକୁ ପ୍ରତ୍ୟାହାର କରିନେଇଛି କମ୍ପାନୀ । 25 ଜଣ କ୍ରୁ ମେମ୍ବରଙ୍କୁ ଚାକିରିରୁ ବିଦା କରାଯାଇଥିବା ବେଳେ ବର୍ତ୍ତମାନ ଏହି ନିଷ୍ପତ୍ତିରୁ ଓହରିଛି ଏୟାର ଇଣ୍ଡିଆ ଏକ୍ସପ୍ରେସ । ଏୟାରଲାଇନ୍ସର କ୍ରୁ ସଦସ୍ୟମାନେ ମଧ୍ୟ ଧର୍ମଘଟକୁ ବନ୍ଦ କରି ଦେଇଥିବା ସୂଚନା ରହିଛି । ଏୟାର ଇଣ୍ଡିଆ କ୍ରୁ ସଦସ୍ୟମାନେ ଦରମା, ଭତ୍ତା ଏବଂ କାର୍ଯ୍ୟ ପରିସ୍ଥିତି ସମ୍ବନ୍ଧୀୟ ଦାବିକୁ ନେଇ ଧର୍ମଘଟ କରିଥିଲେ । ତେବେ ଅସୁସ୍ଥ ରହିଥିବା କର୍ମଚାରୀମାନେ ଚାକିରିରେ ଯୋଗ ଦେବା ସମୟରେ ଫିଟନେସ ସାର୍ଟିଫିକେଟ ସହିତ ରିପୋର୍ଟିଂ କରିବେ ବୋଲି ଦର୍ଶାଯାଇଛି ।
କ୍ରୁ ମେମ୍ବର ଟର୍ମିନେସନ ରଦ୍ଦ: ସୂଚନା ଅନୁସାରେ, ଏୟାର ଇଣ୍ଡିଆ ଏୟାରଲାଇନ୍ସରେ ଏଭଳି ଧର୍ମଘଟ ହେବା ପରେ ମୁଖ୍ୟ ଶ୍ରମ କମିଶନର କ୍ରୁ ମେମ୍ବର ଏବଂ ମ୍ୟାନେଜମେଣ୍ଟ ମେମ୍ବରକୁ ନେଇ ଏକ ବୈଠକ କରିଥିଲା । ଏହି ବୈଠକରେ 20ରୁ ଅଧିକ କ୍ରୁ ମେମ୍ବର ଏବଂ ଏୟାର ଇଣ୍ଡିଆ ଏକ୍ସପ୍ରେସର ମୁଖ୍ୟ ଅଧିକାରୀ ଯୋଗ ଦେଇଥିଲେ । ଉଭୟଙ୍କ ମଧ୍ୟରେ ଆପୋଷ ମୁଝାମଣା ହୋଇଥିଲା । ବୈଠକରେ ଆଲୋଚନା ପରେ ଏହି ନିଷ୍ପତ୍ତି ନିଆଯାଇଥିବା କଥା କୁହାଯାଉଛି । ଆସନ୍ତା 28 ତାରିଖରେ ଆଉ ଏକ ବୈଠକ ହେବା ନେଇ ମଧ୍ୟ ସୂଚନା ରହିଛି । ମେ' 7 ଏବଂ 8 ତାରିଖରେ 25 କ୍ରୁ ମେମ୍ବରଙ୍କୁ ଚାକିରିରୁ ବିଦା କରାଯାଇଥିଲା ।
80ରୁ ଅଧିକ ଫ୍ଲାଇଟ ବାତିଲ: ମଙ୍ଗଳବାର ରାତିରେ ହଠାତ କ୍ରୁ ମେମ୍ବରମାନେ ଅସୁସ୍ଥତା ଛୁଟି ଦାବି କରିଥିଲେ । ପ୍ରାୟ 300 କ୍ରୁ ମେମ୍ବର ଅସୁସ୍ଥତା ଦର୍ଶାଇ ଛୁଟିରେ ରହିଥିଲେ । ମ୍ୟାନେଜମେଣ୍ଟ ଠିକ ଭାବେ କାର୍ଯ୍ୟ କରୁନଥିବା ନେଇ ଏୟାର ଇଣ୍ଡିଆ କ୍ରୁ ସଦସ୍ୟମାନେ ଅଭିଯୋଗ କରିଥିଲେ । ଚାକିରି ସୁରକ୍ଷା, ବେତନ ଏବଂ ପାରଦର୍ଶିତାକୁ ସ୍ବୀକୃତି ଦେଉନଥିବା ସେମାନେ ଅଭିଯୋଗ କରିଥିଲେ । କ୍ରୁ ମେମ୍ବରଙ୍କ ଅଭାବ କାରଣରୁ ପ୍ରାୟ 80ରୁ ଅଧିକ ବିମାନ ବାତିଲ କରାଯାଇଥିଲା । ଏହି ଅସୁବିଧା ପାଇଁ ଏୟାର ଇଣ୍ଡିଆ କ୍ଷମା ପ୍ରାର୍ଥନା ମଧ୍ୟ କରିଛି । ଏନେଇ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଏୟାର ଇଣ୍ଡିଆ ଏକ୍ସପ୍ରେସରୁ ବିସ୍ତୃତ ରିପୋର୍ଟ ମାଗିଥିଲା । ଏହି ସମସ୍ୟାର ତୁରନ୍ତ ସମାଧାନ ପାଇଁ ନିବେଦନ ମଧ୍ୟ କରାଯାଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
